മധ്യപ്രദേശില്‍ വ്യോമസേനയുടെ രണ്ട് യുദ്ധവിമാനങ്ങള്‍ തകര്‍ന്നുവീണു. ഗ്വാളിയോര്‍ വിമാനത്താവളത്തില്‍ നിന്നും പറന്നുയര്‍ന്ന യുദ്ധവിമാനങ്ങളാണ് പുലര്‍ച്ചെ 5.30 -ഓടെ തകര്‍ന്നുവീണത്. ഇരുവിമാനങ്ങളിലും ഉണ്ടായിരുന്ന രണ്ടു പൈലറ്റുമാര്‍ക്ക് സാരമായ പരിക്കേറ്റതായാണ് വിവരം.
വ്യോമാഭ്യാസം നടത്തുന്നതിന്റെ ഭാഗമായി പറന്നുയര്‍ന്ന വിമാനങ്ങള്‍ മൊറേനക്കു സമീപമാണ് തകര്‍ന്നുവീണത്. വ്യോമസേനയുടെ സുഖോയ്-30, മിറാഷ് 2000 വിമാനങ്ങളാണ് അപകടത്തില്‍പെട്ടത്. വിമാനങ്ങൾ തമ്മില്‍ കൂട്ടിയിടിച്ചാണ് അപകടം നടന്നതെന്നാണ് അനൗദ്യോഗിക റിപ്പോര്‍ട്ടുകള്‍. അപകടം നടന്ന ഉടന്‍ രക്ഷാപ്രവര്‍ത്തനം നടത്തിയതിനാല്‍ പൈലറ്റുമാരെ സുരക്ഷിതമായി പുറത്തിറക്കാന്‍ കഴിഞ്ഞതായി മൊറേന കളക്ടര്‍ അറിയിച്ചു. പ്രദേശത്ത് കൂടുതല്‍ തിരച്ചില്‍ തുടരുകയാണ്.
