19 -ാമത് ഏഷ്യന്‍ ഗെയിംസില്‍ ആറാം സ്വര്‍ണ്ണനേട്ടവുമായി ഇന്ത്യന്‍ താരങ്ങളുടെ മെഡൽവേട്ട തുടരുന്നു. പുരുഷന്മാരുടെ 10 മീറ്റര്‍ എയര്‍ പിസ്റ്റള്‍ ടീം ഇനത്തിലാണ് രാജ്യത്തിന് സുവര്‍ണ്ണനേട്ടം. സറബ്ജോത് സിംഗ്, അർജുൻ സിംഗ് ചീമ, ശിവ നർവാൾ സംഘമാണ് ഇന്ത്യയ്ക്ക് അഭിമാനമായത്.
1734 പോയിന്റോടെയാണ് ഇന്ത്യൻതാരങ്ങൾ സ്വർണ്ണം നേടിയത്. ചൈനീസ് താരങ്ങൾ ഒപ്പത്തിനൊപ്പം മുന്നേറിയെങ്കിലും ഇന്ത്യൻ താരങ്ങളേക്കാൾ ഒരു പോയിന്റ് പിന്നിലായി. 10 മീറ്റർ എയർ പിസ്റ്റൾ വ്യക്തിഗത ഇനത്തിൽ സറബ്ജോത് സിംഗ്, അർജുൻ സിംഗ് ചീമ എന്നിവർ ഫൈനലിലും പ്രവേശിച്ചിട്ടുണ്ട്. അല്പസമയത്തിനകം ഫൈനൽ മത്സരങ്ങൾ നടക്കും.
ഏഷ്യൻ ഗെയിംസ് ഷൂട്ടിങ്ങിൽ ഇന്ത്യൻ താരങ്ങൾ ഇതിനോടകം 13 മെഡലുകൾ നേടിക്കഴിഞ്ഞു. അതിൽ ഏഴുമെഡലുകൾ നേടിയത് ഇന്നലെയാണ്. ആകെ ഇന്ത്യയ്ക്ക് 24 മെഡലുകൾ സ്വന്തമാക്കാൻ കഴിഞ്ഞു. ആറ് സ്വർണ്ണവും എട്ട് വെള്ളിയും പത്തു വെങ്കലവും ഇന്ത്യൻതാരങ്ങൾ നേടിക്കഴിഞ്ഞു. മെഡൽ പട്ടികയിൽ ഇന്ത്യ അഞ്ചാം സ്ഥാനത്താണ്.
