സെപ്റ്റംബര്‍ അവസാനം ബ്രസല്‍സിലെ കിംഗ് ബൗഡോയിന്‍ സ്റ്റേഡിയത്തില്‍ ഫ്രാന്‍സിസ് മാര്‍പാപ്പ അര്‍പ്പിക്കുന്ന വിശുദ്ധ കുര്‍ബാനയില്‍ പങ്കെടുക്കാനുള്ള ടിക്കറ്റുകള്‍ തിങ്കളാഴ്ച, റെക്കോര്‍ഡ് സമയംകൊണ്ട് വിറ്റുതീര്‍ന്നു. സെപ്റ്റംബര്‍ 29-ലെ വിശുദ്ധ കുര്‍ബാനയ്ക്കുള്ള 32,000 ടിക്കറ്റുകള്‍ വെറും 90 മിനിറ്റിനുള്ളിലാണ് തീര്‍ന്നത്. ഇത് ഓണ്‍ലൈനില്‍ സൗജന്യമായി ലഭ്യമായിരുന്നു.
ഈ വിശുദ്ധ കുര്‍ബാനമധ്യേ ഫ്രാന്‍സിസ് മാര്‍പാപ്പ, ആവിലയിലെ വി. തെരേസയുടെ ആത്മീയപുത്രിയും സെന്റ് ജോണ്‍ ഓഫ് ദി ക്രോസിന്റെ സുഹൃത്തുമായ കര്‍മ്മലീത്ത സിസ്റ്റര്‍ അന ഡി ജീസസിനെ വാഴ്ത്തപ്പെട്ടവളായി പ്രഖ്യാപിക്കും. ഏകദേശം 50,000 പേര്‍ക്ക് ഇരിക്കാവുന്ന, ബെല്‍ജിയത്തിലെ ഏറ്റവും വലിയ ഫുട്ബോള്‍ സ്റ്റേഡിയമാണ് ബ്രസല്‍സ്. സ്റ്റേഡിയത്തില്‍, അവശേഷിക്കുന്ന ഏകദേശം 18,000 സീറ്റുകള്‍ ഇടവകകള്‍, രൂപതകള്‍, പ്രസ്ഥാനങ്ങള്‍ എന്നിവയില്‍നിന്നുള്ള ഗ്രൂപ്പുകള്‍ക്കായി നീക്കിവച്ചിരിക്കുന്നതായി സംഘാടകര്‍ വിശദീകരിച്ചു.
സെപ്റ്റംബര്‍ 26 മുതല്‍ 29 വരെ കത്തോലിക്കാ സര്‍വകലാശാലകളായ ല്യൂവന്‍, ലൂവെന്‍-ലാ-ന്യൂവ് എന്നിവയുടെ 600-ാം വാര്‍ഷികത്തോടനുബന്ധിച്ച് ഫ്രാന്‍സിസ് മാര്‍പാപ്പ ബെല്‍ജിയത്തിലെ മൂന്നു നഗരങ്ങള്‍ സന്ദര്‍ശിക്കും. സെപ്റ്റബര്‍ 26-ന് ചെറിയ യൂറോപ്യന്‍ രാജ്യമായ ലക്‌സംബര്‍ഗില്‍ പാപ്പാ ഒരു ഹ്രസ്വസന്ദര്‍ശനവും നടത്തും.
