ഇംപീച്ച് ചെയ്യപ്പെട്ട ദക്ഷിണ കൊറിയൻ പ്രസിഡന്റ് യൂൻ സുക് യോളിനെ കഴിഞ്ഞ മാസം രാജ്യത്ത് പട്ടാളനിയമം ഏർപ്പെടുത്താനുള്ള ശ്രമത്തിന്റെപേരിൽ കസ്റ്റഡിയിൽ സൂക്ഷിക്കാനുള്ള സമയം നീട്ടി കോടതി ഉത്തരവിട്ടു.
യൂണിനെ വിട്ടയച്ചാൽ തെളിവുകൾ നശിപ്പിക്കപ്പെടുമെന്ന ആശങ്ക ഉദ്ധരിച്ച്, സസ്പെൻഡ് ചെയ്യപ്പെട്ട പ്രസിഡന്റിനെ 20 ദിവസം വരെ കസ്റ്റഡിയിൽ സൂക്ഷിക്കാൻ അന്വേഷണ ഉദ്യോഗസ്ഥരെ അനുവദിച്ചു. അന്വേഷകരും പ്രസിഡൻഷ്യൽ സെക്യൂരിറ്റി ടീമും തമ്മിൽ ആഴ്ചകളോളം നീണ്ട സംഘർഷത്തിനൊടുവിൽ ബുധനാഴ്ചയാണ് 64 കാരനായ പ്രസിഡന്റിനെ അറസ്റ്റ് ചെയ്തത്. തടങ്കൽ നീട്ടിയതിനുശേഷം പ്രസിഡന്റിന്റെ അനുയായികൾ കോടതിയിൽ അതിക്രമിച്ചുകയറി.
രാജ്യത്തെ പ്രക്ഷുബ്ധതയിലാക്കിയ, ഡിസംബർ മൂന്നിന് പരാജയപ്പെട്ട സൈനിക നിയമ ഉത്തരവിനെച്ചൊല്ലിയുള്ള കലാപത്തിന്റെപേരിൽ സസ്പെൻഡ് ചെയ്യപ്പെട്ട പ്രസിഡന്റിനെതിരെ ഉയർന്ന റാങ്കിംഗ് ഉദ്യോഗസ്ഥർക്കുള്ള അഴിമതി അന്വേഷണ ഓഫീസ് (സി. ഐ. ഒ.) അന്വേഷണം നടത്തുകയാണ്. പാർലമെന്റ് അദ്ദേഹത്തെ ഇംപീച്ച് ചെയ്യുകയും സസ്പെൻഡ് ചെയ്യുകയും ചെയ്തു. എന്നാൽ ഭരണഘടനാ കോടതി ഇംപീച്ച്‌മെന്റ് ശരിവച്ചാൽ മാത്രമേ അദ്ദേഹത്തെ സ്ഥാനത്തുനിന്ന് നീക്കൂ.
