ഇന്ത്യന്‍ സൂപ്പര്‍ ലീഗ് 2021-22 സീസണ്‍ ഫൈനലിലേക്ക് അടുത്തുകൊണ്ടിരിക്കെ ആരാധകര്‍ക്ക് ശുഭ വാര്‍ത്തയുമായി സംഘാടകര്‍. രണ്ടു വര്‍ഷത്തിനുശേഷം ആദ്യമായി സ്റ്റേഡിയത്തിലേക്ക് ആരാധകരെ അനുവദിക്കാന്‍ സംഘാടകര്‍ തീരുമാനിച്ചു. ഗോവയിലെ പിജെഎന്‍ സ്റ്റേഡിയത്തിലാണ് ഐഎസ്എല്‍ ഫുട്ബോളിന് ഈ വര്‍ഷം പരിസമാപ്തിയാവുക. മാര്‍ച്ച് 20നാണ് ഫൈനല്‍.
കോവിഡ് 19 കേസുകള്‍ ഇന്ത്യയില്‍ കുതിച്ചുയര്‍ന്നതിനെ തുടര്‍ന്നാണ് ആരാധകരെ സ്റ്റേഡിയത്തില്‍ നിന്നും മാറ്റി നിര്‍ത്തിയത്. എന്നാല്‍, ഇന്ത്യയില്‍ കേസുകള്‍ കുറഞ്ഞതോടെ കായിക മത്സരങ്ങള്‍ക്ക് ആരാധകരെ അനുവദിച്ചു തുടങ്ങി. അടുത്തിടെ നടന്ന ഇന്ത്യ വെസ്റ്റിന്‍ഡീസ് ടി20 മത്സരത്തിന് കൊല്‍ക്കത്ത ഈഡന്‍ ഗാര്‍ഡനില്‍ ആരാധകരെ അനുവദിച്ചിരുന്നു. ഈ രീതിയിലാകും ഐഎസ്എല്‍ ഫൈനലിനും ആരാധകരെത്തുക.
ഗോവ സര്‍ക്കാര്‍ ജനുവരി 23ന് പുറത്തിറക്കിയ അറിയിപ്പ് പ്രകാരം വേദിയുടെ പകുതിയോളം കാണികളെ പ്രവേശിപ്പിക്കാമെന്നാണ് വ്യക്തമാക്കുന്നത്. ഇതോടെ സ്റ്റേഡിയത്തില്‍ 9500 ഫുട്ബോള് ആരാധകര്‍ ഐഎസ്എല്‍ ഫൈനല്‍ കാണാനെത്തും. ഐഎസ്എല്‍ സംഘാടകര്‍ ടിക്കറ്റ് വില്‍പന ഉള്‍പ്പെടെയുള്ള നടപടിക്രമങ്ങള്‍ ഉടന്‍ ആരംഭിക്കും. സര്‍ക്കാര്‍ പ്രതിനിധികളുമായി സംഘാടകര്‍ ഇക്കാര്യം ചര്‍ച്ച ചെയ്യുകയാണ്.
ഗോവയില്‍ ഈ മാസം ആദ്യം നിയമസഭാ തെരഞ്ഞെടുപ്പ് സുഗമമായി നടത്തിയിരുന്നു. കോവിഡ് 19 കേസുകള്‍ ഇതിനുശേഷം കാര്യമായി വര്‍ധിച്ചിട്ടുമില്ല. 500ല്‍ താഴെയാണ് നിലവിലുള്ള കേസുകള്‍. ടെസ്റ്റ് പോസിറ്റിവിറ്റി നിരക്ക് രണ്ടില്‍ താഴെയാവുകയും ചെയ്തു. സംസ്ഥാനത്തെ സ്‌കൂളുകളില്‍ ക്ലാസുകളും പതിവുപോലെ ആരംഭിച്ചിട്ടുണ്ട്. കൂടാതെ വിവിധ പരിപാടികളും നടത്തുന്നതിന് കാര്യമായ ഇളവുകളും നല്‍കി.
കോവിഡ് 19ന് തുടങ്ങിയതിനുശേഷം ഇതാദ്യമായിട്ടായിരിക്കും ഫുട്ബോള് ടൂര്‍ണമെന്റിന് വലിയ രീതിയിലുള്ള കാണികളെ അനുവദിക്കുന്നത്. 2019-20 സീസണില്‍ കൊല്‍ക്കത്തയിലാണ് ഒടുവിലായി ഐഎസ്എല്‍ മത്സരത്തിന് ആരാധകരെത്തിയത്. അന്ന് 50,000ത്തോളം കാണികള്‍ സെമി ഫൈനല്‍ കാണാനെത്തി. 2020 മാര്‍ച്ച് 8ന് നടന്ന ഫൈനല്‍ ആയിരുന്നു അടച്ചിട്ട സ്റ്റേഡിയത്തില്‍ നടന്ന ഇന്ത്യയിലെ ആദ്യ കായികവിനോദം. കോവിഡ് 19നെ തുടര്‍ന്ന് കഴിഞ്ഞ രണ്ടു സീസണുകളിലും മത്സരങ്ങള്‍ ഗോവയിലാണ് നടക്കുന്നത്.
