പഞ്ചാബിലെ ഇന്ത്യ – പാക്ക് അന്താരാഷ്ട്ര അതിര്‍ത്തിയില്‍ നുഴഞ്ഞുകയറ്റ ശ്രമം പരാജയപ്പെടുത്തി ബിഎസ് എഫ്. അതിര്‍ത്തിമേഖലയിലേക്ക് നുഴഞ്ഞുകയറാന്‍ ശ്രമിച്ച പാക്ക് നുഴഞ്ഞുകയറ്റക്കാരനെ സേന വെടിവച്ചിടുകയായിരുന്നു. ഗുരുദാസ്പൂര്‍ സെക്ടറിലെ അതിര്‍ത്തിയില്‍ ചൊവ്വാഴ്ച രാവിലെയാണ് സംഭവം.
അതിര്‍ത്തിയില്‍ പാക്കിസ്ഥാന്‍ ആയുധധാരി സംശയാസ്പദമായ സാഹചര്യത്തില്‍ നില്‍ക്കുന്നത് രാവിലെ എട്ടുമണിക്കാണ് സുരക്ഷസേനയുടെ ശ്രദ്ധയില്‍ പെട്ടത്. തുടര്‍ന്ന് അതിര്‍ത്തി സുരക്ഷ സേന ഇയാളുടെ നീക്കങ്ങള്‍ നിരീക്ഷിക്കുകയായിരുന്നു. തുടര്‍ന്ന് ഇയാള്‍ അതിര്‍ത്തി വേലിയിലേക്ക് എത്തുകയും നിലയുറപ്പിക്കുകയും ചെയ്തു. നുഴഞ്ഞുകയറ്റ നീക്കമെന്ന് സ്ഥിരീകരിച്ചതിനെ തുടര്‍ന്നാണ് സേന വെടിയുതിര്‍ത്തത്. പ്രദേശത്ത് ഇപ്പോളും തിരച്ചില്‍ നടത്തുകയാണെന്നും അധികൃതര്‍ അറിയിച്ചു.
