ഒക്ടോബർ 7 ന് ഹമാസ് തട്ടിക്കൊണ്ടുപോയ ഇസ്രായേലി ബന്ദികളുടെ ഫോട്ടോകൾ രക്തത്തിൽ ചിതറിക്കിടക്കുന്ന നിലയിലുള്ള ചുവർച്ചിത്രം ടെഹ്റാനിൽ പ്രദർശിപ്പിച്ചതായി റിപ്പോർട്ട്. ചൊവ്വാഴ്ച ടെഹ്റാനിലെ പാലസ്തീൻ സ്ക്വയറിൽ ചുവർച്ചിത്രം സ്ഥാപിച്ചതായി ടെഹ്റാൻ ടൈംസ് ആണ് റിപ്പോർട്ട് ചെയ്തത്.
മറ്റ് മൂന്ന് ബന്ദികൾക്കൊപ്പം ജൂണിൽ നടന്ന ഒരു ഓപ്പറേഷനിൽ ഐ. ഡി. എഫ്. സൈനികർ മോചിപ്പിച്ച നോവാ അർഗമാനിയും ബന്ദികളുടെ ഫോട്ടോകളിൽ ഉൾപ്പെടുന്നു. ഒരു ബന്ദിയെയും മോചിപ്പിക്കില്ല എന്ന അടിക്കുറിപ്പോടെയാണ്‌ ഈ ചുവർച്ചിത്രം പ്രദർശിപ്പിച്ചിരിക്കുന്നത്‌.
ഹമാസ് നേതാവ് യാഹ്യാ സിൻവാറിനെ ഉന്മൂലനം ചെയ്തതിനെത്തുടർന്ന് ഭാവിയിലെ ബന്ദികളുടെ മോചനം – വെടിനിർത്തൽ കരാറിനെക്കുറിച്ച് ബന്ദികളുടെ കുടുംബങ്ങൾ വലിയ അനിശ്ചിതത്വം പ്രകടിപ്പിച്ചതോടെയാണ് ചുവർച്ചിത്രം വന്നത്. സിൻവാറിന്റെ മരണം തങ്ങളുടെ പ്രിയപ്പെട്ടവരുടെ തിരിച്ചുവരവിന് പുതിയ നയതന്ത്രസാധ്യതകൾ തുറക്കുമെന്ന് ചില കുടുംബങ്ങൾ വിശ്വസിക്കുന്നു.
