സ്വീഡനിൽ ഖുറാൻ കത്തിച്ചതിന്റെ പേരിൽ കുപ്രസിദ്ധനായ ഇറാഖി പൗരൻ സൽവാൻ മോമിക വെടിയേറ്റു മരിച്ചതായി റിപ്പോർട്ട്. നിശ്ചിത കൃത്യത്തിൽ മോമികയെ പ്രതിയാക്കിയ കേസിൽ വ്യാഴാഴ്ച വിധി വരാനിരിക്കുകയായിരുന്നു. വിധി സ്റ്റോക്ക്ഹോം ജില്ലാ കോടതി മാറ്റിവച്ചു.
ബുധനാഴ്‌ച രാത്രി വൈകി സോഡർടാൽജെയിലെ ഹോവ്‌സ്‌ജോയിലെ വീട്ടിലാണ് അദ്ദേഹത്തെ വെടിയേറ്റ നിലയിൽ കണ്ടെത്തിയത്. സൽവാൻ മോമിക മരിച്ചതായി സ്വീഡിഷ് സ്റ്റേറ്റ് മീഡിയ വ്യാഴാഴ്ച റിപ്പോർട്ട് ചെയ്തു.
2023 ൽ, 38 കാരനായ സാൽവാൻ മോമിക സ്വീഡനിൽ ഒന്നിലധികം ഖുർ ആൻ കത്തിച്ചിരുന്നു. അദ്ദേഹത്തിന്റെ പ്രവർത്തനങ്ങൾ ആഗോളശ്രദ്ധ നേടുകയും നിരവധി മുസ്ലീം രാജ്യങ്ങളിൽ അദ്ദേഹത്തിനെതിരെ രോഷം ആളിക്കത്തുകയും കലാപങ്ങളും വിമർശങ്ങളും ഉണ്ടാകുകയും ചെയ്തിരുന്നു.
തന്റെ പ്രതിഷേധം മുസ്‌ലിംങ്ങളോടല്ല, ഇസ്‌ലാമിന്റെ മതത്തിനെതിരെയാണെന്നും ഖുർ ആനിലെ സന്ദേശങ്ങളിൽനിന്ന് സ്വീഡനിലെ ജനങ്ങളെ സംരക്ഷിക്കാൻ താൻ ആഗ്രഹിക്കുന്നുവെന്നും മോമിക കോടതിയിൽ വാദിച്ചിരുന്നു.
ഖുറാൻ കത്തിച്ചതിനെക്കുറിച്ചു നടത്തിയ പരാമർശങ്ങളുടെ പേരിൽ സൽവാൻ മോമികയ്ക്കും ഒരു കൂട്ടുപ്രതിക്കുമെതിരെ സ്റ്റോക്ക്ഹോം കോടതിയിൽ വംശീയവിദ്വേഷം വളർത്തിയതിന് കേസെടുത്തിരുന്നു. വ്യാഴാഴ്ച രാവിലെ വിധി വരുമെന്ന് പ്രതീക്ഷിച്ചിരിക്കെയായിരുന്നു മരണം.
മോമികയെ രാജ്യത്തുനിന്ന് പുറത്താക്കാൻ സ്വീഡിഷ് മൈഗ്രേഷൻ ഏജൻസി 2023 ൽ തീരുമാനിച്ചിരുന്നു. എന്നിരുന്നാലും, ഇറാഖിൽ അദ്ദേഹത്തിനെതിരായ ഭീഷണികൾ ഉണ്ടായിരുന്നതിനാൽ പുറത്താക്കൽ നടന്നില്ല. അതിനാൽ 2024 ഏപ്രിൽ വരെ സാധുതയുള്ള ഒരു പുതിയ താൽക്കാലിക താമസാനുമതി അദ്ദേഹത്തിന് ലഭിച്ചു.
വടക്കൻ ഇറാഖിലെ നിനവെ പ്രവിശ്യയിലെ ഖരാക്കോഷിലെ അൽ-ഹംദാനിയ ജില്ലയിൽനിന്നുള്ള സൽവാൻ മോമിക ഒരു അസീറിയൻ കത്തോലിക്കനായാണ് വളർന്നത്. 2006-2008 ആഭ്യന്തരയുദ്ധകാലത്ത് ഇസ്ലാമിക് സ്റ്റേറ്റിന്റെ ക്രൈസ്തവപീഡനത്തിനിടയിൽ അദ്ദേഹം അസീറിയൻ പാട്രിയോട്ടിക് പാർട്ടിയിൽ ചേരുകയും മൊസൂൾ ആസ്ഥാനത്ത് സുരക്ഷാഗാർഡായി സേവനമനുഷ്ഠിക്കുകയും ചെയ്തു.
മോമിക 2017 ൽ ജർമനിയിലേക്ക് പലായനം ചെയ്തു. അവിടെ അദ്ദേഹം ക്രിസ്തുമതം പരസ്യമായി ഉപേക്ഷിക്കുകയും സ്വയം നിരീശ്വരവാദിയായി പ്രഖ്യാപിക്കുകയും ചെയ്തു. 2018 ഏപ്രിലിൽ സ്വീഡനിൽ അഭയം തേടിയ അദ്ദേഹം ഇറാഖി അഭയാർഥിയായി രജിസ്റ്റർ ചെയ്തു.
പിന്നീട് 2024 ഏപ്രിൽ വരെ സാധുതയുള്ള മൂന്നുവർഷത്തെ താൽക്കാലിക റസിഡൻസ് പെർമിറ്റ് അദ്ദേഹത്തിന് ലഭിച്ചു. എന്നിരുന്നാലും, സ്വീഡിഷ് പൗരത്വത്തിന് ആവശ്യമായ സ്ഥിരതാമസത്തിനുള്ള അദ്ദേഹത്തിന്റെ അപേക്ഷ നിരസിക്കപ്പെട്ടിരുന്നു.
