രാജ്യത്തെ ഏറ്റവും വലിയ ഡിസൈൻ കോൺക്ലേവായ കൊച്ചി ഡിസൈൻ വീക്കിന്റെ രണ്ടാം എഡിഷന് തുടക്കമായി. കൊച്ചിയിലെ ബോൾഗാട്ടി പാലസിൽ നടക്കുന്ന കോൺക്ലേവിൽ ഡിസൈൻ ലോകത്തെ പ്രമുഖർ ഒത്തുചേരും. കേരളത്തെ വിജ്ഞാന സമൂഹമായി വാർത്തെടുക്കുക എന്ന ലക്ഷ്യത്തോടെ സംഘടിപ്പിക്കുന്ന കൊച്ചി ഡിസൈൻ വീക്ക് മുഖ്യമന്ത്രി പിണറായി വിജയൻ ഉദ്ഘാടനം ചെയ്തു.
നിരവധി ശില്പശാലകളും പാനൽ ചർച്ചകളും പ്രദർശനങ്ങളുമാണ് കൊച്ചി ഡിസൈൻ വീക്കിന്റെ ഭാഗമായി നടക്കുന്നത്. “സാങ്കേതിക പരിജ്ഞാനവും നൈപുണ്യവുമുള്ള യുവതലമുറക്ക് ആഗോള ഇൻഫർമേഷൻ ഹൈവേയുടെ ഭാഗമാകാനുള്ള അവസരങ്ങൾ ഇതിന്റെ ഭാഗമായി സൃഷ്ടിക്കപ്പെടും. ഡിസൈൻ ലോകത്തെ പ്രധാന ശ്രദ്ധാകേന്ദ്രമായി കേരളത്തെ മാറ്റിയെടുക്കാനുള്ള സംസ്ഥാന സർക്കാരിന്റെ പരിശ്രമങ്ങളുടെ ഭാഗമായാണ് ഈ സംഗമം” മുഖ്യമന്ത്രി പറഞ്ഞു.
“കേരളത്തിൽ ഒരു ഡിസൈൻ നയം രൂപീകരിക്കാനാണ് സർക്കാർ ആലോചിക്കുന്നത്. ഡിസൈൻ ലോകത്തെ പ്രതിഭകളെ അടുത്തറിയാനും അവർക്ക് വേണ്ട സാധ്യതകൾ സൃഷ്ടിക്കപ്പെടുന്ന സംരംഭമായി മാറുവാനും കൊച്ചി ഡിസെൻ വീക്കിന് കഴിയും,”- മുഖ്യമന്ത്രി കൂട്ടിച്ചേർത്തു.
