നാല് മാസത്തിന് ശേഷം രാജ്യത്തെ പെട്രോള്‍ ഡീസല്‍ വില കൂടി. അഞ്ച് നിയമസഭാ മണ്ഡലങ്ങളില്‍ തിരഞ്ഞെടുപ്പ് പൂര്‍ത്തിയായതിന് പിന്നാലെയാണ് വില വര്‍ധനവ്. തിരഞ്ഞെടുപ്പ് പ്രഖ്യാപിച്ചതിനു ശേഷം വില കൂടിയിട്ടുണ്ടായിരുന്നില്ല. പെട്രോള്‍ ലീറ്ററിന് 87 പൈസയും ഡീസല്‍ ലീറ്ററിന് 85 പൈസയുമാണ് കൂട്ടിയത്.
ഇതോടെ തിരുവനന്തപുരത്ത് പെട്രോള്‍ ലിറ്ററിന് 107.31 രൂപയും ഡീസല്‍ ലിറ്ററിന് 94.41 രൂപയുമായി. കൊച്ചിയില്‍ പെട്രോളിന് 105.18 രൂപയും ഡീസലിന് 92.40 രൂപയുമാണ്. കോഴിക്കോട് പെട്രോളിന് 105.45 ഡീസലിന് 92.61 രൂപയുമാണ് പുതിയ വില. പുതുക്കിയ വില ഇന്ന് രാവിലെ ആറു മണി മുതല്‍ പ്രാബല്യത്തില്‍ വരും.
2021 നവംബറിലാണ് രാജ്യത്ത് അവസാനമായി ഇന്ധനവില വര്‍ധിച്ചത്. റഷ്യ-യുക്രൈന്‍ യുദ്ധ പശ്ചാത്തലത്തില്‍ ക്രൂഡ് ഓയില്‍ വില വര്‍ധിച്ചിട്ടും രാജ്യത്ത് ഇന്ധനവിലയില്‍ മാറ്റമുണ്ടായിരുന്നില്ല. വരും ദിവസങ്ങളിലും ഇന്ധനവില കൂടാന്‍ തന്നെയാണ് സാധ്യത.
അതേസമയം, ഗാര്‍ഹിക ആവശ്യത്തിനുള്ള പാചകവാതക വിലയും കൂട്ടിയിട്ടുണ്ട്. 50 രൂപയുടെ വര്‍ധനവാണ് ഉണ്ടായിരിക്കുന്നത്. ഇതോടെ കൊച്ചിയിലെ പുതിയ വില 956 രൂപയാണ്. 5 കിലോയുടെ ചെറിയ സിലിണ്ടറിന് 13 രൂപ കൂട്ടി 352 രൂപയായി.
