ഫ്രഞ്ച് പ്രസിഡന്റ് ഇമ്മാനുവൽ മാക്രോണും സൗദി അറേബ്യയുടെ കിരീടാവകാശി മുഹമ്മദ് ബിൻ സൽമാനും പാലസ്തീൻ രാഷ്ട്രം സ്ഥാപിക്കുന്നതിനുള്ള ഒരു കോൺഫറൻസിന് സംയുക്ത അധ്യക്ഷത വഹിക്കുമെന്ന് ബുധനാഴ്ച എ. എഫ്. പി. റിപ്പോർട്ട് ചെയ്തു. ജൂണിൽ സമ്മേളനം നടക്കുമെന്നാണ് പ്രതീക്ഷിക്കുന്നത്.
“വരുംമാസങ്ങളിൽ എല്ലാവരെയും ഈ പാതയിലേക്കു കൊണ്ടുവരാൻ ഞങ്ങൾ ഒരുമിച്ച് ഞങ്ങളുടെ നയതന്ത്ര സംരംഭങ്ങൾ വർധിപ്പിക്കുകയും സംയോജിപ്പിക്കുകയും ചെയ്യും. ഈ ദിശയിലേക്കുനീങ്ങാൻ തയ്യാറാണെങ്കിലും ഫ്രാൻസിനെ കാത്തിരിക്കുന്ന നിരവധി യൂറോപ്യൻ, യൂറോപ്യൻ ഇതര പങ്കാളികളെയും സഖ്യകക്ഷികളെയും ഉൾപ്പെടുത്താൻ ഞങ്ങൾ ആഗ്രഹിക്കുന്നു” – ഫ്രഞ്ച് പ്രസിഡന്റ് കൂട്ടിച്ചേർത്തതായി എ. എഫ്. പി. റിപ്പോർട്ട് ചെയ്യുന്നു.
സംഘർഷം അവസാനിപ്പിക്കാനും പാലസ്തീൻ രാഷ്ട്രം സ്ഥാപിക്കാനും മാറ്റാനാവാത്ത നടപടികൾ പ്രോൽസാഹിപ്പിക്കുക എന്ന ലക്ഷ്യത്തോടെ 2025 ജൂണിൽ ഇസ്രായേൽ – പാലസ്തീൻ സംഘർഷ വിഷയത്തിൽ ഒരു ‘സമാധാന സമ്മേളനം’ നടത്താനുള്ള തീരുമാനത്തിന് യു. എൻ. പൊതുസഭ ബുധനാഴ്ച അംഗീകാരം നൽകിയിരുന്നു. ഏകദേശം 157 രാജ്യങ്ങൾ തീരുമാനത്തെ പിന്തുണച്ചു; ഏഴ് രാജ്യങ്ങൾ വിട്ടുനിന്നു. ഇസ്രായേൽ, യു. എസ്., ഹംഗറി, അർജന്റീന എന്നിവയുൾപ്പെടെ എട്ട് രാജ്യങ്ങൾ ഈ തീരുമാനത്തെ എതിർത്തു.
