മണിപ്പൂരിലെ തൗബാല്‍ ജില്ലയിലെ ഹവോഖോങ്ങ് താഴ്വരയില്‍ നിന്നും വന്‍ ആയുധശേഖരം കണ്ടെത്തി. ഹാന്‍ഡ് ഗ്രനേഡുകളും കാര്‍ബൈന്‍ മെഷീന്‍ ഗണ്ണും ഉള്‍പ്പെടെയുളള അത്യാധുനിക ആയുധങ്ങളാണ് കണ്ടെടുത്തത്. ഇതു സംബന്ധിച്ച വിവരം അസം റൈഫിള്‍സാണ് പുറത്തുവിട്ടത്.
മേഖലയില്‍ ആയുധശേഖരമുണ്ടെന്ന രഹസ്യാന്വേഷണ വിഭാഗം വിവരം നല്‍കിയിരുന്നു. ഇതേ തുടര്‍ന്ന് സെര്‍ച്ച് ഓപ്പറേഷന്‍ ഗ്രൂപ്പിന്റെ (എസ്ഒജി) സഹകരണത്തോടെ നടത്തിയ തിരച്ചിലിലാണ് ആയുധങ്ങള്‍ കണ്ടെടുത്തത്. 9 എംഎം കാര്‍ബൈന്‍ മെഷീന്‍ ഗണ്‍, ഒരു സിംഗിള്‍ ബാരല്‍ റൈഫിള്‍, മൂന്ന് ഹാന്‍ഡ് ഗ്രനേഡുകള്‍ എന്നിവയും കണ്ടെത്തിയ ആയുധശേഖരത്തിലുണ്ട്. സംസ്ഥാനത്ത് ഇപ്പോഴും ഇടയ്ക്കിടെ അക്രമ സംഭവങ്ങളുണ്ടാകുന്നതിനിടെയാണ് ആയുധങ്ങള്‍ കണ്ടെത്തിയത്.
