2024 പാരീസ് ഒളിമ്പിക്‌സിനുള്ള ഇന്ത്യൻ സംഘത്തിന്റെ നേതൃസ്ഥാനമായ ‘ഷെഫ്-ഡി-മിഷൻ’ രാജിവയ്ക്കുന്നതായി പ്രഖ്യാപിച്ച് മേരി കോം. വ്യക്തിപരമായ കാരണങ്ങൾ ചൂണ്ടിക്കാട്ടിയാണ് രാജി. നേതൃ സ്ഥാനത്തുനിന്ന് തന്നെ മാറ്റണമെന്ന് ആവശ്യപ്പെട്ടുള്ള കത്ത് മേരി കോമിൽ നിന്ന് ലഭിച്ചതായി ഇന്ത്യൻ ഒളിമ്പിക് അസോസിയേഷൻ പ്രസിഡന്റ് പി ടി ഉഷയും വെളിപ്പെടുത്തി.
“രാജ്യത്തിന് വേണ്ടി ചെയ്യാൻ കഴിയുന്നതെന്തും താൻ ചെയ്യുമെന്ന് മേരി കോം പറഞ്ഞു. എന്നാൽ ഒളിമ്പിക്സിൽ ഇന്ത്യൻ നായക സ്ഥാനം വഹിക്കാൻ തനിക്ക് കഴിയില്ല. ഏറ്റെടുത്ത പ്രവൃത്തിയിൽ നിന്ന് പിന്മാറുന്നത് ദുഃഖകരമാണ്. എന്നാൽ മറ്റു വഴികൾ ഇല്ലാത്തതിനാലാണ് ഈ തീരുമാനം”- മേരി കോം വ്യക്തമാക്കി. എന്നാൽ രാജ്യത്തെയും പാരീസ് ഒളിമ്പിക്സിൽ മത്സരിക്കുന്ന കായികതാരങ്ങളെയും പിന്തുണയ്ക്കാൻ തന്റെ സാന്നിധ്യമുണ്ടാകുമെന്നു മേരി ഉറപ്പു നൽകി.
മാർച്ച് 21നാണ് ആറ് തവണ ലോക ചാമ്പ്യനായ മേരി കോമിനെ പാരീസ് ഒളിമ്പിക്‌സിനുള്ള ഇന്ത്യൻ സംഘത്തിന്റെ നേതൃസ്ഥാനം ഏൽപ്പിക്കുന്നതായി ഇന്ത്യൻ ഒളിമ്പിക് അസോസിയേഷൻ പ്രഖ്യാപിക്കുന്നത്. കൂടിയാലോചനകൾക്ക് ശേഷം പകരം ആളെ നിശ്ചയിക്കാനാണ് ഇന്ത്യൻ ഒളിമ്പിക് അസോസിയേഷന്റെ തീരുമാനം.
