അമേരിക്കയിലെ ഒന്നിലധികം ഇടങ്ങളിൽ കൂട്ട വെടിവയ്പ്പ് നടന്നതായി റിപ്പോര്‍ട്ട്. സംഭവത്തില്‍ 22 പേർ കൊല്ലപ്പെടുകയും 60ഓളം പേർക്ക് പരിക്കേൽക്കുകയും ചെയ്‌തതായി എന്‍.ബി.സി ന്യൂസിനെ ഉദ്ധരിച്ച് റോയിട്ടേഴ്സ് റിപ്പോര്‍ട്ടു ചെയ്തു. ബുധനാഴ്‌ച വൈകീട്ട് (യു.എസ് പ്രാദേശിക സമയം) ലൂവിസ്റ്റണിലെ ബാറിലും റസ്റ്റോറന്റിലുമാണ് സംഭവം നടന്നതെന്നാണ് റിപ്പോർട്ടുകൾ.
സംശയാസ്‌പദമായ നിലയിൽ തോക്കുമായി നടക്കുന്ന അക്രമിയുടെ രണ്ടു ഫോട്ടോകൾ പൊലീസ് ഫേസ്ബുക്ക് പേജിലൂടെ പുറത്തുവിട്ടിട്ടുണ്ട്. പ്രതിക്കായി അന്വേഷണം ശക്തമാക്കിയിട്ടുണ്ടെന്നും പൊലീസ് പറഞ്ഞു. പ്രദേശത്ത് ജാഗ്രതാ നിർദേശം നൽകിയിട്ടുണ്ട്. അക്രമവുമായി ബന്ധപ്പെട്ട് ഇതുവരെ ആരേയും കസ്റ്റഡിയിലെടുത്തിട്ടില്ലെന്ന് ബന്ധപ്പെട്ട വൃത്തങ്ങൾ വ്യക്തമാക്കി.
അതേസമയം, പ്രതിയെ തിരിച്ചറിയാൻ കൗണ്ടി ഷെരീഫ് പൊതുജനങ്ങളുടെ സഹായം അഭ്യർഥിച്ചതായാണ് വിവരം. കൂട്ട വെടിവയ്പ്പിനോട് കൃത്യമായി പ്രതികരിക്കുകയാണെന്നും, കൂടാതെ പരിക്കേറ്റവരെ കൊണ്ടുപോകുന്നതിനായി പ്രദേശത്തെ ആശുപത്രികളുമായി ബന്ധപ്പെടുന്നുണ്ടെന്നും ലൂയിസ്‌റ്റണിലെ സെൻട്രൽ മെയിൻ മെഡിക്കൽ സെന്റർ പുറപ്പെടുവിച്ച പ്രസ്‌താവനയിൽ പറയുന്നു.
