മാല ദ്വീപ് തലസ്ഥാനമായ മാലിയിൽ വിദേശ തൊഴിലാളികളുടെ താമസസ്ഥലത്തുണ്ടായ തീപിടിത്തത്തിൽ ഒൻപത് ഇന്ത്യക്കാർ ഉൾപ്പെടെ പത്തു പേർ മരിച്ചു. എഎഫ്പി വാർത്താ ഏജൻസിയാണ് ഈ വിവരം റിപ്പോർട്ട് ചെയ്തത്. കത്തിനശിച്ച കെട്ടിടത്തിന്റെ മുകൾനിലയിൽ നിന്നാണ് 10 മൃതദേഹങ്ങൾ കണ്ടെത്തിയത്. തീയിൽപെട്ട് നിരവധി ആളുകൾക്ക് പരിക്കേറ്റിട്ടുമുണ്ട്.
മരിച്ചവരിൽ ഒരാൾ ബംഗ്ലാദേശ് പൗരനാണ്. അഗ്നിശമനസേന പത്തു മണിക്കൂർ പരിശ്രമിച്ച ശേഷമാണ് തീ കെടുത്താനായത്. കെട്ടിടത്തിന്റെ താഴത്തെ നിലയിൽ പ്രവർത്തിക്കുന്ന വർക്ക് ഷോപ്പിൽ നിന്നാണ് തീ പടർന്നത്. ജനങ്ങൾ തിങ്ങിപ്പാർക്കുന്ന നഗരമാണ് മാലി. ഇടുങ്ങിയ താമസസ്ഥലങ്ങളിലാണ് വിദേശ തൊഴിലാളികളടക്കം കഴിയുന്നത്.
മാല ദ്വീപിലെ ജനസംഖ്യയിൽ പകുതിയോളം പേർ വിദേശത്തു നിന്ന് ജോലിക്കെത്തിയവരാണ്. ബംഗ്ലാദേശ്, ഇന്ത്യ, നേപ്പാൾ, പാക്കിസ്ഥാൻ, ശ്രീലങ്ക എന്നീ രാജ്യങ്ങളിൽ നിന്നുള്ളവരാണ് കൂടുതലും.
