പരസ്പരം ബഹുമാനിക്കാന്‍ എക്‌സലന്‍സി, ഹിസ് ഹൈനസ്, ഹെര്‍ ഹൈനസ് എന്നീ ഇംഗ്ലീഷ് പ്രയോഗങ്ങളുടെ ആവശ്യമില്ല എന്നും പകരം ആദരണീയര്‍ എന്ന വിശേഷണം മതിയെന്നും മുന്‍ ഉപരാഷ്ട്രപതി വെങ്കയ്യ നായിഡു. തിരുവനന്തപുരത്തെ ശ്രീ ചട്ടമ്പിസ്വാമി സാംസ്‌കാരിക സമിതി ഏര്‍പ്പെടുത്തിയ ചട്ടമ്പിസ്വാമി സ്മൃതി പൂജാവര്‍ഷ പുരസ്‌കാരം പി എസ് ശ്രീധരന്‍ പിള്ളയ്ക്ക് സമ്മാനിക്കുന്ന ചടങ്ങിലാണ് വെങ്കയ്യ നായിഡുവിന്റെ പരാമര്‍ശം. ചടങ്ങില്‍ വെങ്കയനായിഡുവിനെയും, രാജകുടുംബാംഗത്തെയും ഇംഗ്ലീഷ് പദത്തില്‍ വിശേഷിപ്പിച്ചപ്പോഴാണ് ഉദ്ഘാടന പ്രസംഗത്തില്‍ അദ്ദേഹം പ്രതികരിച്ചത്.
2005 ല്‍ താന്‍ രാഷ്ട്രീയ പ്രവര്‍ത്തനം നിര്‍ത്തണമെന്ന് ചിന്തിച്ചിരുന്നതായും, 2005 ലെ തിരുവനന്തപുരം ഉപതെരഞ്ഞെടുപ്പിലെ ബിജെപിയുടെ ദയനീയ തോല്‍വിയുടെ സമയത്തായിരുന്നു ആ ചിന്തയെന്നും പി എസ് ശ്രീധരന്‍ പിള്ള പറഞ്ഞു. തന്നെ അന്ന് പിന്തിരിപ്പിച്ചത് ദേശീയ അധ്യക്ഷനായിരുന്ന എം വെങ്കയ്യ നായിഡുവായിരുന്നു, തുടരണം, തിരിച്ചടികള്‍ ഉണ്ടാകും, സത്യവും നീതിയും ജയിക്കുമെന്നായിരുന്നു ഉപദേശം, പിഎസ് ശ്രീധരന്‍പിള്ള പറഞ്ഞു.
മുന്‍ കേരള മുഖ്യമന്ത്രി അന്തരിച്ച ഉമ്മന്‍ചാണ്ടിയെയും ശ്രീധരന്‍ പിള്ള സ്മരിച്ചു. കേരളത്തിലെ ജന ശ്രദ്ധേയനായ നായകനാണ് ഉമ്മന്‍ ചാണ്ടിയെന്നും ജനമനസ്സുകളില്‍ അദ്ദേഹത്തിന് ഒന്നാം സ്ഥാനം തന്നെയാണ് ഉള്ളതെന്നും അദ്ദേഹം പറഞ്ഞു.
