അമിതഭാരവും ജീവിതശൈലി രോഗങ്ങളുടെ വർധനയും ഇന്ത്യ ഉൾപ്പെടെ 11 രാജ്യങ്ങളിലെ മരണ നിരക്ക് വർധിക്കുന്നതിന് കാരണമാകുന്നു എന്ന് ലോകാരോഗ്യ സംഘടന. പൊണ്ണത്തടിയും ജീവിതശൈലിയും കൊണ്ടുണ്ടാകുന്ന രോഗങ്ങൾ നിയന്ത്രിക്കാൻ സർക്കാരുകൾ ആരോഗ്യനയം പുന‍ഃക്രമീകരിക്കണമെന്നും ഡബ്ല്യുഎച്ച്ഒ ആവശ്യപ്പെട്ടു.
ഇന്ത്യ ഉൾപ്പെടെ തെക്കുകിഴക്കൻ ഏഷ്യൻ മേഖലയിലെ രാജ്യങ്ങളായ ഇന്തോനേഷ്യ, ബംഗ്ലദേശ്, മാലദ്വീപ്, ഭൂട്ടാൻ, മ്യാൻമർ, ശ്രീലങ്ക, തായ്‌ലൻഡ് എന്നിവിടങ്ങളിൽ 5 വയസ്സിനു താഴെയുള്ള പകുതിയിലധികം കുട്ടികളും അമിത ഭാരത്താൽ കഷ്ടപ്പെടുന്നവരാണ്. 5 മുതൽ 19 വയസ്സു വരെ പ്രായമുള്ള കുട്ടികളിൽ 37.3 ദശലക്ഷം പേർക്കും പൊണ്ണത്തടിയുണ്ട്. സാമ്പത്തിക വളർച്ച, അനാരോഗ്യകരമായ ഭക്ഷണക്രമം, വ്യായാമക്കുറവ്, ഉദാസീനമായ ജീവിതശൈലി എന്നിവയാണ് അമിതവണ്ണത്തിലേയ്ക്ക് നയിക്കുന്നതെന്ന് ലോകാരോഗ്യ സംഘടന ചൂണ്ടിക്കാട്ടി.
അമിതവണ്ണം ഹൃദ്രോഗം, പ്രമേഹം, അർബുദം തുടങ്ങിയവയ്ക്ക് കരണമാകുന്നതിനാൽ അത് നിയന്ത്രിക്കാൻ കുട്ടികളിലും മുതിർന്നവരിലും ആരോഗ്യകരമായ ഭക്ഷണക്രമവും വ്യായാമ ശീലവും പ്രോത്സാഹിപ്പിക്കണമെന്ന് സംഘടന ആവശ്യപ്പെട്ടു. ഒപ്പം അമിത അളവിൽ കൊഴുപ്പ് അടങ്ങിയ ആഹാരപദാർഥങ്ങൾ എന്നിവ നിരോധിക്കുകയും പഞ്ചസാര അടങ്ങിയ പാനീയങ്ങൾക്ക് അധികനികുതി ഏർപ്പെടുത്തുകയും വേണമെന്നും സംഘടന നിർദ്ദേശിക്കുന്നു.
