കത്തോലിക്കാ സഭയുടെ പരമാധ്യക്ഷൻ ഫ്രാൻസിസ് മാർപ്പാപ്പയെ ആശുപത്രിയിൽ പ്രവേശിപ്പിച്ചു. ശ്വാസ കോശത്തിൽ അണുബാധ കണ്ടെത്തിയതിനെ തുടർന്നാണ് അദ്ദേഹത്തെ ആശുപത്രിയിൽ പ്രവേശിപ്പിച്ചതെന്ന് വത്തിക്കാൻ അറിയിച്ചു. ചികിത്സയുടെ ഭാഗമായി ഏതാനും ദിവസങ്ങൾ മാർപ്പാപ്പക്ക് ആശുപത്രിയിൽ തുടരേണ്ടി വരുമെന്നാണ് റിപ്പോർട്ടുകൾ.
ഏതാനും ദിവസങ്ങളായി ശ്വാസമെടുക്കാൻ അദ്ദേഹം പ്രയാസപ്പെട്ടിരുന്നു. ഇതേ തുടർന്നാണ് വിദഗ്ധ ചികിത്സക്കായി ആശുപത്രിയിൽ പ്രവേശിപ്പിച്ചതെന്ന് മാർപ്പാപ്പയുടെ വക്താവ് ബ്രുണി പ്രസ്താവനയിലൂടെ അറിയിച്ചു. പരിശോധനയിൽ 86കാരനായ പോപ്പിന് കോവിഡില്ലെന്നും അദ്ദേഹം കൂട്ടിച്ചേർത്തു.
അതേസമയം, അനാരോഗ്യത്തെ തുടർന്ന് ചികിത്സയിൽ കഴിയുന്നതിനാൽ വിശുദ്ധ വാര തിരുക്കർമ്മങ്ങളിൽ ഫ്രാൻസിസ് മാർപ്പാപ്പ പങ്കെടുക്കുമോ എന്നതിൽ വിശ്വാസികൾക്ക്‌ ആശങ്കയുണ്ട്. 2021 ൽ 10 ദിവസം ചികിത്സ നേടിയ ശേഷം ആദ്യമാണ് വീണ്ടും അദ്ദേഹത്തെ ആശുപത്രിയിൽ പ്രവേശിപ്പിക്കുന്നത്.
