പോപ്പുലര്‍ ഫ്രണ്ട് പ്രഖ്യാപിച്ച ഹര്‍ത്താലില്‍ സംസ്ഥാനത്തെ വിവിധ ഇടങ്ങളില്‍ വ്യാപക ആക്രമണം. തിരുവന്തപുരം, എറണാകുളം, കണ്ണൂര്‍ ജില്ലകളിലാണ് വ്യാപകമായി അക്രമസംഭവങ്ങള്‍ റിപ്പോര്‍ട്ട് ചെയ്തത്.
സ്വകാര്യവാഹനങ്ങള്‍ക്കും, കെഎസ്ആര്‍ടിസിക്കും നേരെ സമരാനുകൂലികള്‍ കല്ലെറിഞ്ഞു. കണ്ണൂര്‍ ജില്ലയില്‍ പത്രം കൊണ്ടുപോയ വാഹനത്തിനു നേരെയും ആക്രമണം ഉണ്ടായി. പെട്രോള്‍ ബോംബ് എറിഞ്ഞതായാണ് പോലീസ് സ്ഥിരീകരിച്ചിരിക്കുന്നത്. കടകമ്പോളങ്ങള്‍ ഉള്‍പ്പടെ ഉള്ളവ സമരക്കാര്‍ അടപ്പിച്ചു.
കൊല്ലം പള്ളിമുക്കില്‍ അസഭ്യം പറഞ്ഞ സമരക്കാരെ തടയാന്‍ ശ്രമിച്ച പോലീസ് ഉദ്യോഗസ്ഥരെ ഹര്‍ത്താല്‍ അനുകൂലികള്‍ ബൈക്കിടിച്ചു വീഴ്ത്തി.
ദേശീയ-സംസ്ഥാന നേതാക്കളെ എന്‍ഐഎ റെയ്ഡ് നടത്തി അറസ്റ്റ് ചെയ്തതില്‍ പ്രതിഷേധിച്ചായിരുന്നു സംസ്ഥാനത്തു പോപ്പുലര്‍ ഫ്രണ്ട്, ഹര്‍ത്താലിന് ആഹ്വാനം ചെയ്തത്. ആക്രമണങ്ങള്‍ തടയുവാന്‍ ആവശ്യമായ നടപടികള്‍ സ്വീകരിക്കണമെന്ന് സംസ്ഥാന പോലീസ് മേധാവി നിര്‍ദേശം നല്‍കിയിരുന്നു.
