അമേരിക്കയിൽ തപാൽമാർഗം ഗർഭഛിദ്ര ഗുളികകളുടെ വിതരണം വർധിക്കുന്നത് സ്ത്രീകളുടെ ആരോഗ്യത്തിന് ഗുരുതരമായ പ്രത്യാഘാതങ്ങൾ ഉണ്ടാക്കുമെന്ന് പുതിയ പഠന റിപ്പോർട്ട്. മതിയായ വൈദ്യപരിശോധനകളോ, ഡോക്ടറുടെ നേരിട്ടുള്ള നിരീക്ഷണമോ ഇല്ലാതെ ഇത്തരം മരുന്നുകൾ ഉപയോഗിക്കുന്നത് വലിയ അപകടസാധ്യതകൾക്ക് കാരണമാകുമെന്നും റിപ്പോർട്ട് മുന്നറിയിപ്പ് നൽകുന്നു.
അമേരിക്കയിലെ ചില സംസ്ഥാനങ്ങളിൽ ഗർഭഛിദ്രത്തിന് നിയന്ത്രണങ്ങൾ വന്നതോടെയാണ് ഗുളികകൾ തപാൽവഴി വിതരണം ചെയ്യുന്ന രീതി വ്യാപകമായത്. എന്നാൽ, ഗുളികകൾ ഉപയോഗിക്കുന്നതിനു മുൻപ് നടത്തേണ്ട സ്കാനിംഗ് ഉൾപ്പെടെയുള്ള പരിശോധനകൾ ഒഴിവാക്കപ്പെടുന്നത് ഗർഭധാരണത്തിലെ സങ്കീർണ്ണതകൾ തിരിച്ചറിയാൻ തടസ്സമാകുന്നു. ഇത് അമിത രക്തസ്രാവം ഉൾപ്പെടെയുള്ള അടിയന്തര സാഹചര്യങ്ങളിലേക്ക് നയിച്ചേക്കാമെന്ന് വിദഗ്ധർ ചൂണ്ടിക്കാട്ടുന്നു.
വീട്ടിലിരുന്ന് തനിയെ മരുന്ന് കഴിക്കുമ്പോൾ എന്തെങ്കിലും അടിയന്തര ആരോഗ്യപ്രശ്നങ്ങൾ ഉണ്ടായാൽ ഉടൻ വൈദ്യസഹായം ലഭിക്കാനുള്ള സാഹചര്യം പലർക്കും ഉണ്ടാകില്ല. ഗർഭാവസ്ഥയുടെ കൃത്യമായ സമയം മനസ്സിലാക്കാതെ മരുന്ന് കഴിക്കുന്നത് ഫലം നൽകാതിരിക്കാനോ, സങ്കീർണ്ണതകൾ വർധിപ്പിക്കാനോ കാരണമാകും. പലപ്പോഴും ഇത്തരം വിതരണങ്ങൾ കൃത്യമായ സുരക്ഷാമാനദണ്ഡങ്ങൾ പാലിക്കാതെയാണ് നടക്കുന്നത്.
