പ്രഥമ വനിതാ ഐപിഎല്‍ അടുത്ത വര്‍ഷം ആരംഭിച്ചേക്കുമെന്ന് റിപ്പോര്‍ട്ട്. 2023 മാര്‍ച്ചില്‍ ആദ്യ വനിതാ ഐപിഎല്‍ ആരംഭിക്കാനാണ് ബിസിസിഐ ശ്രമിക്കുന്നതെന്ന് ദേശീയ മാധ്യമങ്ങള്‍ റിപ്പോര്‍ട്ട് ചെയ്യുന്നു. രണ്ട് വിന്‍ഡോകളാണ് പരിഗണനയിലുള്ളത്. മാര്‍ച്ചിലാണ് കൂടുതല്‍ സാധ്യതയെങ്കിലും സെപ്തംബറും പരിഗണനയിലുണ്ട്.
ഇംഗ്ലണ്ട്, ഓസ്‌ട്രേലിയന്‍ ക്രിക്കറ്റ് ബോര്‍ഡുകളുമായും രാജ്യാന്തര ക്രിക്കറ്റ് കൗണ്‍സിലുമായും ബിസിസിഐ ചര്‍ച്ചകള്‍ നടത്തിയിരുന്നു. മാര്‍ച്ചില്‍ വനിതാ ഐപിഎലിനായി വിന്‍ഡോ ഒരുക്കണമെന്ന ആവശ്യം ബിസിസിഐ ഐസിസിക്ക് മുന്നില്‍ വച്ചിട്ടുണ്ട്. വനിതാ ഐപിഎല്‍ എന്ന ആശയത്തോട് ക്രിക്കറ്റ് ബോര്‍ഡുകള്‍ പോസിറ്റീവായാണ് പ്രതികരിച്ചത്.
ആറ് ടീമുകളുമായി ഐപിഎല്‍ ആരംഭിക്കാനാണ് ബിസിസിഐ ആലോചിക്കുന്നത്. രാജസ്ഥാന്‍ റോയല്‍സ്, കൊല്‍ക്കത്ത നൈറ്റ് റൈഡേഴ്‌സ്, ചെന്നൈ സൂപ്പര്‍ കിംഗ്‌സ് തുടങ്ങിയ ഐപിഎല്‍ ഫ്രാഞ്ചൈസികള്‍ക്ക് വനിതാ ടീം ഒരുക്കാന്‍ താത്പര്യമുണ്ടെന്നാണ് വിവരം.
