മിഷിഗണ്‍ സര്‍വ്വകലാശാലക്ക് പിന്നാലെ യുഎസിലെ ടെക്‌സസില്‍ ഷോപ്പിങ് മാളിലും വെടിവയ്പ്പ്. ടെക്‌സസിലെ എല്‍ പാസോയിലെ സിലോ വിസ്റ്റ മാളില്‍ ബുധനാഴ്ച വൈകിട്ടാണ് സംഭവം. വെടിവയ്പ്പില്‍ ഒരാള്‍ കൊല്ലപ്പെട്ടതായും മൂന്നു പേര്‍ക്ക് പരിക്കേറ്റതായും സ്ഥിരീകരിച്ചു.
ഷോപ്പിങ് മാള്‍ ആക്രമണത്തില്‍ രണ്ട് അക്രമികള്‍ ഉണ്ടായിരുന്നതായാണ് പോലീസിന്‍റെ നിഗമനം. ബുധനാഴ്ച വൈകിട്ട് മാളില്‍ എത്തിയ അക്രമികള്‍ തുടര്‍ച്ചയായി വെടിയുതിര്‍ക്കുകയായിരുന്നു. വെടിയേറ്റ ഒരാള്‍ തത്ക്ഷണം മരണപ്പെട്ടതായാണ് റിപ്പോര്‍ട്ട്. ഗുരുതരമായി പരിക്കേറ്റ മറ്റു മൂന്നു പേരെ ആശുപത്രിയില്‍ പ്രവേശിപ്പിച്ചതായി പോലീസ് അറിയിച്ചു. സംഭവത്തില്‍ ഒരു പ്രതിയെ പോലീസ് അറസ്റ്റ് ചെയ്തു.
“വെടിയുതിര്‍ത്തവരില്‍ ഒരാളെ കസ്റ്റഡിയിലെടുത്തിട്ടുണ്ട്. മറ്റൊരു പ്രതിക്കായുള്ള തിരച്ചില്‍ തുടരുകയാണ്,” -പോലീസ് വക്താവ് റോബര്‍ട്ട് ഗോമസ് പ്രതികരിച്ചു. വെടിവയ്പ്പിലേക്കു നയിച്ച കാരണത്തെക്കുറിച്ച് വിവരങ്ങളൊന്നും ലഭ്യമല്ല. 2019 -ലുണ്ടായ കൂട്ട വെടിവയ്പില്‍ 23 പേര്‍ കൊല്ലപ്പെടുകയും രണ്ട് ഡസനോളം പേര്‍ക്ക് പരിക്കേല്‍ക്കുകയും ചെയ്ത വാള്‍മാര്‍ട്ടിനോട് ചേര്‍ന്നുള്ള മാള്‍ ആണ് സിലോ വിസ്റ്റ.
