രാജ്യത്തെ ഏറ്റവും നീളം കൂടിയ ആറുവരി ഉയരപ്പാതയെന്ന ഖ്യാതി നേടാന്‍ അരൂർ – തുറവൂർ ദേശിയപാത. ഒറ്റത്തൂണിൽ 26 മീറ്റർ വീതിയിലുള്ള ആറുവരി ഉയരപ്പാതയുടെ നിര്‍മ്മാണം പുതുവര്‍ഷത്തില്‍ ആരംഭിക്കും. 12.752 കിലോമീറ്റർ നീളവും താഴെ നാലുവരിയിൽ സർവ്വീസ് റോഡും ഉള്‍പ്പടെ ആകെ 10 വരി ഗതാഗതത്തിനുള്ള സൗകര്യം. ദേശീയപാത 66- ലെ അരൂർ മുതൽ തുറവൂർ തെക്ക് വരെയുള്ള ഭാഗത്തിന്റെ വികസനമാണ് ഇങ്ങനെ വിസ്മയകരമാകുന്നത്.
ദേശീയപാതയുടെ വികസനത്തിന് ഏറ്റെടുക്കേണ്ട ഭൂമിയുടെ അതിര് നിർണ്ണയവും കല്ലിടീലും പൂർത്തിയായതായി എ.എം. ആരിഫ് എംപി ഫേസ്ബുക്കില്‍ കുറിച്ചു. 2023- ല്‍ നിര്‍മ്മാണം ആരംഭിക്കുന്ന പാതയുടെ നിര്‍മ്മാണം മൂന്നു വർഷത്തിനകം പൂർത്തിയാകുമെന്നാണ് പ്രതീക്ഷ. “സംസ്ഥാനത്ത് ദേശീയപാത വികസനത്തിന് 1082.07 ഹെക്ടർ ഭൂമിയാണ് ഏറ്റെടുക്കുന്നത്. 39,749 നിർമ്മിതികൾ പൊളിച്ചുമാറ്റേണ്ടതായി വരും. എന്നാൽ, അരൂർ – തുറവൂർ ഭാഗത്തെ ആറുവരി ഉയരപ്പാതക്കായി ഏറ്റെടുക്കേണ്ടിവരിക കഷ്ടിച്ച് ഒന്നേകാൽ ഏക്കർ ഭൂമി മാത്രം. അമ്പതിൽ താഴെ കെട്ടിടങ്ങൾ മാത്രമാണ് പൊളിക്കേണ്ടത്. നിലവിലെ 30 മീറ്ററിൽ തന്നെ ദേശീയപാത വികസനം സാധ്യമാകുന്നതിനാലാണിത്” – എംപി പറഞ്ഞു.
സംസ്ഥാനത്ത് 20 ഭാഗങ്ങളായാണ് ദേശീയപാത നിർമ്മിക്കുന്നത്. അതിൽ ഏറ്റവും ചെലവേറിയ ഭാഗമാണ് അരൂർ – തുറവൂർ. 1668.50 കോടി രൂപയ്ക്ക് മഹാരാഷ്ട്രയിലെ നാസിക് കേന്ദ്രമാക്കി പ്രവർത്തിക്കുന്ന അശോക് ബിൽകോൺ കമ്പനിയാണ് കരാർ ഏറ്റിരിക്കുന്നത്. അരൂർ – തുറവൂർ ഭാഗത്ത് നിലവിൽ നാലുവരിപ്പാതയുണ്ട്. അതിന്റെ നടുക്കാണ് കൂറ്റൻ തൂണ് നിർമ്മിക്കുക. തൂണിന്റെ ഇരുവശത്തേക്കും വിരിഞ്ഞുനിൽക്കുന്ന വിധത്തിലാകും ഉയരപ്പാതയുടെ നിർമ്മാണം. പാതയുടെ ഇരുവശത്തും ഒന്നര മീറ്റർ വീതം ഒഴിച്ചിടും. മൂന്നര മീറ്ററാണ് ഓരോ വരിയുടെയും വീതി. നടുക്ക് ഒരു മീറ്ററിന്റെ മീഡിയനുണ്ടാകും.
