സിറിയയിലെ രണ്ടാമത്തെ വലിയ നഗരമായ ആലപ്പോയുടെ ഭൂരിഭാഗവും വിമത സേന പിടിച്ചെടുത്തതായി റിപ്പോർട്ട്. യുകെ ആസ്ഥാനമായുള്ള മോണിറ്ററിംഗ് ഗ്രൂപ്പായ സിറിയൻ ഒബ്സർവേറ്ററി ഫോർ ഹ്യൂമൻ റൈറ്റ്സ് ആണ് ഇക്കാര്യം വെളിപ്പെടുത്തിയത്. ബുധനാഴ്ച ആക്രമണം ആരംഭിച്ചതിനുശേഷം 20 ലധികം സാധാരണക്കാർ ഉൾപ്പെടെ 277 പേർ കൊല്ലപ്പെട്ടതായി എസ്ഒഎച്ച്ആർ അറിയിച്ചു.
സിറിയൻ സർക്കാരിനെതിരായ വർഷങ്ങളിലെ ഏറ്റവും വലിയ ആക്രമണമാണിത്, 2016 ൽ സൈന്യം നിർബന്ധിതമായി പുറത്താക്കിയതിന് ശേഷം പ്രസിഡന്റ് ബഷാർ അൽ അസദിന്റെ സേനയ്ക്കെതിരെ പോരാടുന്ന വിമതർ ആദ്യമായി ആണ് ആലപ്പോ കീഴടക്കാൻ ശ്രമിക്കുന്നത്. ആലപ്പോയിലെ വിമാനത്താവളവും നഗരത്തിലേക്കുള്ള എല്ലാ റോഡുകളും അടച്ചതായി സൈനിക വൃത്തങ്ങൾ റോയിട്ടേഴ്സ് വാർത്താ ഏജൻസിയോട് പറഞ്ഞു.
കാര്യമായ പ്രതിരോധം നേരിടാതെ “ആലപ്പോയുടെ പകുതി” പിടിച്ചെടുക്കാൻ വിമതർക്ക് കഴിഞ്ഞുവെന്ന് എസ്ഒഎച്ച്ആർ ഡയറക്ടർ റാമി അബ്ദുൽ റഹ്മാൻ ശനിയാഴ്ച പുലർച്ചെ എഎഫ്പി വാർത്താ ഏജൻസിയോട് പറഞ്ഞു. ഭരണകൂട സേന പിൻവാങ്ങിയതിനാൽ ഒരു പോരാട്ടവും നടന്നിട്ടില്ലെന്നും വെടിവെയ്പ്പ് നടന്നിട്ടില്ലെന്നും അദ്ദേഹം കൂട്ടിച്ചേർത്തു. ബുധനാഴ്ച എച്ച്ടിഎസും സഖ്യകക്ഷികളും ആരംഭിച്ച ആക്രമണത്തെത്തുടർന്ന് ആലെപ്പോ, ഇഡ്ലിബ് പ്രവിശ്യകളിലെ നിരവധി പട്ടണങ്ങളിൽ തങ്ങൾ സ്ഥാനം വീണ്ടെടുത്തതായി സർക്കാർ സേന വെള്ളിയാഴ്ച അറിയിച്ചു.
2011 ൽ ജനാധിപത്യ അനുകൂല പ്രതിഷേധങ്ങൾ സർക്കാർ അടിച്ചമർത്തിയതിനെത്തുടർന്ന് പൊട്ടിപ്പുറപ്പെട്ട ആഭ്യന്തര യുദ്ധത്തിൽ അര ദശലക്ഷത്തിലധികം ആളുകൾ കൊല്ലപ്പെട്ടിരുന്നു.
