നൈജീരിയയിലെ അമേരിക്കൻ സ്ഥാപനങ്ങൾക്കു നേരെ ഭീകരാക്രമണത്തിന് സാധ്യതയുണ്ടെന്ന് മുന്നറിയിപ്പ് നൽകി യുഎസ് എംബസി. ഇറാനെതിരെയുള്ള അമേരിക്കയുടെയും ഇസ്രായേലിന്റെയും സൈനികനീക്കങ്ങൾക്കു പിന്നാലെയാണ് അതീവ ജാഗ്രതാനിർദേശം പുറപ്പെടുവിച്ചത്. തലസ്ഥാനമായ അബൂജയിലെ എംബസിയിലേക്കും ലാഗോസിലെ കോൺസുലേറ്റിലേക്കും യാത്ര ചെയ്യുന്നവർ പ്രത്യേക മുൻകരുതലെടുക്കണമെന്ന് അധികൃതർ ആവശ്യപ്പെട്ടു.
അതേസമയം, അമേരിക്കയുമായി ബന്ധമുള്ള സ്കൂളുകൾക്കും സ്ഥാപനങ്ങൾക്കും സുരക്ഷ വർധിപ്പിക്കാൻ നിർദേശമുണ്ട്. ആക്രമണ ഭീഷണിയുടെ കൂടുതൽ വിവരങ്ങൾ പുറത്തുവിട്ടിട്ടില്ലെങ്കിലും നൈജീരിയൻ സർക്കാർ രാജ്യത്തുടനീളം സുരക്ഷ ശക്തമാക്കിയിട്ടുണ്ട്. ഇറാന് പിന്തുണ നൽകുന്നവരുടെ പ്രതിഷേധപ്രകടനങ്ങൾ ഉണ്ടാകാൻ സാധ്യതയുള്ളതിനാൽ അതീവശ്രദ്ധ വേണമെന്ന് എംബസി വ്യക്തമാക്കി.
വടക്കൻ നൈജീരിയയിൽ ഇറാൻ അനുകൂലികളായ വലിയൊരു വിഭാഗം ജനങ്ങൾ പ്രതിഷേധവുമായി തെരുവിലിറങ്ങിയിട്ടുണ്ട്. ഇത്തരം പ്രകടനങ്ങൾ അക്രമാസക്തമാകാൻ സാധ്യതയുണ്ടെന്നാണ് രഹസ്യാന്വേഷണ വിഭാഗം നൽകുന്ന സൂചന. സംഘർഷസാധ്യത നിലനിൽക്കുന്നതിനാൽ നൈജീരിയയിലുള്ള തങ്ങളുടെ പൗരന്മാരോട് ആൾക്കൂട്ടങ്ങളിൽ നിന്ന് അകന്നുനിൽക്കാൻ അമേരിക്ക നിർദേശിച്ചു.
