ബെന്യാമിന്റെ പ്രശസ്ത നോവലായ ‘ആടുജീവിത’ത്തെ ആസ്പദമാക്കിയുള്ള ചിത്രത്തിന്റെ ആദ്യ പോസ്റ്റര്‍ പുറത്തുവിട്ടു. പൃഥ്വിരാജിനെ നായകനാക്കി ബ്ലെസി സംവിധാനം ചെയ്യുന്ന ചിത്രത്തിന്റെ പോസ്റ്ററാണ് പുറത്തുവിട്ടത്. എല്ലാ നിശ്വാസവും ഒരു പോരാട്ടമാണ് എന്ന ക്യാപ്ഷനോടെ പൃഥ്വിരാജ് തന്നെയാണ് പോസ്റ്റര്‍ പങ്കുവച്ചിരിക്കുന്നത്.
സൗദി അറേബ്യയിലെ ഇന്ത്യൻ കുടിയേറ്റതൊഴിലാളിയായ നജീബ് എന്ന കഥാപാത്രത്തെയാണ് ചിത്രത്തിൽ പൃഥ്വിരാജ് അവതരിപ്പിക്കുന്നത്. മരുഭൂമിയുടെ പശ്ചാത്തലത്തില്‍ ആടുകളുടെ ഇടയില്‍നില്‍ക്കുന്ന നായകനാണ് ആദ്യ പോസ്റ്ററിലുള്ളത്. കോവിഡ് മഹാമാരിയെതുടര്‍ന്ന് ചിത്രീകരണം നീണ്ടുപോയ ബ്ലെസിചിത്രത്തിന് 160 -നു മുകളില്‍ ദിവസങ്ങളാണ് ചിത്രീകരണത്തിന് വേണ്ടിവന്നത്.
അമല പോളാണ് ചിത്രത്തിലെ നായിക. ശോഭ മോഹനും ഒരു പ്രധാനപ്പെട്ട കഥാപാത്രത്തെ അവതരിപ്പിക്കുന്നുണ്ട്. എ.ആര്‍ റഹ്‌മാനാണ് ചിത്രത്തിന് സംഗീതം നിര്‍വഹിച്ചിരിക്കുന്നത്. കെ.എസ് സുനിലാണ് ഛായാഗ്രാഹകന്‍. പ്രശാന്ത് മാധവ് കലാസംവിധാനം നിര്‍വഹിക്കുന്ന ചിത്രത്തിന്റെ മേക്കപ്പ്മാന്‍ രഞ്ജിത്ത് അമ്പാടിയാണ്.
