ആഗോള കത്തോലിക്കാ സഭയുടെ തലവനായ ഫ്രാൻസിസ് മാർപാപ്പയ്ക്ക് ഇന്ന് 86 -ാം ജന്മദിനം. ഈ ദിനത്തിൽ ലോകമെമ്പാടുമുള്ള നിരവധി ആളുകളാണ് പാപ്പായ്ക്ക് പ്രാർത്ഥനകളും ആശംസകളുമായി എത്തുന്നത്.
1936 ഡിസംബർ മാസം 17-ാം തീയതി അർജന്റീനയുടെ തലസ്ഥാനമായ ബ്യൂണസ് ഐറിസിൽ മാരിയോ ഹൊസെയുടെയും റിജീന സിവോരിയുടെയും മകനായി ജോർജ് മരിയോ ബെർഗോളിയോ ജനിച്ചു. ഇറ്റലിയിൽ നിന്നും അർജന്റീനയിലേക്ക് കുടിയേറിയവരായിരുന്നു ഫ്രാൻസിസ് മാർപാപ്പയുടെ മാതാപിതാക്കൾ. രസതന്ത്രത്തിൽ ബിരുദം കരസ്ഥമാക്കിയ ജോർജ് മരിയോ 1958 മാർച്ച് 11-ാം തീയതി ജസ്യൂട്ട് സന്യാസ സഭയിൽ ചേർന്ന് വൈദികനാകാനുള്ള തന്റെ പഠനം ആരംഭിച്ചു. ചിലിയിൽ നിന്നും മാനവിക വിഷയങ്ങളിലുള്ള പഠനം പൂർത്തീകരിച്ചു 1963-ൽ അർജന്റീനയിൽ മടങ്ങിയെത്തിയ അദ്ദേഹം, സാൻ മിഗുവേലിലെ സാൻ ജോസ് കോളജിൽ നിന്നും തത്വശാസ്ത്രത്തിൽ ബിരുദപഠനവും പൂർത്തിയാക്കി.
1969 ഡിസംബർ 13-ാം തിയതിയാണ് ഹോർഹെ മാരിയോ ബർഗോളിയോ അർജൻറീനയിലെ ബ്യൂനസ് ഐരസിൽ പൗരോഹിത്യം സ്വീകരിച്ചത്. ഈശോസഭയിൽ ആദ്യകാല അജപാലന ശുശ്രൂഷയും സന്യാസ സമർപ്പണവും ജീവിച്ച ഫാദർ ബർഗോളിയോ 1973 -ൽ ഈശോസഭയുടെ അർജൻറീനയിലെ പ്രൊവിഷ്യൽ സുപ്പീരിയറായി സേവനമനുഷ്ഠിച്ചു. 1979 വരെ തൽസ്ഥാനത്തു തുടർന്നു. 1992 -ൽ അദ്ദേഹം ബ്യൂനസ് ഐരസ് അതിരുപതയുടെ സഹായമെത്രാനായും, തുടർന്ന് 1998 -ൽ മെത്രാപ്പോലീത്തയായും നിയമിതനായി. ബ്യൂനസ് ഐരസ് അതിരൂപതാദ്ധ്യക്ഷനായി പ്രവർത്തിക്കവെ ജോൺ പോൾ രണ്ടാമൻ പാപ്പായാണ് ആർച്ചുബിഷപ്പ് ബർഗോളിയോയെ കർദ്ദിനാൾ പദവിയിലേയ്ക്ക് ഉയർത്തിയത്.
2013-ൽ ബെനഡിക്ട് 16 -ാമൻ പാപ്പാ ഫെബ്രുവരി 28 -ന് സ്ഥാനത്യാഗം ചെയ്തതിനെ തുടർന്നാണ് മാർച്ച് 13 -ന് കർദ്ദിനാൾ ബർഗോളിയോ പാപ്പാ സ്ഥാനത്തേയ്ക്ക് തിരഞ്ഞെടുക്കപ്പെട്ടത്. ഈശോസഭയിൽ നിന്നും ലാറ്റിനമേരിക്കൻ രാജ്യങ്ങളിൽ നിന്നും മാത്രമല്ല, യൂറോപ്പിനു പുറത്തു നിന്നുമുള്ള ആദ്യത്തെ സഭാതലവനാണ് ഫ്രാൻസിസ് പാപ്പാ.
