പാക്കിസ്താനില്‍ ട്രെയിൻ പാളം തെറ്റിയുണ്ടായ അപകടത്തിൽ 25 പേർ മരിക്കുകയും 80 പേർക്ക് പരിക്കേൽക്കുകയും ചെയ്തു. കറാച്ചിയിൽ നിന്ന് റാവൽപിണ്ടിയിലേക്ക് പോയ ഹസാരാ എക്സ്പ്രെസാണ് സഹാറ റെയിൽവേ സ്റ്റേഷന് സമീപം പാളം തെറ്റിയത്.
ഞായറാഴ്ച ഉച്ചക്ക് ശേഷം പത്തു ബോഗികൾ പാളം തെറ്റിയാണ് അപകടം നടന്നത്. എന്നാൽ അപകട കാരണം വ്യക്തമല്ല. പരിക്കേറ്റവരുടെ എണ്ണം ഇനിയും ഉയരാൻ സാധ്യതയുണ്ടെന്നാണ് സൂചന. അപകടത്തിൽ പരുക്കേറ്റവരെ നവാബ്‌ഷായിലെ പീപ്പിൾസ് മെഡിക്കൽ ആശുപത്രിയിലേക്ക് മാറ്റി. സമീപ ആശുപത്രികളിലെല്ലാം എമർജൻസി പ്രോട്ടോക്കോള്‍ പ്രഖ്യാപിച്ചിട്ടുണ്ട്.
അതേസമയം സംഭവ സ്ഥലത്ത് രക്ഷാപ്രവർത്തനം തുടരുകയാണ്. പാകിസ്താൻ സൈന്യവും ദുരിതാശ്വാസ പ്രവർത്തനങ്ങളുമായി രംഗത്തുണ്ട്. കൂടുതൽ സൈന്യത്തെ ദുരന്ത സ്ഥലത്തേയ്ക്ക് വിളിച്ചിട്ടുണ്ട്.
