നൈജീരിയയില്‍ രണ്ടുകത്തോലിക്കാ വൈദികരെ ഇസ്ലാമിക ഭീകരര്‍ കൊലപ്പെടുത്തി. കഡുന, എഡോ സംസ്ഥാനങ്ങളിലാണു സംഭവം. ഫാ. വിറ്റസ് ബോറോഗോ, ഫാ. ക്രിസ്റ്റഫര്‍ ഒഡിയ എന്നിവരാണു കൊല്ലപ്പെട്ടത്. കഡുന അതിരൂപതയില്‍ സേവനമനുഷ്ഠിക്കുന്ന ഫാ. വിറ്റസ് ബോറോഗോ(50) ശനിയാഴ്ച കുജാമയിലെ ജയില്‍ ഫാമിലാണു കൊല്ലപ്പെട്ടത്. ഫാമിലെത്തിയ ഭീകരര്‍ ഇദ്ദേഹത്തെ വധിക്കുകയായിരുന്നു. കഡുന സ്റ്റേറ്റ് പോളിടെക്‌നിക്കിലെ കാത്തലിക് ചാപ്ലയിനാണ് ഫാ. വിറ്റസ്.
എഡോ സംസ്ഥാനത്തെ ഇകാബിഗ്‌ബോ സെന്റ് മൈക്കിള്‍ കത്തോലിക്കാ പള്ളിയിലെ റെക്ടറിയില്‍നിന്നാണു ഞായറാഴ്ച വൈകുന്നേരം ഫാ. ക്രിസ്റ്റഫര്‍ ഒഡിയ(41)യെ ഭീകരര്‍ തട്ടിക്കൊണ്ടുപോയി കൊലപ്പെടുത്തിയത്. ഓചി രൂപതാംഗമാണു ഫാ. ക്രിസ്റ്റഫര്‍.
