റഷ്യയും യുക്രൈനും തമ്മിലുള്ള വെടിനിർത്തൽ കരാർ ധാരണയിൽ. കഴിഞ്ഞ ദിവസം സൗദി അറേബ്യയിൽ നടത്തിയ യു എസ് – യുക്രൈൻ ചർച്ചകളാണ് ഫലം കണ്ടത്. യു എസ് നിർദേശിച്ച 30 ദിവസത്തെ അടിയന്തര വെടിനിർത്തൽ കരാർ അംഗീകരിക്കാൻ തയ്യാറാണെന്ന് യുക്രൈൻ സമ്മതിച്ചു. ഇതിനുശേഷം, ഇനി പന്ത് റഷ്യയുടെ കോർട്ടിലാണെന്ന് യു എസ് സ്റ്റേറ്റ് സെക്രട്ടറി മാർക്കോ റൂബിയോ പറഞ്ഞു.
യു എസിന്റെ ഈ നിർദേശം യുക്രൈൻ അംഗീകരിച്ചതോടെ സൈനികസഹായവും രഹസ്യാന്വേഷണ വിവരങ്ങൾ കൈമാറുന്നതും പുനരാരംഭിക്കാൻ തയ്യാറാണെന്ന് അമേരിക്കയും വ്യക്തമാക്കിയിട്ടുണ്ട്. സമാധാനം പുനഃസ്ഥാപിക്കാൻ തങ്ങൾ തയ്യാറാണെന്നും പോസിറ്റീവ് നിർദേശം അംഗീകരിക്കാൻ റഷ്യയെ ബോധ്യപ്പെടുത്തേണ്ടത് ഇനി അമേരിക്കയാണെന്നും യുക്രൈൻ പ്രസിഡന്റ് സെലെൻസ്കി പറഞ്ഞു.
ധാതുകരാറിൽ ഒപ്പുവയ്ക്കാനെത്തിയ സെലെൻസ്‌കിയും ട്രംപും തമ്മിലുള്ള കൂടിക്കാഴ്ച ഏറ്റുമുട്ടലിൽ അവസാനിച്ചിരുന്നു. ആ സംഭവത്തിനുശേഷം ഇരുരാജ്യങ്ങളും തമ്മിലുള്ള ആദ്യത്തെ ഔദ്യോഗിക കൂടിക്കാഴ്ചയായിരുന്നു ഇന്നലെ ജിദ്ദയിൽ നടന്നത്. സെലൻസ്കിയെ വീണ്ടും വൈറ്റ് ഹൗസിലേക്കു ക്ഷണിക്കുന്ന കാര്യം ആലോചിക്കുന്നുണ്ടെന്നും ട്രംപ് വ്യക്തമാക്കി.
