യുദ്ധം അവസാനിപ്പിക്കാനുള്ള സമാധാന ചർച്ചകളിലേക്ക് ഉക്രൈന് ക്ഷണം ലഭിച്ചിട്ടില്ലെന്നു വൃത്തങ്ങൾ. കീവ് പങ്കാളിത്തമില്ലാതെ ചർച്ച ചെയ്ത സമാധാനകരാർ അംഗീകരിക്കില്ലെന്ന് ഉക്രേനിയൻ പ്രസിഡന്റ് വോളോഡിമർ സെലെൻസ്‌കിയും
ആവർത്തിച്ച് പറഞ്ഞു. യു എസും റഷ്യയും തമ്മിലുള്ള ചർച്ചകളിലേക്ക് കീവിനെ ക്ഷണിച്ചിട്ടില്ലെന്ന് ഉക്രൈൻ സർക്കാരിന്റെ മുതിർന്ന വൃത്തങ്ങളിലാണ് അറിയിച്ചത്.
തിങ്കളാഴ്ച സൗദി അറേബ്യയിൽ നടക്കുന്ന ചർച്ചകളിൽ കീവ് പങ്കെടുക്കുമെന്ന് ഉക്രൈനിലേക്കുള്ള യു എസ് പ്രത്യേക പ്രതിനിധി കീത്ത് കെല്ലോഗ് പറഞ്ഞിരുന്നുവെങ്കിലും ഒരു പ്രതിനിധി സംഘവും പങ്കെടുക്കില്ലെന്ന് വൃത്തങ്ങൾ അറിയിച്ചു.
യൂറോപ്യൻ നേതാക്കളോടും ചർച്ചകളിൽ പങ്കുചേരാൻ ആവശ്യപ്പെട്ടിട്ടില്ല. പകരം തിങ്കളാഴ്ച പാരീസിൽ ഫ്രഞ്ച് പ്രസിഡന്റ് തിടുക്കത്തിൽ സംഘടിപ്പിച്ച ഒരു ഉച്ചകോടിയിൽ അവർ യോഗം ചേരും, കാരണം ഭൂഖണ്ഡം ചർച്ചകളിൽ നിന്ന് അകറ്റി നിർത്തപ്പെടുമെന്ന ആശങ്ക വർധിച്ചുവരികയാണ്.
ഉക്രൈനിലെ യുദ്ധത്തോടുള്ള വാഷിംഗ്ടണിന്റെ സമീപനത്തിൽ വലിയ മാറ്റമുണ്ടായതായി സൂചന നൽകിയ പ്രക്ഷുബ്ധമായ ആഴ്ചയെ തുടർന്നാണ് പ്രത്യേക കൂടിക്കാഴ്ചകൾ.
സംഘർഷം അവസാനിപ്പിക്കുന്നതിനായി അമേരിക്കയും റഷ്യയും തമ്മിലുള്ള ആദ്യ മുഖാമുഖ ചർച്ചകൾക്കായി ഞായറാഴ്ച വൈകുന്നേരം സൗദി അറേബ്യയിലേക്ക് പോകുകയാണെന്ന് വൈറ്റ് ഹൗസിന്റെ മിഡിൽ ഈസ്റ്റ് പ്രതിനിധി സ്റ്റീവ് വിറ്റ്കോഫ് സ്ഥിരീകരിച്ചു.
