പ്ലാസ്റ്റിക് മലിനീകരണം, സമുദ്രസംരക്ഷണം, ശുദ്ധവും ആരോഗ്യകരവും സുസ്ഥിരവുമായ പരിസ്ഥിതിക്കുള്ള അവകാശം എന്നിവ തമ്മിലുള്ള നിർണ്ണായക ബന്ധം അംഗീകരിക്കുന്ന ഒരു പ്രമേയം ഐക്യരാഷ്ട്ര സഭയുടെ മനുഷ്യാവകാശ കൗൺസിൽ ആദ്യമായി അംഗീകരിച്ചു. കൗൺസിലിന്റെ 58-ാമത് സെഷന്റെ അവസാന ദിവസം സമവായത്തിലൂടെ പാസ്സാക്കിയ ഈ പ്രമേയം അന്താരാഷ്ട്ര പരിസ്ഥിതി ഭരണത്തിൽ ഒരു സുപ്രധാന മാറ്റത്തെ അടയാളപ്പെടുത്തുന്നു.
പ്ലാസ്റ്റിക് ജീവിതചക്രത്തിലുടനീളം ഉണ്ടാകുന്ന പാരിസ്ഥിതികവും ആരോഗ്യപരവുമായ ദോഷങ്ങളോടുള്ള ആഗോള പ്രതികരണങ്ങളിൽ, മനുഷ്യാവകാശ ബാധ്യതകൾ സംയോജിപ്പിക്കേണ്ടതിന്റെ പ്രാധാന്യം യു എൻ അംഗരാജ്യങ്ങൾ കൂട്ടായി അംഗീകരിച്ച ആദ്യ സംഭവമാണിത്. പ്ലാസ്റ്റിക് മലിനീകരണം, കാലാവസ്ഥാ വ്യതിയാനം, ജൈവവൈവിധ്യ നഷ്ടം എന്നിവ ലോകസമുദ്രങ്ങളുടെ ആരോഗ്യത്തിനു ഭീഷണിയാണെന്ന് പ്രമേയത്തിൽ പറയുന്നു. കൂടാതെ, ഇത് അടിസ്ഥാന മനുഷ്യാവകാശങ്ങളെ അപകടത്തിലാക്കുന്നെന്നും പറയുന്നു.
സമുദ്ര ആവാസവ്യവസ്ഥയെ സംരക്ഷിക്കുന്നത് പാരിസ്ഥിതിക സന്തുലിതാവസ്ഥയ്ക്കു മാത്രമല്ല, മനുഷ്യന്റെ അന്തസും ക്ഷേമവും സംരക്ഷിക്കുന്നതിനും അത്യന്താപേക്ഷിതമാണ്. ആരോഗ്യകരമായ പരിസ്ഥിതിക്കുള്ള അവകാശത്തെക്കുറിച്ച് യു എൻ പ്രത്യേക റിപ്പോർട്ടറുടെ 2024 ഡിസംബറിലെ റിപ്പോർട്ട് ഇതിനെ ശക്തമായി സ്വാധീനിച്ചിട്ടുണ്ട്. സമുദ്ര നശീകരണവും പ്രകൃതിദുരന്തങ്ങളും ജനവിഭാഗങ്ങളെ ബാധിക്കുന്നുണ്ടെന്നും പ്രമേയം എടുത്തുകാണിച്ചു.
പ്ലാസ്റ്റിക്കിന്റെ ഉൽപാദനം, ഉപഭോഗം മുതൽ നിർമാർജനം വരെ നിർണ്ണായകവും ഏകോപിതവുമായ നടപടി സ്വീകരിക്കാൻ എല്ലാ സംസ്ഥാനങ്ങളോടും പ്രമേയം ആവശ്യപ്പെട്ടു. കൂടാതെ, ആവാസവ്യവസ്ഥയ്ക്കും ശുദ്ധജലത്തിനും മൈക്രോപ്ലാസ്റ്റിക് ഉയർത്തുന്ന ഭീഷണി ഉൾപ്പെടെ പ്ലാസ്റ്റിക് മലിനീകരണം സൃഷ്ടിക്കുന്ന ഭീകരത അംഗീകരിക്കുകയും ചെയ്തു.
