അമേരിക്കയിലെ മിഷിഗണ്‍ സ്റ്റേറ്റ് യൂണിവേഴ്സിറ്റിയില്‍ വെടിവയ്പ്പ്. തിങ്കളാഴ്ച രാത്രിയിലുണ്ടായ വെടിവയ്പ്പില്‍ മൂന്ന് വിദ്യാര്‍ത്ഥികള്‍ കൊല്ലപ്പെട്ടതായി സ്ഥിരീകരിച്ചു. സംഭവത്തില്‍ പരിക്കേറ്റ അഞ്ച് പേർ തലസ്ഥാനമായ ലാൻസിംഗിലെ ആശുപത്രിയില്‍ ചികിത്സയിലാണ്. ഇവരുടെ നില ഗുരുതരമാണെന്നാണ് വിവരം.
സര്‍വ്വകലാശാലയില്‍ മുഖംമൂടി ധരിച്ചെത്തിയ അക്രമി വിദ്യാര്‍ത്ഥികള്‍ക്കും അധ്യാപകര്‍ക്കും നേരെ വെടിയുതിര്‍ക്കുകയായിരുന്നു. ഏകദേശം 43 വയസ് പ്രായം തോന്നിക്കുന്ന തോക്കുധാരിക്ക് സർവ്വകലാശാലയുമായി യാതൊരു ബന്ധവുമില്ലെന്ന് കാമ്പസ് വൃത്തങ്ങള്‍ അറിയിച്ചു. സര്‍വ്വകലാശാലയിലെ അക്രമത്തിനു ശേഷം ഈസ്റ്റ് ലാന്‍സിങ് കാമ്പസിലെ ബെര്‍ക്കി ഹാളിനു സമീപവും വെടിവയ്പ്പ് നടന്നു. രണ്ട് സംഭവത്തിനു പിന്നിലും ഒരാളാണെന്നാണ് പോലീസിന്റെ നിഗമനം.
ആക്രമണത്തിനു ശേഷം രക്ഷപെട്ട പ്രതിയെക്കുറിച്ചുള്ള വിവരങ്ങള്‍ ലഭ്യമല്ലെന്നും അക്രമിക്കു വേണ്ടിയുള്ള തിരച്ചില്‍ തുടരുകയാണെന്നും പോലീസ് അറിയിച്ചു. 2021 നവംബർ 30 -ന് മിഷിഗണിലെ ഓക്‌ലാൻഡ് കൗണ്ടിയിലെ ഓക്‌സ്‌ഫോർഡ് ഹൈസ്‌കൂളിൽ നടന്ന മാരകമായ കൂട്ട വെടിവയ്പ്പിന് ഏകദേശം 14 മാസങ്ങൾക്കു ശേഷമാണ് വീണ്ടും വെടിവയ്പ്പ് നടക്കുന്നത്. ഇന്ത്യയില്‍ നിന്നുള്ള വിദ്യാര്‍ത്ഥികളടക്കം പഠിക്കുന്ന സര്‍വ്വകലാശാലയാണ് മിഷിഗണ്‍.
