ജപ്പാനിലെ ഫുക്കുഷിമ ആണവനിലയത്തില്‍ സംഭരിച്ചിരിക്കുന്ന ഒരു ദശലക്ഷം മെട്രിക് ടണ്ണിലധികം ശുദ്ധീകരിച്ച ജലം കടലിലൊഴുക്കാന്‍ തീരുമാനമായി. ആഗസ്റ്റ് 24-ന് ജലം കടലിലേക്ക് ഒഴുക്കുമെന്ന് പ്രധാനമന്ത്രി ഫ്യൂമിയോ കിഷിദ ചൊവ്വാഴ്ച വ്യക്തമാക്കി. യു.എന്‍ ആണവസമിതിയുടെ അനുമതിയെ തുടര്‍ന്നാണ് ജലം ഒഴുക്കുന്നത്.
“ന്യൂക്ലിയർ റെഗുലേഷൻ അതോറിറ്റി അംഗീകരിച്ച പ്ലാൻ അനുസരിച്ച്, വെള്ളം പുറന്തള്ളുന്നത് വേഗത്തിലാക്കാൻ ടെപ്‌കോയോട് ആവശ്യപ്പെട്ടിട്ടുണ്ട്. കാലാവസ്ഥ അനുകൂലമായാല്‍ ആഗസ്റ്റ് 24-ന് ജലം കടലിലേക്ക് ഒഴുക്കിവിടും” – പ്രധാനമന്ത്രി ഫ്യൂമിയോ കിഷിദ ചൊവ്വാഴ്ച രാവിലെ പറഞ്ഞു. ആണവനിലയത്തില്‍ സംഭരിച്ചുവച്ചിരിക്കുന്ന ജലം കടലിലേക്കൊഴുക്കാന്‍ വേണ്ട നടപടികള്‍ ജപ്പാന്‍ തുടര്‍ച്ചയായി നടത്തിയെങ്കിലും അന്താരാഷ്ട്ര ആണവോർജ്ജ സമിതിയുടെ (ഐ.എ.ഇ.എ) അനുമതിക്കായി കാത്തിരിക്കുകയായിരുന്നു. ഐ.എ.ഇ.എയുടെ വിശദമായ പഠനത്തില്‍, കടലിൽ ആണവ വികിരണസാധ്യത തീരെ ദുർബലമാണെന്നും പരിസ്ഥിതിക്ക് ആഘാതം വരില്ലെന്നും വ്യക്തമാക്കിയതോടെയാണ് ജലം കടലിലേക്കൊഴുക്കാന്‍ ഒരുങ്ങുന്നത്.
ടോക്കിയോ ഇലക്ട്രിക് പവര്‍ എന്ന സ്ഥാപനത്തിന്റെ ഉടമസ്ഥതയിലുള്ള ഫുക്കുഷിമായിലെ കൂറ്റൻ ടാങ്കിൽ 13 ലക്ഷം ടൺ ജലമാണ് സംഭരിച്ചിരിക്കുന്നത്. ഹൈഡ്രജൻ ഐസോടോപ്പ് ആയ ട്രിറ്റിയം ഒഴികെ അപകടകരമായ എല്ലാ വസ്തുക്കളും ഇതിൽനിന്നും വേർതിരിച്ചിട്ടുണ്ടെന്നും കമ്പനി വ്യക്തമാക്കിയിട്ടുണ്ട്.
