അധിനിവേശ വെസ്റ്റ്ബാങ്കിലുണ്ടായ ഇസ്രായേൽ പലസ്തീൻ സംഘർഷത്തിൽ എട്ട് പേരെ പോലീസ് അറസ്റ്റ് ചെയ്തു. തീവ്ര വലതുപക്ഷ ഇസ്രായേൽ കുടിയേറ്റക്കാരെയാണ് പോലീസ് അറസ്റ്റ് ചെയ്തത്.
കഴിഞ്ഞ ദിവസം നബ്‍ലുസിലെ ഹുവാര ഗ്രാമത്തിൽ ഇസ്രായേൽ കുടിയേറ്റക്കാർ ആക്രമണം നടത്തുകയായിരുന്നു.
പലസ്തീനികളുടെ 30ലേറെ കാറുകളും വീടുകളുമാണ് അക്രമത്തിൽ കത്തിനശിച്ചത്. സംഭവത്തിൽ ഒരാൾ കൊല്ലപ്പെടുകയും 390 പേർക്ക് പരിക്കേൽക്കുകയും ചെയ്തിരുന്നു. ഇതേ തുടർന്നാണ് എട്ടുപേരെ അറസ്റ്റ് ചെയ്തത്.
രണ്ട് ഇസ്രായേൽ പൗരന്മാരെ പലസ്തീനി യുവാവ് വെടിവെച്ചു കൊന്നതിനെ തുടർന്നാണ് ഇസ്രായേലി കുടിയേറ്റക്കാർ അഴിഞ്ഞാടിയത്.
തൊട്ടുമുമ്പത്തെ ദിവസം 11 പലസ്തീനികളെ ഇസ്രായേൽ സൈന്യം വെടിവച്ചു കൊലപ്പെടുത്തിയിരുന്നു. രണ്ടു മാസത്തിനിടെ 13 കുട്ടികൾ ഉൾപ്പെടെ 67 പലസ്തീനികളെയാണ് ഇസ്രായേൽ വെടിവെച്ചു കൊന്നത്.
