അതികഠിനമായ വേനല്‍ക്കാലത്തിലൂടെയാണ് നാം കടന്നുപോകുന്നത്. സൂര്യാഘാതം ഏല്‍ക്കുന്നതും, ഉഷ്ണകാലരോഗങ്ങളും പൊതുവെ വര്‍ധിച്ചുവരുന്ന സാഹചര്യമാണ് വേനൽക്കാലം. ഇങ്ങനെയുള്ള സമയങ്ങളില്‍ ശരീരം സുരക്ഷിതമാക്കുകയെന്നത് പ്രാധാന്യം അര്‍ഹിക്കുന്നതാകുന്നു. അതിനായി ചില ശ്രദ്ധിക്കാം.
ധാരാളം വെള്ളം കുടിക്കുക
ശരീരത്തില്‍ ജലാംശം നിലനിര്‍ത്തുകയെന്നതു തന്നെയാണ് വേനല്‍ക്കാലത്ത് ശ്രദ്ധിക്കേണ്ട കാര്യങ്ങളില്‍ പ്രധാനപ്പെട്ടത്. നിര്‍ജലീകരണം തടഞ്ഞ് ശരീരത്തെ തണുപ്പിക്കുന്നതിനായി ധാരാളം ശുദ്ധജലം കുടിക്കാം.
പഴവര്‍ഗങ്ങള്‍ കഴിക്കുന്നത് ശീലമാക്കുക
ധാരാളം വെള്ളം കുടിക്കുന്നതിനൊപ്പംതന്നെ ഭക്ഷണത്തില്‍ ഫലവര്‍ഗങ്ങള്‍ ഉള്‍പ്പെടുത്തുന്നതും ശരീരത്തെ തണുപ്പിക്കാന്‍ സഹായിക്കുന്നു. ഓറഞ്ച്, തണ്ണിമത്തന്‍ തുടങ്ങി ജലാംശം ധാരാളം അടങ്ങിയിട്ടുള്ള ഫലവര്‍ഗങ്ങള്‍ കഴിക്കുന്നത് നിര്‍ജലീകരണം ഒരു പരിധിവരെ തടയാന്‍ സഹായിക്കുന്നു.
മദ്യപാനം ഒഴിവാക്കുക
ശരീരത്തിലെ ജലാംശം എളുപ്പത്തില്‍ വലിച്ചെടുക്കാന്‍ മദ്യപാനം കാരണമാകുന്നു. അതിനാല്‍തന്നെ വേനല്‍ക്കാലത്തെ മദ്യപാനം പരമാവധി ഒഴിവാക്കാന്‍ ശ്രദ്ധിക്കുക. ഇത് ശരീരം പെട്ടെന്ന് വരണ്ടതാകാന്‍ കാരണമാകുന്നു.
പുറത്തേക്കിറങ്ങുമ്പോള്‍ ഈ വസ്ത്രങ്ങള്‍ ധരിക്കുക
ചൂട് കൂടിവരികയാണ്. അതിനാല്‍തന്നെ സില്‍ക്ക്, പോളിസ്റ്റര്‍ തുടങ്ങിയ വസ്ത്രങ്ങള്‍ ധരിക്കുന്നത് ഒഴിവാക്കി കോട്ടണ്‍ വസ്ത്രങ്ങള്‍ ധരിക്കുന്നത് ശീലമാക്കാം. ഇളംനിറത്തിലുള്ള വസ്ത്രങ്ങള്‍ ധരിക്കുക. കറുപ്പ് പോലുള്ള ഇരുണ്ട നിറത്തിലുള്ള വസ്ത്രങ്ങള്‍ ധരിക്കുന്നത് ചൂട് വേഗത്തില്‍ ആഗിരണം ചെയ്യുന്നതിന് കാരണമാകുന്നു.
