ഇറാനിൽ വ്യാജവും മാരകമായ രാസവസ്തുക്കൾ കലർന്നതുമായ ലഹരിമരുന്നുകളുടെ ഉപയോഗം മൂലം പ്രതിവർഷം 5000-ത്തിലധികം ആളുകൾ മരണപ്പെടുന്നതായി റിപ്പോർട്ട്. നിയമവിരുദ്ധ ലഹരിമരുന്നുകളിലെ മാരകമായ കൂട്ടുകളും മാലിന്യങ്ങളും രാജ്യത്ത് ഗുരുതരമായ പൊതുജനാരോഗ്യ പ്രതിസന്ധിയാണ് സൃഷ്ടിക്കുന്നതെന്ന് ഇറാന്റെ ഡ്രഗ് കൺട്രോൾ ഹെഡ്ക്വാർട്ടേഴ്സിലെ ഉന്നത ഉദ്യോഗസ്ഥൻ മുന്നറിയിപ്പ് നൽകി. ഇറാനിയൻ സ്റ്റുഡന്റ്സ് ന്യൂസ് ഏജൻസി (ISNA) ആണ് ഇത് സംബന്ധിച്ച വിവരങ്ങൾ പുറത്തുവിട്ടത്.
“വ്യാജ ലഹരിമരുന്നുകളുടെ ഉപയോഗം കാരണം രാജ്യത്ത് ഓരോ വർഷവും 7,000 ആളുകളാണ് മരണപ്പെടുന്നത്,” ഇറാന്റെ ഡ്രഗ് കൺട്രോൾ ഹെഡ്ക്വാർട്ടേഴ്സ് പ്രിവൻഷൻ ആൻഡ് ട്രീറ്റ്മെന്റ് ഡെപ്യൂട്ടി അമീർഹുസൈൻ യവാരി വ്യക്തമാക്കി. പരമ്പരാഗത ലഹരിമരുന്നുകളിൽ ചേർക്കുന്ന മാരകമായ രാസവസ്തുക്കളെക്കുറിച്ചും സിന്തറ്റിക് ലഹരിമരുന്നുകളെക്കുറിച്ചും ജനങ്ങൾക്കിടയിൽ കൃത്യമായ ബോധവൽക്കരണം നൽകിയാൽ മാത്രമേ ഇത്തരം മരണങ്ങൾ കുറയ്ക്കാൻ സാധിക്കൂ എന്നും അദ്ദേഹം കൂട്ടിച്ചേർത്തു.
അഫ്ഗാനിസ്ഥാനോട് ചേർന്നുകിടക്കുന്ന ഭൂമിശാസ്ത്രപരമായ സ്ഥാനം കാരണം ലോകത്തിൽ തന്നെ ഏറ്റവും രൂക്ഷമായ ലഹരിമരുന്ന് പ്രശ്നങ്ങളുള്ള രാജ്യങ്ങളിലൊന്നാണ് ഇറാൻ. അഫീം (Opium), ഹെറോയിൻ എന്നിവ ഇവിടെ വൻതോതിൽ ലഭ്യമാണ്. ഇറാന്റെ ഔദ്യോഗിക കണക്കുകൾ പ്രകാരം രാജ്യത്ത് ലഹരിമരുന്നിന് അടിമപ്പെട്ടവരുടെ എണ്ണം 38 ലക്ഷം കടന്നിരിക്കുകയാണ്. മുൻകാലങ്ങളിൽ അഫീം ആയിരുന്നു പ്രധാന വില്ലനെങ്കിൽ, ഇപ്പോൾ ഹെറോയിൻ, മെത്താംഫെറ്റാമൈൻ (Methamphetamine), മറ്റ് സിന്തറ്റിക് ലഹരിമരുന്നുകൾ എന്നിവയാണ് യുവാക്കൾക്കിടയിൽ വൻതോതിൽ പടരുന്നത്. ലങ്കാസ്റ്റർ സർവ്വകലാശാലയുടെ പഠനമനുസരിച്ച് ലഹരിമരുന്ന് മരണങ്ങളിൽ ഭൂരിഭാഗവും 37 വയസ്സിന് താഴെയുള്ള പുരുഷന്മാരാണ്.
