രാജ്യം ഏറെ പ്രതീക്ഷയോടെ ഉറ്റുനോക്കിയ ചന്ദ്രയാൻ-3 ദൗത്യം വിജയത്തിലേയ്ക്ക് കുതിക്കുകയാണ്. ലോകത്തിന്റെ മുഴുവൻ കണ്ണുകളും ഇന്ന് വൈകിട്ട് നടക്കുന്ന ചന്ദ്രയാന്‍ ദൗത്യത്തിന്റെ സോഫ്റ്റ് ലാൻഡിംഗിലേക്കാണ്. അതിന് ചില കാരണങ്ങളുണ്ട്. ആദ്യ കാരണം, ദൗത്യം വിജയിച്ചാല്‍ അമേരിക്ക, റഷ്യ, ചൈന എന്നിവയ്ക്കൊപ്പം സോഫ്റ്റ് ലാന്‍ഡിങ് നടത്തുന്ന നാലാമത്തെ രാജ്യമായി ഇന്ത്യ എണ്ണപ്പെടും. മറ്റൊരു കാരണം, ഇത്തവണ ചന്ദ്രയാൻ 3ന്റെ ലാൻഡിംഗ് ചുമതല ഒരു വനിതാ ശാസ്ത്രജ്ഞയുടെ കൈകളിലാണ് എന്നതാണ്. ഈ വനിതാ ശാസ്ത്രജ്ഞയെ നമുക്കൊന്നു പരിചയപ്പെടാം.
‘റോക്കറ്റ് വുമൺ’
ഇന്ത്യയുടെ റോക്കറ്റ് വുമൺ എന്നാണ് ഈ ബഹിരാകാശ ശാസ്ത്രജ്ഞയെ വിശേഷിപ്പിക്കുന്നത്. പേര് ഋതു കരിദാൽ ശ്രീവാസ്തവ. ചന്ദ്രയാന്‍ മൂന്നിന്‍റെ മിഷൻ ഡയറക്ടറായ ഋതുവാണ് ഈ ദൗത്യം മുന്നിൽ നിന്ന് നയിക്കുന്നത്. ഋതുവിന്റെ പേര് ഏറെക്കാലമായി സജീവ ചർച്ചാ വിഷയമാണെങ്കിലും, രാഷ്ട്രത്തിന്റെ സുപ്രധാന ദൗത്യത്തിന്റെ ഉത്തരവാദിത്വം ഏറ്റെടുത്തതോടെ ഈ പേര് ഒരിക്കൽ കൂടി ചർച്ചകളിൽ നിറയുകയാണ്. മംഗൾയാൻ ദൗത്യത്തിൽ തന്റെ കഴിവ് തെളിയിച്ച ഋതു, ചന്ദ്രയാൻ-3ലൂടെ മറ്റൊരു നേട്ടത്തിന് തുടക്കമിടുകയാണ്. മംഗൾയാൻ മിഷന്റെ ഡെപ്യൂട്ടി ഓപ്പറേഷൻസ് ഡയറക്ടറായിരുന്നു ഋതു. ചന്ദ്രയാൻ 2-ന്റെ മിഷൻ ഡയറക്ടറുടെ ചുമതല ഏറ്റെടുത്തതോടെയാണ് ഋതു ലോക ശ്രദ്ധയാകർഷിച്ചത്.
ഉത്തർപ്രദേശിലെ ലഖ്നൗവിലെ ഒരു ഇടത്തരം കുടുംബത്തിൽ ജനിച്ച ഋതു, ലഖ്നൗ സർവകലാശാലയിൽ നിന്ന് ഭൗതികശാസ്ത്രത്തിൽ എംഎസ്സി ബിരുദധാരിയാണ്. പിന്നീട് ഋതു ബാംഗ്ലൂരിലെ ഇന്ത്യൻ ഇൻസ്റ്റിറ്റ്യൂട്ട് ഓഫ് സയൻസിൽ പ്രവേശനം നേടി. ശാസ്ത്രത്തോടും ബഹിരാകാശ ദൗത്യങ്ങളോടുമുള്ള തികഞ്ഞ അഭിനിവേശമായിരുന്നു ഇതിനു പിന്നില്‍. വ്യത്യസ്ത ദൗത്യങ്ങളിലെ പങ്കാളിത്തത്തിലൂടെ രാജ്യത്തെ പ്രമുഖ ബഹിരാകാശ ശാസ്ത്രജ്ഞരുടെ പട്ടികയിൽ ഋതുവും ഇടംപിടിച്ചു. 1997 മുതലാണ് ഇവര്‍ ഐഎസ്ആർഒയിൽ പ്രവർത്തിച്ചു തുടങ്ങിയത്.
ദൗത്യങ്ങള്‍
മിഷൻ മംഗളയാൻ, മിഷൻ ചന്ദ്രയാൻ-2 എന്നിവയിൽ ഋതു കരിദാൽ സുപ്രധാന പങ്ക് വഹിച്ചിട്ടുണ്ട്. ഋതുവിന് ലഭിച്ച പുരസ്‌കാരങ്ങളുടെ പട്ടിക അവരുടെ നേട്ടങ്ങൾ പോലെ തന്നെ നീളുന്നു. ഡോ. എപിജെ അബ്ദുൾ കലാം യംഗ് സയന്റിസ്റ്റ് അവാർഡ്, മാർസ് ആർബിറ്റർ മിഷനുള്ള ഐഎസ്ആർഒ ടീം അവാർഡ്, എഎസ്ഐ ടീം അവാർഡ്, സൊസൈറ്റി ഓഫ് ഇന്ത്യൻ എയ്റോസ്പേസ് ടെക്നോളജി ആൻഡ് ഇൻഡസ്ട്രീസിന്റെ എയ്റോസ്പേസ് വുമൺ അച്ചീവ്മെന്റ് അവാർഡ് എന്നിങ്ങനെ നീളുന്നു ഇന്ത്യയുടെ റോക്കറ്റ് വുമൺ ഋതു കരിദാലിന്റെ നേട്ടങ്ങൾ.
