അജിനോമോട്ടോ കാൻസറിനു കാരണമാകുമോ?

ഭക്ഷണ പദാർത്ഥങ്ങളുടെ സ്വാദിനെ മെച്ചപ്പെടുത്തുന്നതിനായി ഉപയോഗിക്കുന്ന നമ്മുടെ സാധാരണ ഉപ്പുപ്പൊടി പോലെയുള്ള ഒരു രാസവസ്തു ആണ് അജിനോമോട്ടോ അഥവാ മോണോസോഡിയം ഗ്ലൂട്ടമേറ്റ് (MSG).

സാധാരണ ഭക്ഷണത്തിൽ MSG (അജിനോമോട്ടോ) അടങ്ങിയിട്ടുണ്ടോ?

ഗ്ലൂട്ടാമിക് ആസിഡിന്റെ സോഡിയം ലവണമാണ് മോണോ സോഡിയം ഗ്ലൂട്ടാമേറ്റ് (MSG). പ്രകൃതിയിൽ സുലഭമായി ലഭിക്കുന്ന അമിനോ ആസിഡാണ് ഗ്ളൂട്ടമേറ്റ്. തക്കാളി, പാർമസൻ ചീസ്, ഉരുളക്കിഴങ്ങുകൾ, കൂൺ, മറ്റ് പച്ചക്കറികൾ, പഴങ്ങൾ എന്നിവയിൽ സ്വാഭാവികമായി ഉണ്ടാകുന്ന MSG ധാരാളം അടങ്ങിയിട്ടുണ്ട്.

‘അഞ്ചാമത്തെ രുചി’എന്ന് ജപ്പാൻ കാർ വിളിക്കുന്ന ഉമാമി രുചി ലഭിക്കാനുള്ള ഒരു ഫ്ലേവർ എൻഹാൻസറായി ഇത് ഉപയോഗിക്കുന്നു. ഇത് ഭക്ഷണത്തിന്റെ മാംസളമായ, രുചികരമായ സ്വാദിന് കാരണമാകുന്നു. കൊറിയൻ, ജാപ്പനീസ്, ചൈനീസ് വിഭവങ്ങളിൽ MSG ധാരാളമായി ഉപയോഗിക്കപെടുന്നു

ചില്ലി ചിക്കൻ, ചില്ലി പനീർ, ഫ്രൈഡ് റൈസ്, ചൗ മെയിൻ, ചിക്കൻ സൂപ്പ്, ചിക്കൻ മഞ്ചൂറിയൻ തുടങ്ങിയ ചൈനീസ് വിഭവങ്ങളുടെ രുചി വർദ്ധിപ്പിക്കാൻ ‘അജിനോമോട്ടോ TM’ എന്ന വ്യാപാര നാമത്തിൽ ലഭ്യമായ MSG ഉപയോഗിക്കുന്നു.

MSG (അജിനോമോട്ടോ) ഉപയോഗിച്ച് രുചി കൂട്ടുന്ന സാധാരണ ഭക്ഷണ പദാർത്ഥങ്ങൾ

ഫാസ്റ്റ് ഫുഡുകൾ: വഴിയോരങ്ങളിൽ കണ്ടുവരുന്ന ചെറുകിട കച്ചവടക്കാർ മുതൽ പ്രമുഖ ഫാസ്റ്റ്ഫുഡ് ശൃംഖലകളും അവരുടെ ഉൽപ്പന്നങ്ങളിൽ MSG ഉപയോഗിക്കുന്നു.

ഇൻസ്റ്റന്റ് നൂഡിൽസ് ഉൽപ്പന്നങ്ങൾ: നിരവധി ഇൻസ്റ്റന്റ് നൂഡിൽസ് ഉൽപ്പന്നങ്ങളിലും പാസ്ത ബ്രാൻഡുകളിലും അവയുടെ രുചിയും ഷെൽഫ് ലൈഫും മെച്ചപ്പെടുത്താൻ MSG ഉപയോഗിക്കുന്നു.

സോയ സോസ്, കെച്ചപ്പ്, ബാർബിക്യൂ സോസ്, മയോന്നൈസ്, ചില സാലഡ് ഡ്രെസ്സിംഗുകൾ എന്നിവയും മറ്റും ഇതിൽ ഉൾപ്പെടുന്നു.

സൂപ്പുകൾ: ഇൻസ്റ്റന്റ് നൂഡിൽസ് പോലെ, ഇൻസ്റ്റന്റ് സൂപ്പുകളും ടിന്നിലടച്ച സൂപ്പുകളിലും സ്വാദ് വർധിപ്പിക്കുന്നതിനായി MSG ഉപയോഗിക്കുന്നു.

ശീതീകരിച്ച ഭക്ഷണം: ശീതീകരിച്ച ഭക്ഷണങ്ങളിൽ MSG അടങ്ങിയിട്ടുണ്ട്.

ചിപ്സും മറ്റ് സ്നാക്സും: മോണോ സോഡിയം ഗ്ലൂട്ടാമേറ്റ് അടങ്ങിയ ചില ഉൽപ്പന്നങ്ങളാണ് ചിപ്സുകളും മറ്റു സ്നാക്സുകളും. പാക്കറ്റ് ഭക്ഷണസാധനങ്ങളിലും അതിന്റെ ഗുണമേന്മ നിലനിർത്താൻ MSG ഉൾപ്പെടുത്തുന്നു. കടയിൽ നിന്നും വാങ്ങുന്ന പാക്കറ്റ് ഭക്ഷണപദാർഥങ്ങളിൽ MSG ഉണ്ടോ ഇല്ലയോ എന്നറിയാൻ അവയുടെ ചേരുവകളുടെ ലിസ്റ്റ് പരിശോധിച്ചാൽ അറിയുവാൻ കഴിയും.

ആരോഗ്യത്തെ ദോഷകരമായി ബാധിക്കുന്നുണ്ടോ?

മോണോ സോഡിയം ഗ്ലൂട്ടാമേറ്റിന്റെ ഉപയോഗത്തെക്കുറിച്ച് അറിയുന്നതുപോലെ തന്നെ, ഇത് നമ്മുടെ ആരോഗ്യത്തെ ദോഷകരമായി ബാധിക്കുന്നുണ്ടോ എന്നു നമുക്ക് പരിശോധിക്കാം .

യുഎസ് ഫുഡ് ആൻഡ് ഡ്രഗ് അഡ്മിനിസ്ട്രേഷൻ (യുഎസ്എഫ്ഡിഎ) MSG-യെ സുരക്ഷിതമായി പൊതുവെ (GRAS) അംഗീകരിക്കുന്നു. MSG യുടെ ഉപയോഗം ചിലരിൽ തലവേദന, ഓക്കാനം, ടാക്കികാർഡിയ, പെരുപ്പ് അനുഭവപ്പെടുക തുടങ്ങിയ അസ്വസ്ഥതകൾ ഉണ്ടാകുന്നതായി റിപ്പോർട്ട്‌ ചെയ്യപ്പെട്ടിട്ടുണ്ട് , ഇത് ‘ചൈനീസ് റെസ്റ്റോറന്റ് സിൻഡ്രോം’ എന്നറിയപ്പെടുന്നു. 1968 – ലാണ് ‘ചൈനീസ് റെസ്റ്റോറന്റ് സിൻഡ്രോം’ എന്ന വാക്കിന്റെ ആരംഭം. ഡോ. റോബർട്ട് ഹോ മാൻ ക്വോക്ക് എന്നയാളായിരുന്നു അതിനു പിന്നിൽ.1968-ൽ അദ്ദേഹം ‘ന്യൂ ഇംഗ്ലണ്ട് ജേണൽ ഓഫ് മെഡിസി’ന് ഒരു കത്ത് എഴുതി. ആ കത്തിൽ ചൈനീസ് ഭക്ഷണം കഴിച്ചതിന് ശേഷം താൻ അനുഭവിച്ച ചില നെഗറ്റീവ് ലക്ഷണങ്ങൾ അദ്ദേഹം വിവരിക്കുകയും അതിന് ‘ചൈനീസ് റെസ്റ്റോറന്റ് സിൻഡ്രോം’ എന്ന് പേരിടുകയും ചെയ്തു. എന്നിരുന്നാലും ഡോ. റോബർട്ട് തന്റെ വ്യക്തിപരമായ അനുഭവത്തിന്റെ വെളിച്ചത്തിൽ രൂപം നൽകിയ ‘ചൈനീസ് റെസ്റ്റോറന്റ് സിൻഡ്ര’ത്തിനു ശാസ്ത്രീയമായി വലിയ അടിത്തറയില്ല. പല ശാസ്ത്രീയ പഠനങ്ങളും ഇതും MSG യുമായി യാതൊരു ബന്ധവും ഇല്ല എന്നാണ് സൂചിപ്പിക്കുന്നത്

കൂടാതെ, മൊത്തം ജനസംഖ്യയുടെ ഒന്നു മുതൽ അഞ്ചു ശതമാനം പേർക്ക് മാത്രമേ എംഎസ്ജി അടങ്ങിയ ആഹാര പദാർത്ഥങ്ങൾ മൂലം ചൈനീസ് റെസ്റ്റോറന്റ് സിൻഡ്രോം ഉണ്ടാവുന്നുണ്ടാവാൻ സാധ്യത ഉള്ളു എന്ന് പഠനങ്ങൾ കാണിക്കുന്നു. പല ശാസ്ത്രജ്ഞരും മോണോ സോഡിയം ഗ്ലൂട്ടാമേറ്റ് ഭക്ഷണങ്ങളുടെ ഉപയോഗം അത്തരം പ്രശ്നങ്ങൾക്ക് കാരണമാകുമെന്ന് വിശ്വസിക്കുന്നില്ല.

എന്താണ് MSG-(അജിനോമോട്ടോ) യെക്കുറിച്ചുള്ള ഇന്ത്യൻ ഫുഡ് സേഫ്റ്റി ആൻഡ് സ്റ്റാൻഡേർഡ് അതോറിറ്റിയുടെ മാർഗ്ഗനിർദ്ദേശങ്ങൾ?

ഫുഡ് സേഫ്റ്റി ആൻഡ് സ്റ്റാൻഡേർഡ് അതോറിറ്റി ഓഫ് ഇന്ത്യ (FSSAI), ഇന്ത്യയിലെ ഭക്ഷ്യസുരക്ഷയും നിലവാരവും സംബന്ധിച്ച അപെക്സ് അതോറിറ്റി, MSG – യുമായി ബന്ധപ്പെട്ട ഒരു നിയന്ത്രണം രൂപീകരിച്ചു. FSSR-ന്റെ 2.2.1:1 റെഗുലേഷൻ ഇങ്ങനെയാണ്: “മുൻകൂട്ടി പാക്കേജുചെയ്ത ഭക്ഷണം ഏതെങ്കിലും ലേബലിലോ അല്ലെങ്കിൽ തെറ്റായതോ തെറ്റിദ്ധരിപ്പിക്കുന്നതോ വഞ്ചനാപരമോ ആയ അല്ലെങ്കിൽ അതിന്റെ സ്വഭാവത്തെക്കുറിച്ച് തെറ്റായ ധാരണ സൃഷ്ടിക്കാൻ സാധ്യതയുള്ള ഏതെങ്കിലും ലേബൽ രീതിയിലോ വിവരിക്കുകയോ അവതരിപ്പിക്കുകയോ ചെയ്യരുത്.” പ്രധാനമായി, USFDA നിയന്ത്രണങ്ങൾ സൂചിപ്പിക്കുന്നത്, ഭക്ഷണ സാമ്പിളിൽ ‘സ്വാഭാവികമായി ഉണ്ടാവുന്ന MSG’ ഉണ്ടെങ്കിൽ, നിർമ്മാതാക്കൾക്ക് ‘MSG അടങ്ങിയിട്ടില്ല’ എന്ന് ലേബൽ ചെയ്യാൻ സാധിക്കുന്നതല്ല എന്നാണ്.

FSSAI മാർഗ്ഗനിർദ്ദേശങ്ങൾ അനുസരിച്ച്, പാസ്തയിലും നൂഡിൽസിലും MSG ചേർക്കാൻ കഴിയില്ല. എഫ്എസ്എസ്എഐ ടിന്നിലടച്ച ഞണ്ടിന്റെ ഇറച്ചിയിൽ എംഎസ്ജിയുടെ അനുവദനീയമായ പരമാവധി പരിധി 500mg/kg ആയി നിശ്ചയിച്ചിട്ടുണ്ട്. എന്നിരുന്നാലും, ഭക്ഷണത്തിൽ സ്വാഭാവികമായി സംഭവിക്കുന്ന MSG യുടെ പരമാവധി പരിധിക്ക് നിലവിൽ മാർഗ്ഗനിർദ്ദേശങ്ങളൊന്നും നിലവിലില്ല.

വിവാദങ്ങളെക്കുറിച്ച് പറയുമ്പോൾ, മാഗിയിലെ മോണോസോഡിയം ഗ്ലൂട്ടാമേറ്റ് ബ്രാൻഡിനെ വലിയ കുഴപ്പത്തിലേക്ക് നയിച്ചതെങ്ങനെയെന്ന് നോക്കാം.

മാഗി നൂഡിൽസിലെ അജിനോമോട്ടോ വിവാദം

നെസ്ലെ കമ്പനിയുടെ പ്രോഡക്റ്റ് ആയ ‘മാഗി’ പ്രധാനമായും അറിയപ്പെടുന്നത് അതിന്റെ ഇൻസ്റ്റന്റ് നൂഡിൽസാണ്, ഇത് വർഷങ്ങളായി ഇന്ത്യക്കാർക്കിടയിൽ യുവാക്കളും മുതിർന്നവരും ഒരുപോലെ പ്രചാരം നേടിയിട്ടുണ്ട്. 2015ൽ ഉത്തർപ്രദേശിലെ (യുപി) ഫുഡ് സേഫ്റ്റി ആൻഡ് ഡ്രഗ് അഡ്മിനിസ്ട്രേഷൻ (എഫ്ഡിഎ) പരീക്ഷിച്ച മാഗി നൂഡിൽസിന്റെ രണ്ട് ഡസൻ പാക്കറ്റുകളിൽ ഉയർന്ന അളവിലുള്ള MSG കണ്ടെത്തിയതോടെ വിവാദം കത്തിപ്പടർന്നു.

സംസ്ഥാനത്ത് നിന്ന് ഉൽപ്പന്നത്തിന്റെ രണ്ടു ലക്ഷം പാക്കറ്റുകൾ തിരിച്ചുവിളിക്കാൻ സർക്കാർ നെസ്ലെയ്ക്ക് നോട്ടീസ് നൽകി. ഇത് മറ്റ് രണ്ട് സംസ്ഥാനങ്ങളെയും – ഗുജറാത്ത്, മഹാരാഷ്ട്ര – ഉൽപ്പന്നത്തിന്റെ പരിശോധന നടത്താൻ പ്രേരിപ്പിച്ചു. ഭാഗ്യവശാൽ സർക്കാരും നെസ്ലെയും തമ്മിലുള്ള പ്രശ്നങ്ങൾ അധികം വൈകാതെ രമ്യമായി പരിഹരിച്ചു. അതോടെ ഉപഭോക്താക്കൾക്ക് ആശ്വാസമായി.

Maggi® ഇവന്റിന് ശേഷം FSSAI നിയന്ത്രണ മാറ്റങ്ങൾ

വിവാദമായ മാഗി സംഭവത്തിന് ശേഷം, അത്തരം പ്രശ്നങ്ങളൊന്നും ഉണ്ടാകില്ലെന്ന് ഉറപ്പാക്കാൻ FSSAI ഭക്ഷ്യ നിയന്ത്രണങ്ങളിൽ ചില മാറ്റങ്ങൾ കൊണ്ടുവന്നു. 2016 മാർച്ച് 31-ന് എഫ്എസ്എസ്എഐ ഒരു ഉത്തരവ് പുറപ്പെടുവിച്ചു, നൂഡിൽസിനും പാസ്തയ്ക്കും സീസണിങ് ന് MSG ഉപയോഗിക്കാൻ പാടില്ല എന്നതായിരുന്നു ഈ ഉത്തരവ്.

ജോയിന്റ് FAO/WHO എക്സ്പെർട്ട് കമ്മിറ്റി ഓൺ ഫുഡ് അഡിറ്റീവുകൾ (ജെഇസിഎഫ്എ), ഫുഡ് ആൻഡ് ഡ്രഗ് അഡ്മിനിസ്ട്രേഷൻ (എഫ്ഡിഎ), യൂറോപ്യൻ ഫുഡ് സേഫ്റ്റി അസോസിയേഷൻ (ഇഎഫ്എസ്എ) എന്നിവ പോലുള്ള ആരോഗ്യ അധികാരികൾ എംഎസ്ജിയെ പൊതുവെ സുരക്ഷിതമായി (GRAS ) അംഗീകരിച്ചിട്ടുണ്ട്

പ്രതിദിനം ശരീരഭാരത്തിന്റെ ഒരു പൗണ്ടിന് 14 മില്ലിഗ്രാംMSG (ഒരു കിലോഗ്രാമിന് 30 മില്ലിഗ്രാം) സ്വീകാര്യമായ പ്രതിദിന ഉപഭോഗവും (എഡിഐ) അവർ നിശ്ചയിച്ചിട്ടുണ്ട്. ഒരു സാധാരണ ഭക്ഷണക്രമം പിന്തുടരുന്ന ആളുകൾ സാധാരണയായി കഴിക്കുന്ന അളവിനേക്കാൾ വളരെ കൂടുതലാണിത്.

അജിനോമോട്ടോ ഉപയോഗം തലച്ചോറിന്റെ ആരോഗ്യത്തെ ബാധിക്കുമോ? 

തലച്ചോറിന്റെ പ്രവർത്തനത്തിൽ ഗ്ലൂട്ടാമേറ്റ് നിരവധി പ്രധാന പങ്ക് വഹിക്കുന്നു, ഇത് ഒരു ന്യൂറോ ട്രാൻസ്മിറ്ററായി പ്രവർത്തിക്കുന്നു. അതായത് സിഗ്നലുകൾ കൈമാറാൻ നാഡീകോശങ്ങളെ ഉത്തേജിപ്പിക്കുന്ന ഒരു രാസവസ്തു.

തലച്ചോറിലെ അമിതമായ ഗ്ലൂട്ടാമേറ്റിന്റെ അളവ് നാഡീകോശങ്ങളെ അമിതമായി ഉത്തേജിപ്പിക്കുകയും കോശങ്ങളുടെ മരണത്തിലേക്ക് നയിക്കുകയും ചെയ്യുന്നതിലൂടെ MSG മസ്തിഷ്ക ഡാമേജിന് കാരണമാകുമെന്ന് ചിലർ സംശയിച്ചിരുന്നു. എന്നാൽ ഡയറ്ററി ഗ്ലൂട്ടാമേറ്റ് നമ്മുടെ തലച്ചോറിൽ കാര്യമായ സ്വാധീനം ചെലുത്തില്ല. കാരണം അവയൊന്നും കുടലിൽ നിന്ന് രക്തത്തിലേക്ക് കടക്കുകയോ ഇനി കടന്നാൽ തന്നെ (Blood Brain Barrier) മസ്തിഷ്ക തടസ്സം മറികടന്നു തലച്ചോറിൽ എത്തുകയുമില്ല എന്ന് ഇന്ന് ശാസ്ത്രം തെളിയിച്ചിട്ടുമുണ്ട്

വാസ്തവത്തിൽ, ഒരിക്കൽ കഴിച്ചാൽ നമ്മുടെ കുടലിൽ MSG പൂർണ്ണമായും മെറ്റബോളിസ് ചെയ്യപ്പെടുമെന്ന് ഗവേഷണങ്ങൾ കാണിക്കുന്നു. അവിടെ നിന്ന്, അത് ഒന്നുകിൽ ഊർജ്ജ സ്രോതസ്സായി വർത്തിക്കുന്നു (മറ്റ് അമിനോ ആസിഡുകളായി പരിവർത്തനം ചെയ്യപ്പെടുന്നു); അല്ലെങ്കിൽ വിവിധ ബയോ ആക്റ്റീവ് സംയുക്തങ്ങളുടെ ഉത്പാദനത്തിൽ ഉപയോഗിക്കുന്നു.

നമ്മൾ ഉപയോഗിക്കുന്ന സാധാരണ ഉപ്പ് പോലെ ഒരു ടേസ്റ്റ് മേക്കർ ആണ് അജിനോ മോട്ടോ. കൂടുതൽ ആയാൽ സാധാരണ ഉപ്പ് പോലും ഹൈപ്പർ ടെൻഷൻ പോലെ പല രോഗങ്ങൾക്കും കാരണമാകും. എന്നാലും നമ്മൾ ഉപ്പ് ഉപയോഗം ഉപേക്ഷിക്കുന്നില്ല. അതുപോലെ തന്നെ അല്ലെങ്കിൽ അതിലും സേഫ് ആയി MSG നമുക്ക് ഉപയോഗിക്കാം. ഒരു ടേസ്റ്റ് മേക്കർ ആയി മാത്രം.

ഡോ. ജോജോ വി. ജോസഫ്
കാൻസർ സർജൻ കാരിത്താസ് കാൻസർ ഇൻസ്റ്റിറ്റ്യൂട്ട്