ഇന്ന് ദേശീയ വാക്സിനേഷന് ദിനം. മനുഷ്യന്റെ മെച്ചപ്പെട്ട ആരോഗ്യം മുന്നില്‍ കണ്ടു വാക്സിനുകളുടെ പ്രാധാന്യം വര്‍ധിപ്പിക്കുന്നതിനായാണ് എല്ലാ വര്‍ഷവും മാര്‍ച്ച് 16ന് വാക്സിനേഷന് ദിനമായി ആചരിക്കുന്നത്. മാരകമായ രോഗങ്ങളെ പ്രതിരോധിക്കാന്‍ വാക്സിനേഷന് എത്രത്തോളം ഫലപ്രദമാണെന്ന് ഈ ദിവസത്തിലൂടെ അവബോധം സൃഷ്ടിക്കുന്നു.
ചരിത്രം
1995ല്‍ പോളിയോമെലിറ്റസ് വൈറസിനെതിരെ ആയിരുന്നു രാജ്യത്തിന്റെ ആദ്യ പോരാട്ടം. പ്രതിവര്‍ഷം അരലക്ഷത്തോളം കുട്ടികളെ ബാധിച്ച പോളിയോയ്ക്കെതിരേ 1995 മാര്‍ച്ച് 16ന് വാക്സിനേഷന് ആരംഭിച്ചു. പിന്നീട് പ്രതിരോധ കുത്തിവെപ്പിന്റെ പ്രാധ്യാനത്തെ കുറിച്ച് ബോധവല്‍ക്കരിക്കാന്‍ എല്ലാ വര്‍ഷവും ആ ദിനം ദേശീയ വാക്സിനേഷന് ദിനമായി ആചരിക്കാന്‍ തുടങ്ങി. 2011ല്‍ ബംഗാളില്‍ നിന്നാണ് പോളിയോയുടെ അവസാന കേസ് റിപ്പോര്‍ട് ചെയ്യപ്പെട്ടത്. പിന്നീട്, ടെറ്റനസ്, മുണ്ടിനീര്‍, ടിബി തുടങ്ങിയ രോഗങ്ങള്‍ക്കെതിരെ വിവിധ വാക്സിനേഷന് ഡ്രൈവുകള്‍ ആരംഭിച്ചു. ദേശീയ പ്രതിരോധ ദിനവും മാര്‍ച്ച് 16ന് തന്നെയാണ്.
പ്രാധാന്യം
വാക്സിനേഷന് എടുക്കേണ്ടതിന്റെ ആവശ്യകത ഉയര്‍ത്തിക്കാട്ടുന്നതില്‍ ഈ ദിനം പ്രധാന പങ്ക് വഹിക്കുന്നു. പ്രതിരോധ കുത്തിവെപ്പ് മുന്‍കരുതലുകള്‍ എടുക്കുന്നതിനും ഉയര്‍ന്ന പ്രതിരോധ സംവിധാനത്തോടെ ആരോഗ്യത്തോടെ തുടരാന്‍ വ്യക്തികളെ പ്രോല്‍സാഹിപ്പിക്കുന്നതിനും ഈ വാക്സിനേഷന് ദിനം സഹായിക്കുന്നു. രോഗം വന്നതിന് ശേഷം ചികില്‍സിക്കുന്നതിലും നല്ലത് രോഗം വരാതെ തടയുക എന്നതാണ് വാക്സിനേഷന്റെ അടിസ്ഥാന തത്വം. മാരകമായ
രോഗങ്ങളില്‍ നിന്ന് സുരക്ഷിതത്തവും ഫലപ്രദമായ രീതിയില്‍ സ്വയം സംരക്ഷിക്കാനുള്ള പ്രാപ്തി ജനങ്ങള്‍ക്ക് നല്‍കുന്ന വൈദ്യശാസ്ത്രപരമായ ഒരു മാര്‍ഗവുമാണ് വാക്സിനേഷന്. ശരീരത്തിന്റെ സ്വാഭാവികമായ പ്രതിരോധത്തിന്റെ സാധ്യതകള്‍ ഉപയോഗപ്പെടുത്തിയാണ് ഇത് സാധ്യമാക്കുന്നത്. രോഗാണുക്കളെ പ്രതിരോധിക്കുന്നതിനും ശരീരത്തിന്റെ പ്രതിരോധ ശേഷി ഉയര്‍ത്തുന്നതിനും വാക്സിന് സഹായിക്കുന്നു.
ആദ്യ ആശയം
എഡ്വേര്‍ഡ് ജെന്നര്‍ എന്ന ബ്രിട്ടീഷ് ഡോക്ടറാണ് പ്രതിരോധ കുത്തിവെപ്പെന്ന ആശയത്തിന് പിന്നില്‍. ലോകമൊട്ടാകെ വസൂരി പടര്‍ന്നു പിടിച്ച കാലത്താണ് പ്രതിരോധം തീര്‍ക്കാന്‍ വാക്സിനുമായെത്തുന്നത്. കൗപോക്സ് അഥവാ ഗോവസൂരി പകര്‍ത്തുന്ന വൈറസ് ഉപയോഗിച്ചായിരുന്നു ആദ്യ വാക്സിന്റെ കണ്ടുപിടിത്തം. ‘വാക്സിനിയ’ എന്ന ലാറ്റിന്‍ പദത്തില്‍ നിന്നാണ് വാക്സിനേഷന് എന്ന വാക്ക് തന്നെ ഉണ്ടായത്. ഗോവസൂരി അല്ലെങ്കില്‍ പശുക്കളുമായി ബന്ധപ്പെട്ടത് എന്നാണ് വാക്സിന് എന്ന വാക്കിനര്‍ഥം. വസൂരി വാക്സിന് കണ്ടുപിടിച്ച അദ്ദേഹം തന്നെ വാക്സിന് എന്ന പേരിന്റെയും ഉപജ്ഞാതാവായി മാറി. ഇതോടെ മഹാമാരിക്കെതിരെ പ്രതിരോധം തീര്‍ത്ത ജെന്നര്‍ വാക്സിനേഷന്റെ പിതാവ് എന്നറിയപ്പെട്ടു.
ഈ വര്‍ഷത്തെ പ്രമേയം
‘വാക്സിന് പ്രയോജനം എല്ലാവര്‍ക്കും’ എന്നതാണ് ഈ വര്‍ഷത്തെ പ്രമേയം. വാക്സിനുകളെ കുറിച്ചുള്ള തെറ്റിദ്ധാരണകള്‍ അകറ്റി ആരോഗ്യ സംരക്ഷണത്തില്‍ വാക്സിനുകളുടെ പ്രാധാന്യത്തെ കുറിച്ചുള്ള ബോധവല്‍ക്കരണ ക്ളാസുകളും സെമിനാറുകളും ഈ ദിനത്തില്‍ സംഘടിപ്പിക്കുന്നു. സൗജന്യ വാക്സിനേഷന് ക്യാമ്പയിനുകളിലൂടെ സമൂഹത്തിന്റെ എല്ലാ തട്ടിലും വാക്സിന് ലഭ്യമാക്കുന്നു.
ഇന്ത്യയിലെ സുപ്രധാന വാക്സിനേഷന് പദ്ധതികള്‍
യൂണിവേഴ്‌സല്‍ ഇമ്മ്യൂണൈസേഷന്‍ പ്രോഗ്രാം (യുഐപി)
1978 ലാണ് ആരോഗ്യ കുടുംബക്ഷേമ മന്ത്രാലയം യൂണിവേഴ്‌സല്‍ ഇമ്മ്യൂണൈസേഷന്‍ പ്രോഗ്രാം അവതരിപ്പിക്കുന്നത്. 1989 ല്‍ ഇത് എല്ലാ സംസ്ഥാനങ്ങളിലെയും എല്ലാ ജില്ലകളെയും ഘട്ടം ഘട്ടമായി പരിഷ്‌കരിച്ചു. ബാസിലസ് കാല്‍മെറ്റ്-ഗുറിന്‍ വാക്സിന്, ഓറല്‍ പോളിയോ വാക്സിന്, ഹെപ്പറ്റൈറ്റിസ് ബി വാക്സിന്, ടെറ്റനസ്, മുതിര്‍ന്നവര്‍ക്കുള്ള ഡിഫ്തീരിയ (ടിഡി) വാക്സിന്, ഡിപിടി, ജെഇ വാക്സിന്, പിസിവി, റോട്ടവൈറസ് വാക്സിന്, പെന്റാവാലന്റ് വാക്സിന് എന്നിവയാണ് യുഐപിക്ക് കീഴില്‍ നല്‍കിയ വാക്‌സിനുകള്‍.
മിഷന്‍ ഇന്ദ്രധനുഷ്
കേന്ദ്ര ആരോഗ്യമന്ത്രിയായിരുന്ന ജെ പി നദ്ദയാണ് 2014 ഡിസംബര്‍ 25 ന് മിഷന്‍ ഇന്ദ്രധനുഷ് ആരംഭിച്ചത്. അടുത്ത അഞ്ചുവര്‍ഷത്തിനുള്ളില്‍ ഭാരതത്തിലെ 90 ശതമാനം കുട്ടികളിലും പ്രതിരോധ കുത്തിവയ്പ്പ് ലക്ഷ്യമിട്ടായിരുന്നു പദ്ധതി. ഡിഫ്തീരിയ, വില്ലന്‍ചുമ, ടെറ്റനസ്, പോളിയോ, ക്ഷയം, അഞ്ചാംപനി, മഞ്ഞപ്പിത്തം എന്നീ രോഗങ്ങളെ ചെറുക്കാനുള്ള മരുന്നുകളാണ് പദ്ധതി പ്രകാരം നല്‍കുന്നത്. കുട്ടികള്‍ക്കു പുറമെ ഗര്‍ഭിണികള്‍ക്കും പ്രതിരോധ കുത്തിവയ്പ്പ് നടത്തും. നേരത്തെ പ്രതിരോധ കുത്തിവയ്പ്പ് നടത്തിയപ്പോള്‍ വിട്ടുപോയ കുട്ടികളെയും ഉള്‍പ്പെടുത്തിയിട്ടുണ്ട്.
