നടി നിക്കോള്‍ കിഡ്മാന്‍ എഎഫ്‌ഐ ലൈഫ് അച്ചീവ്മെന്റ് അവാര്‍ഡിന് അര്‍ഹയായി. ശനിയാഴ്ച രാത്രി, ലോസ് ഏഞ്ചല്‍സിലെ ഐക്കണിക് ഡോള്‍ബി തിയറ്ററില്‍ നടന്ന ചടങ്ങില്‍, തന്റെ പ്രിയപ്പെട്ട സഹപ്രവര്‍ത്തകരുടെ സാന്നിധ്യത്തില്‍ അവര്‍ അവാര്‍ഡ് ഏറ്റുവാങ്ങി. സിനിമാ ലോകത്തിന് നിക്കോള്‍ കിഡമാന്‍ നല്‍കിയ സമാനതകളില്ലാത്ത സംഭാവനകള്‍ വേദിയില്‍ അനുസ്മരിക്കപ്പെട്ടു.
തിളങ്ങുന്ന സ്വര്‍ണ ഗൗണില്‍ അണിഞ്ഞൊരുങ്ങി, ‘ഡയമണ്ട്‌സ് ആര്‍ എ ഗേള്‍സ് ബെസ്റ്റ് ഫ്രണ്ട്’ എന്ന കാലാതീതമായ മെലഡിയുടെ അകമ്പടിയോടെ, അവള്‍ വേദിയിലേക്ക് പ്രവേശിച്ചപ്പോള്‍ ഇടിമുഴക്കം പോലുള്ള നിറഞ്ഞ കരഘോഷത്തോടെയാണ് കിഡ്മാനെ സുഹൃത്തുക്കളും സഹപ്രവര്‍ത്തകരും വരവേറ്റത്.
നടിയും നിര്‍മ്മാതാവുമാണ്, നിക്കോള്‍ മേരി കിഡ്മാന്‍. സിനിമയിലും ടെലിവിഷന്‍ പ്രൊഡക്ഷനുകളിലും നിരവധി വിഭാഗങ്ങളിലുള്ള പ്രവര്‍ത്തനത്തിന് പേരുകേട്ട അവര്‍ ലോകത്തിലെ ഏറ്റവും ഉയര്‍ന്ന പ്രതിഫലം വാങ്ങുന്ന നടിമാരുടെ പട്ടികയില്‍ സ്ഥിരമായി സ്ഥാനം പിടിച്ചിട്ടുണ്ട്. ഒരു അക്കാദമി അവാര്‍ഡ് , ഒരു ബാഫ്റ്റ അവാര്‍ഡ് , രണ്ട് പ്രൈംടൈം എമ്മി അവാര്‍ഡുകള്‍, ആറ് ഗോള്‍ഡന്‍ ഗ്ലോബ് അവാര്‍ഡുകള്‍ എന്നിവയുള്‍പ്പെടെ നിരവധി അംഗീകാരങ്ങള്‍ അവര്‍ നേടിയിട്ടുണ്ട്. AFI ലൈഫ് അച്ചീവ്മെന്റ് അവാര്‍ഡ് ലഭിക്കുന്ന ആദ്യത്തെ ഓസ്ട്രേലിയന്‍ അഭിനേതാവായും അവര്‍ മാറിയിരിക്കുകയാണിപ്പോള്‍.
കിഡ്മാന്‍ 1994 മുതല്‍ UNICEF ന്റെയും 2006 മുതല്‍ UNIFEM ന്റെയും ഗുഡ്വില്‍ അംബാസഡറായി സേവനമനുഷ്ഠിച്ചിട്ടുണ്ട്. 2006-ല്‍ അവരെ ഓര്‍ഡര്‍ ഓഫ് ഓസ്ട്രേലിയയുടെ കമ്പാനിയനായി നിയമിച്ചു. 1990 ല്‍ നടന്‍ ടോം ക്രൂസിനെ വിവാഹം കഴിച്ച കിഡ്മാന്‍ 2006 ല്‍ നാടോടി സംഗീത ഗായകന്‍ കീത്ത് അര്‍ബനെ വിവാഹം കഴിച്ചു. 2010-ല്‍ അവര്‍ ബ്ലോസം ഫിലിംസ് എന്ന നിര്‍മ്മാണ കമ്പനി സ്ഥാപിച്ചു. 2004 ലും 2018 ലും, ലോകത്തിലെ ഏറ്റവും സ്വാധീനമുള്ള 100 ആളുകളുടെ പട്ടികയില്‍ കിഡ്മാന്‍ ഇടം പിടിച്ചു. 2020 ല്‍ ന്യൂയോര്‍ക്ക് ടൈംസ് അവരെ 21-ാം നൂറ്റാണ്ടിലെ ഏറ്റവും മികച്ച അഭിനേതാക്കളില്‍ ഒരാളായി തിരഞ്ഞെടുത്തു.
