കവിയും വൈദികനും ജെയിംസ് ഒന്നാമൻ രാജാവിന്റെ റോയൽ ചാപ്ലെയ്നുമായിരുന്ന ജോൺ ഡൺ, ലണ്ടനിലെ സെന്റ് പോൾസ് കത്തീഡ്രലിന്റെ ഡീനായി നിയമിതനായത് 1621 നവംബർ 19 നായിരുന്നു. നാടകീയമായ പ്രസംഗശൈലിക്കും രൂപകങ്ങളുടെ ഉപയോഗത്തിലും അദ്ദേഹം പ്രശസ്തനായിരുന്നു. മതപരമായ കാര്യങ്ങളിൽ രാജാവിന്റെ നയങ്ങളെ പ്രതിരോധിക്കുന്നതിനോ, ക്ഷമാപണം നടത്തുന്നതിനോവേണ്ടി പ്രഭാഷണങ്ങൾ നടത്താനും രാജാവ് വിളിച്ചിരുന്നത് അദ്ദേഹത്തെയായിരുന്നു.
ഫുട്ബോൾ താരം പെലെ തന്റെ 29-ാം വയസ്സിൽ, കരിയറിലെ 1000 ഗോൾ തികച്ചത് 1969 നവംബർ 19 നാണ്. പ്രൊഫഷണൽ ഫുട്ബോളിൽ ഒരു താരം ആദ്യമായി ആയിരം ഗോളുകൾ തികച്ചതിന്റെ റെക്കോർഡ് പിറന്നതും പെലെയുടെ ഈ നേട്ടത്തോടു കൂടിയാണ്. ബ്രസീലിലെ റിയോ ഡി ജെനീറോയിലെ പ്രശസ്തമായ മാറക്കാന സ്റ്റേഡിയത്തിൽ പെലെയുടെ ഈ നേട്ടം നേരിൽകാണാൻ മുക്കാൽ ലക്ഷത്തോളം കാണികളുണ്ടായിരുന്നു. സാന്റോസ് എഫ്. സി. യും വാസ്കോ ഡ ഗാമയും തമ്മിൽ നടന്ന മത്സരത്തിലാണ് ചരിത്രം പിറന്നത്. കളിയുടെ 78-ാം മിനിറ്റിൽ ലഭിച്ച ഒരു പെനാൽറ്റി കിക്കിലൂടെയാണ് പെലെ 1000 ഗോൾ തികച്ചത്. പെലെയുടെ പ്രൊഫഷണൽ കരിയറിലെ 909-ാമത്തെ മത്സരമായിരുന്നു അത്.
ഐശ്വര്യ റായ് ലോകസുന്ദരി പദത്തിലെത്തിയത് 1994 നവംബർ 19 നായിരുന്നു. സൗത്ത് ആഫ്രിക്കയിലെ സൺ സിറ്റിയിൽവച്ചു നടന്ന മത്സരത്തിൽ 87 രാജ്യങ്ങളിൽ നിന്നുള്ള മത്സരാർഥികളെ പിന്തള്ളിയാണ് ഐശ്വര്യ റായ് ഒന്നാമതെത്തിയത്. 21 വയസ്സായിരുന്നു ലോകസുന്ദരിയാകുമ്പോൾ അവരുടെ പ്രായം. മിസ് വേൾഡിന്റെ 44-ാമത്തെ എഡിഷനിലാണ് ഐശ്വര്യ വിജയം നേടിയത്. 1966 ൽ ലോകസുന്ദരിയായി തെരഞ്ഞെടുക്കപ്പെട്ട റെയ്ത്ത ഫാരിക്കുശേഷം ഈ നേട്ടം സ്വന്തമാക്കുന്ന രണ്ടാമത്തെ ഇന്ത്യക്കാരിയാണ് അവർ.
