ഇന്ന്, മാര്‍ച്ച് 22 ന് ലോക ജലദിനം ആചരിക്കുകയാണ്. ‘ജലം സമൃദ്ധിയ്ക്കും സമാധാനത്തിനും’ എന്നതാണ് ഈ വര്‍ഷത്തെ തീം. ജലത്തിന്റെ പ്രാധാന്യത്തെകുറിച്ചും ആഗോളതലത്തില്‍ ജലത്തിന്റെ കുറവ് മൂലം ഉണ്ടാകുന്ന പ്രതിസന്ധിയെ കുറിച്ചും അവബോധം വളര്‍ത്താനാണ് ഈ ദിനം ആചരിക്കുന്നത്. 2030-ഓടെ എല്ലാവര്‍ക്കും വെള്ളവും ശുചിത്വവുമുള്ള പരിസരവും ലഭിക്കുക എന്ന സുസ്ഥിര വികസനം ലക്ഷ്യമിട്ട് കൊണ്ടാണ് ലോക ജലദിനം ആചരിക്കുന്നത്. ശുദ്ധജല സ്രോതസ്സുകള്‍ സുസ്ഥിരമായി കൈകാര്യം ചെയ്യുന്നതിന് പ്രോത്സാഹിപ്പിക്കാനും ഇതിന്റെ പ്രാധാന്യം ആളുകളില്‍ വളര്‍ത്താനും കൂടിയാണ് യുണൈറ്റഡ് നേഷന്‍സ് ലോക ജലദിനം ആചരിക്കുന്നത്.
കൂടാതെ ജലവുമായി ബന്ധപ്പെട്ട വിവിധ പ്രശ്‌നങ്ങളായ ജലമലിനീകരണം, ജലക്ഷാമം, അപര്യാപ്തമായ ജലം, ശുചിത്വമില്ലായ്മ തുടങ്ങിയവയിലേക്ക് ആളുകളുടെ ശ്രദ്ധ കൊണ്ട് വരാനും ഇതിനെതിരെ നടപടികള്‍ സ്വീകരിക്കാന്‍ പ്രാത്സാഹിപ്പിക്കുക എന്നതുമാണ് ലോക ജലദിനം ആചരിക്കുന്നതിന്റെ മറ്റൊരു ഉദ്ദേശം.
1992 ഡിസംബര്‍ 22 നാണ് യുഎന്‍ ജനറല്‍ അസംബ്ലി ലോക ജലദിനം ആചരിക്കാന്‍ തീരുമാനിച്ചത്. അന്ന് മുതലാണ് എല്ലാവര്‍ഷവും മാര്‍ച്ച് 22 ന് ലോക ജലദിനം ആചരിക്കാന്‍ ആരംഭിച്ചത്. 1993 നാണ് ആദ്യമായി ലോക ജലദിനം ആചരിച്ചത്.
ജീവന്റെ അമൃതാണ് ജലം എന്നാണ് അറിയപ്പെടുന്നത്. കുടിക്കുന്നത് മുതല്‍ വൃത്തിയാക്കുന്നത് വരെ ജലം ഇല്ലാതെ ആളുകള്‍ക്ക് ജീവിക്കാന്‍ കഴിയില്ല. ലോക ജനതയില്‍ ഭൂരിഭാഗം പേര്‍ക്കും വെള്ളം സുലഭമായി ലഭിക്കുമ്പോഴും കുടിവെള്ളത്തിന് പോലും ബുദ്ധിമുട്ടുന്ന ഒരു വലിയ വിഭാഗം ജനങ്ങളുണ്ട്. യുഎന്നിന്റെ കണക്കുകള്‍ പ്രകാരം ലോകത്ത് നാലില്‍ ഒരാള്‍ ശുദ്ധ ജലം ലഭിക്കാതെ ബുദ്ധിമുട്ടുന്നുണ്ട്. അതായത് ഏകദേശം 2 ബില്യണ്‍ ആളുകള്‍ ജലം ലഭിക്കാതെ ബുദ്ധിമുട്ടുകയാണ്.
ഏകദേശം 1.4 ദശലക്ഷം ആളുകള്‍ പ്രതിവര്‍ഷം മരിക്കുകയും 74 ദശലക്ഷം ആളുകള്‍ ശുദ്ധ വെള്ളത്തിന്റെ ക്ഷാമം, ശുചിത്വമില്ലായ്മ എന്നിവയുമായി ബന്ധപ്പെട്ട രോഗങ്ങളാല്‍ ബുദ്ധിമുട്ടുകയും ചെയ്യുന്നുണ്ട്. ഒഇസിഡിയുടെ കണക്കുകള്‍ അനുസരിച്ച്, 2050 ആകുമ്പോഴേക്കും ആഗോള ജലത്തിന്റെ ആവശ്യം 55 ശതമാനമായി വര്‍ദ്ധിക്കും. വിവിധ സംഘടനകളും സന്നദ്ധസംഘടനകളും വ്യക്തികളും ജലക്ഷാമം പരിഹരിക്കുന്നതിനും ജലസംരക്ഷണത്തിനുമായി ലോക ജലദിനം ആചരിക്കുന്നുണ്ട്.
ലഭ്യമായ ജലസ്രോതസ്സുകളെ കരുതലോടെ നമുക്ക് സംരക്ഷിക്കാം, സംഭരിക്കാം… മഴവെള്ളം ഒരുതുള്ളി പോലും കളയരുതെന്ന നിഷ്‌കര്‍ഷ നാം പുലര്‍ത്തണം. നമ്മുടെ ജീവനായും ഭാവി തലമുറയ്ക്കായും പരിസ്ഥിതിക്കും മറ്റു ജീവജാലങ്ങള്‍ക്കായും അമൂല്യമായ കുടിവെള്ളത്തെ നമുക്ക് പാഴാക്കാതിരിക്കാം..ജലം ജീവനാണ്..
