ഫെബ്രുവരിയില്‍ തെക്കന്‍ യുക്രേനിയന്‍ നഗരമായ മെലിറ്റോപോളില്‍ എത്തിയപ്പോള്‍ റഷ്യന്‍ സൈന്യം അവിടുത്തെ നിവാസികളില്‍ നിന്ന് കടുത്ത പ്രതിരോധമാണ് നേരിട്ടത്. യുഎസ് ആസ്ഥാനമായുള്ള ഇന്‍സ്റ്റിറ്റ്യൂട്ട് ഫോര്‍ ദി സ്റ്റഡി ഓഫ് വാര്‍ അനുസരിച്ച്, മാര്‍ച്ച് പകുതി മുതല്‍ യുദ്ധം സജീവമായ ഒരു മേഖലയാണ്, മെലിറ്റോപോള്‍.
എന്നാല്‍ പട്ടാളക്കാരുടെ വാഹനവ്യൂഹം നഗരം കീഴടക്കാനായി എത്തിയപ്പോള്‍ അവരുടെ കവചിത വാഹനങ്ങള്‍ തടയാന്‍ നാട്ടുകാര്‍ ശ്രമിച്ചു, യുക്രേനിയന്‍ പതാകകള്‍ വീശി ആളുകള്‍ തെരുവുകളിലേയ്ക്ക് ഒഴുകിയെത്തി. ഫെബ്രുവരിയിലെ അധിനിവേശത്തിന്റെ തുടക്കത്തില്‍, മെലിറ്റോപോള്‍ നിവാസികള്‍ റഷ്യന്‍ സൈന്യത്തിന്റെ സാന്നിധ്യത്തിനെതിരെ ബഹുജന പ്രതിഷേധം സംഘടിപ്പിച്ചു. ആളുകള്‍ പതിവായി യുക്രേനിയന്‍ പതാകകളുമായി തെരുവിലിറങ്ങി.
റഷ്യക്കാര്‍ പ്രതിഷേധക്കാരെ അടിച്ചമര്‍ത്താന്‍ തുടങ്ങിയപ്പോള്‍, അവര്‍ ചെറുത്തുനില്‍പ്പ് വികസിപ്പിച്ചു, പിന്തുണയുമായി പുതിയ പുതിയ ഗ്രൂപ്പുകളും ഉയര്‍ന്നുവന്നു. മാര്‍ച്ച് 20 മുതല്‍ ഏപ്രില്‍ 12 വരെ പ്രതിഷേധക്കാര്‍ അവരുടെ രാത്രി പട്രോളിംഗിനിടെ ’70 റഷ്യന്‍ സൈനികരെ ഇല്ലാതാക്കി’ എന്ന് യുക്രെയ്‌നിലെ മിലിട്ടറി ഇന്റലിജന്‍സ് ഡയറക്ടറേറ്റ് റിപ്പോര്‍ട്ട് ചെയ്തു.
ഈ സംഘങ്ങള്‍ ഇപ്പോഴും ആക്രമണം തുടരുകയാണ്. കഴിഞ്ഞ ബുധനാഴ്ച ഒരു റഷ്യന്‍ കവചിത ട്രെയിന്‍ പാളം തെറ്റിയതായി റിപ്പോര്‍ട്ടുണ്ടായിരുന്നു. ദിവസങ്ങള്‍ക്ക് മുമ്പ് രണ്ട് റഷ്യന്‍ സൈനികരെ തെരുവില്‍ മരിച്ച നിലയില്‍ കണ്ടെത്തി. റഷ്യന്‍ സൈന്യത്തിന് സാധനങ്ങള്‍ എത്തിക്കാന്‍ ഉപയോഗിച്ചിരുന്ന മെലിറ്റോപോളിന് സമീപമുള്ള പാലം കഴിഞ്ഞ മാസം പൊട്ടിത്തെറിച്ചിരുന്നു.
മെലിറ്റോപോളിലെ പ്രതിഷേധ ഗ്രൂപ്പുകളാണ് ഈ ആക്രമണങ്ങള്‍ സംഘടിപ്പിച്ചതെന്ന് അവിടുത്തെ മേയര്‍ ഇവാന്‍ ഫെഡോറോവ് പറയുന്നു. ‘ഇത് ഞങ്ങളുടെ കക്ഷികളുടെയും രഹസ്യ സേവനങ്ങളുടെയും ഞങ്ങളുടെ സൈനികരുടെയും ജോലിയാണ്. അവര്‍ ഒരുമിച്ച് ഈ ജോലി ചെയ്യുന്നു,’ അദ്ദേഹം ബിബിസിയോട് പറഞ്ഞു. മിസ്റ്റര്‍ ഫെഡോറോവിനെയും റഷ്യന്‍ സൈന്യം തട്ടിക്കൊണ്ടുപോയിരുന്നു. പിന്നീട് തടവുകാരെ കൈമാറുന്നതിന്റെ ഭാഗമായി വിട്ടയയ്ക്കുകയാണ് ചെയ്തത്.
എന്നാല്‍ മെലിറ്റോപ്പോളിലെ എല്ലാ പ്രതിരോധങ്ങളെയും തകര്‍ക്കാന്‍ റഷ്യക്കാര്‍ തീവ്രമായി ശ്രമിക്കുന്നു. അവര്‍ വീടുകളില്‍ തിരച്ചില്‍ നടത്തുകയും ആളുകളെ തടങ്കലില്‍ വയ്ക്കുകയും ചെയ്യുന്നു.
മെലിറ്റോപോളിലെ ഒരു പ്രാദേശിക അഗ്‌നിശമന സേനയുടെ തലവന്‍ ബോറിസ് ക്ലെഷെവിനെ റഷ്യന്‍ സൈനിക യൂണിഫോമില്‍ എത്തിയവര്‍ തട്ടിക്കൊണ്ടുപോയി. രണ്ടാഴ്ച അവന്റെ ബന്ധുക്കള്‍ക്ക് അവനെക്കുറിച്ച് ഒരു വിവരവും കിട്ടിയില്ല. കുറച്ച് ദിവസങ്ങള്‍ക്ക് മുമ്പ്, ഒരു റഷ്യന്‍ അനുകൂല ടെലിഗ്രാം ചാനല്‍ മിസ്റ്റര്‍ ക്ലെഷെവും മറ്റ് യുക്രേനിയന്‍ പുരുഷന്മാരും റഷ്യന്‍ നീക്കങ്ങളെക്കുറിച്ചുള്ള വിവരങ്ങള്‍ യുക്രേനിയന്‍ സൈന്യവുമായി പങ്കിടുന്നുവെന്ന് സമ്മതിക്കുന്ന ഒരു വീഡിയോ പോസ്റ്റ് ചെയ്തു. അത് നിര്‍ബന്ധിത കുറ്റസമ്മതമാണെന്ന് വ്യക്തമായിരുന്നു. ഇത്തരം രീതിയില്‍ മെലിറ്റോപോളിലെ ചെറുത്തുനില്‍പ്പിനെ തകര്‍ക്കുക എന്നതാണ് അവരുടെ ലക്ഷ്യം. തങ്ങളെ പരസ്യമായി എതിര്‍ക്കുന്ന ആരെയും നിശബ്ദരാക്കാന്‍ റഷ്യന്‍ സൈന്യം ശ്രമിക്കുന്നു.
എന്നിരുന്നാലും, മെലിറ്റോപോള്‍ നിവാസികളില്‍ തൊണ്ണൂറു ശതമാനവും അവരുടേതായ രീതിയില്‍ ചെറുത്തുനില്‍ക്കുന്നു. പ്രാദേശിക പത്രപ്രവര്‍ത്തകയായ സ്വിറ്റ്ലാന സലിസെറ്റ്സ്‌ക പറയുന്നു. ചില ആളുകള്‍ റഷ്യന്‍ സൈനികരെ വെറുപ്പോടെ നോക്കുന്നു. മറ്റുള്ളവര്‍ രാത്രിയില്‍ ദേശഭക്തി ഗാനങ്ങള്‍ ആലപിക്കുന്നു. ചിലര്‍ യുക്രേനിയന്‍ പതാകകളുമായി തെരുവില്‍ പോസ്റ്ററുകള്‍ തൂക്കുന്നു, ചിലര്‍ റഷ്യന്‍ സൈനിക നീക്കങ്ങളെക്കുറിച്ചുള്ള വിവരങ്ങള്‍ കൈമാറുന്നു.
അധിനിവേശം തുടങ്ങി ഏതാനും ആഴ്ചകള്‍ക്കുശേഷം, പ്രതിഷേധം അടിച്ചമര്‍ത്താന്‍ റഷ്യയുടെ ദേശീയ ഗാര്‍ഡായ റോസ്ഗ്വാര്‍ഡിയയില്‍ നിന്നുള്ള പോലീസ് എത്തി. അവര്‍ ജനക്കൂട്ടത്തെ പിരിച്ചുവിടാനും പ്രവര്‍ത്തകരെ തടഞ്ഞുവയ്ക്കാനും തുടങ്ങി. എന്നാല്‍ ഇവിടെ ചെറുത്തുനില്‍പ്പിനെ പരാജയപ്പെടുത്തുന്നതിനും റാലികള്‍ നിര്‍ത്തുന്നതിനും കൂടുതല്‍ ഫോഴ്‌സ് ആവശ്യമാണെന്ന് റഷ്യന്‍ സൈന്യം മനസ്സിലാക്കി.
പക്ഷേ അധിനിവേശം എത്രത്തോളം നീണ്ടുനില്‍ക്കുന്നുവോ അത്രത്തോളം ആളുകള്‍ക്ക് ചെറുത്തുനില്‍ക്കാന്‍ പ്രയാസമാണ്. ചില ആളുകള്‍, അവരുടെ കുടുംബത്തെ പോറ്റാന്‍ പണമില്ലാതെ, ജോലിയിലേക്ക് മടങ്ങുന്നു. ഇത് പുതിയ റഷ്യന്‍ ഭരണകൂടത്തെ പിന്തുണയ്ക്കുന്നതായി സൂചിപ്പിക്കും.
‘മാരിയുപോളില്‍ അവര്‍ യുക്രേനിയക്കാരെ ശാരീരികമായി കൊല്ലുകയാണെങ്കില്‍, ഇവിടെ അവര്‍ ഞങ്ങളുടെ ആത്മാവിനെ തകര്‍ക്കാന്‍ ശ്രമിക്കുകയാണ്. എന്നാല്‍ അവര്‍ പരാജയപ്പെടും’. മെലിറ്റോപോള്‍ നിവാസിയായ ഐറിന എന്ന സ്ത്രീ പറയുന്നു.
