“ഒരു വ്യക്തി എത്ര ചെറുതാണെങ്കിലും ഒരു വ്യക്തിയാണ്…” (A person’s a person, no matter how small) — ലോകപ്രശസ്തമായ ഈ വാക്കുകളെ തന്റെ ജീവിതം കൊണ്ട് അന്വർത്ഥമാക്കുകയാണ് വൈൽഡിൻ ഔമോയ്ത്ത് എന്ന ഇരുപത്തിമൂന്നുകാരി. തടസ്സങ്ങളെയും പ്രതിസന്ധികളെയും തല്ലിയുടച്ച്, അവസരങ്ങൾ ഇല്ലാത്തിടത്ത് അവ സ്വയം സൃഷ്ടിച്ചെടുക്കുകയാണ് ഈ യുവതി. വെറും 72 സെന്റിമീറ്റർ (2 അടി 4 ഇഞ്ച്) മാത്രം ഉയരമുള്ള വൈൽഡിൻ ഇന്ന് രണ്ട് ഗിന്നസ് വേൾഡ് റെക്കോർഡുകൾക്ക് ഉടമയാണ്: ‘ലോകത്തിൽ സ്വയം നടക്കാൻ കഴിയാത്ത ഏറ്റവും ഉയരം കുറഞ്ഞ വനിത’, ഒപ്പം ‘ലോകത്തിലെ ഏറ്റവും ഉയരം കുറഞ്ഞ പ്രൊഫഷണൽ മോഡൽ’. എന്നാൽ ഈ റെക്കോർഡുകൾക്കപ്പുറം, അവൾ തന്റെ ജീവിതം മറ്റുള്ളവർക്കായി എങ്ങനെ ഉപയോഗിക്കുന്നു എന്നതിലാണ് യഥാർത്ഥ വിജയമുള്ളത്.
ഡോക്ടർമാരുടെ വിധി എഴുതി; ഇന്ന് ലോകം അത്ഭുതപ്പെടുന്നു
അമേരിക്കയിലെ മിയാമിയിൽ ഹെയ്തിയൻ ദമ്പതികളുടെ മകളായാണ് വൈൽഡിൻ ജനിച്ചത്. ‘SADDAN dysplasia’ എന്ന അപൂർവ്വയിനം കുള്ളൻ അവസ്ഥയുമായാണ് (Dwarfism) വൈൽഡിൻ ജനിച്ചത്. ഇതേത്തുടർന്ന് അവൾക്ക് സ്വന്തമായി നടക്കാൻ കഴിയില്ല. ഒരു മോട്ടറൈസ്ഡ് വീൽചെയറിന്റെ സഹായത്തോടെയാണ് വൈൽഡിൻ സഞ്ചരിക്കുന്നത്. 2003-ൽ അവൾ ജനിച്ച രാത്രിയിൽ, പിറ്റേന്ന് നേരം പുലരുന്നതുവരെ ഈ കുഞ്ഞ് ജീവിച്ചിരിക്കുമോ എന്ന് ഡോക്ടർമാർക്ക് പോലും ഉറപ്പില്ലായിരുന്നു. എന്നാൽ ആ വിധിയെഴുത്തുകളെയെല്ലാം കാറ്റിൽപ്പറത്തിക്കൊണ്ട് 23 വർഷങ്ങൾക്കിപ്പുറം അവൾ ജീവിക്കുക മാത്രമല്ല, ലോകത്തിന് തന്നെ മാതൃകയായി മാറിയിരിക്കുകയാണ്.
ഫാഷൻ റൺവേയിലെ വിപ്ലവം
2021 ഒക്ടോബർ 13-നാണ് ഗിന്നസ് ബുക്ക് വൈൽഡിനെ ലോകത്തെ ഏറ്റവും ഉയരം കുറഞ്ഞ, നടക്കാൻ കഴിയാത്ത വനിതയായി പ്രഖ്യാപിച്ചത്. അന്ന് അവൾ പറഞ്ഞത് തന്റെ ലക്ഷ്യം “തങ്ങളെപ്പോലെയുള്ള ചെറിയ മനുഷ്യരെ പ്രചോദിപ്പിക്കുക” എന്നതാണെന്നാണ്. ആ വാക്കുകൾ വെറുതെയായിരുന്നില്ല. 2023 സെപ്റ്റംബറിൽ ലോകത്തെ ഏറ്റവും ഉയരം കുറഞ്ഞ പ്രൊഫഷണൽ മോഡലായി അവൾ കിരീടം ചൂടി. പ്രശസ്തമായ ‘ന്യൂയോർക്ക് ഫാഷൻ വീക്കിൽ’ (New York Fashion Week) ‘റൺവേ ഓഫ് ഡ്രീംസിന്’ വേണ്ടി വൈൽഡിൻ വീൽചെയറിൽ റാംപ് വാക്ക് നടത്തി. സൗന്ദര്യവും ഫാഷനും ഒരിക്കലും നിശ്ചിത അളവുകളിൽ ഒതുങ്ങുന്നതല്ലെന്ന് അവൾ ലോകത്തിന് മുന്നിൽ തെളിയിച്ചു.
വിജയകിരീടത്തിൽ മറ്റൊരു പൊൻതൂവൽ കൂടി
ഇപ്പോഴിതാ തന്റെ വിജയപ്പട്ടികയിലേക്ക് മറ്റൊരു വലിയ നേട്ടം കൂടി വൈൽഡിൻ കൂട്ടിച്ചേർത്തിരിക്കുന്നു. വിർജീനിയയിലെ ലിബർട്ടി യൂണിവേഴ്സിറ്റിയിൽ നിന്ന് ഗ്രാഫിക് ഡിസൈനിംഗിൽ (Bachelor of Fine Arts) അവൾ ഉന്നത വിജയം നേടി ബിരുദധാരിയായിരിക്കുകയാണ്. “പഠനയാത്ര വളരെ നീണ്ടതായിരുന്നു, എങ്കിലും ഒടുവിൽ ലക്ഷ്യത്തിലെത്തിയപ്പോൾ ആ കഷ്ടപ്പാടുകളെല്ലാം സഫലമായതായി തോന്നുന്നു,” ഈ ഒരു നിമിഷത്തിൽ വൈൽഡിൻ ഔമോയ്ത്ത് പറയുന്നു. എന്നാൽ ഈ ബിരുദം അവളുടെ യാത്രയുടെ അവസാനമല്ല, മറിച്ച് ഒരു പുതിയ തുടക്കമാണ്. ‘ദി വൈൽഡ് ക്രിയേറ്റീവ് കോ’എന്ന പേരിൽ സ്വന്തമായി ഒരു ഫ്രീലാൻസ് ഡിസൈനിംഗ് ബിസിനസ്സ് അവൾ ആരംഭിച്ചുകഴിഞ്ഞു. ഒപ്പം തന്റെ മോഡലിംഗ് കരിയറും ശക്തമായി മുന്നോട്ട് കൊണ്ടുപോകാനാണ് അവളുടെ തീരുമാനം.
തന്റെ വൈകല്യങ്ങളെ അതിജീവിച്ചതിൽ മാത്രമല്ല വൈൽഡിൻ അഭിമാനിക്കുന്നത്. തന്റെ കറുത്ത വർഗ്ഗ പാരമ്പര്യത്തെയും ഹെയ്തിയൻ സംസ്കാരത്തെയും ആഫ്രിക്കൻ ഭൂഖണ്ഡവുമായുള്ള ആഴത്തിലുള്ള സാംസ്കാരിക ബന്ധത്തെയും അവൾ എപ്പോഴും അഭിമാനത്തോടെ ലോകവേദികളിൽ ഉയർത്തിപ്പിടിക്കുന്നു. തന്റെ ‘ലൈഫ് ഓഫ് വൈൽഡിൻ’ എന്ന യൂട്യൂബ് ചാനലിലൂടെ വൈകല്യമുള്ള മനുഷ്യരുടെ അവകാശങ്ങൾക്കായി അവൾ നിരന്തരം സംസാരിക്കുന്നു. കഴിവ് എന്നത് ഒരു പ്രത്യേക രൂപത്തിലോ വലുപ്പത്തിലോ വരുന്നതല്ലെന്ന് വൈൽഡിൻ നമ്മെ ഓർമ്മിപ്പിക്കുകയാണ്.
