അഫ്ഗാനിസ്ഥാനിൽ താലിബാൻ ഭരണകൂടം വീണ്ടും അധികാരം പിടിച്ചെടുത്തതിനു ശേഷം അവിടുത്തെ സ്ത്രീകളുടെയും പെൺകുട്ടികളുടെയും ജീവിതം പൂർണ്ണമായും ഇരുളടഞ്ഞ ഒരു കൂട്ടിലകപ്പെട്ടതുപോലെയായി മാറിയിരിക്കുകയാണ്. കഴിഞ്ഞ ഏതാനും വർഷങ്ങളായി താലിബാൻ പുറപ്പെടുവിച്ച നൂറിലധികം ക്രൂരമായ നിയമങ്ങൾ അഫ്ഗാൻ സ്ത്രീകളുടെ അടിസ്ഥാനപരമായ എല്ലാ സ്വാതന്ത്ര്യങ്ങളെയും ഇല്ലാതാക്കി. ഐക്യരാഷ്ട്രസഭ ഇതിനെ ‘ലിംഗ വിവേചനം’ എന്നാണ് വിശേഷിപ്പിക്കുന്നത്. അടുത്തിടെ താലിബാൻ പാസ്സാക്കിയ പുതിയ നിയമങ്ങളും ഉത്തരവുകളും അഫ്ഗാനിസ്ഥാനെ സ്ത്രീകളുടെ ശവപ്പറമ്പാക്കി മാറ്റുന്നതിന്റെ നേർക്കാഴ്ചകളാണ് പുറത്തുകൊണ്ടുവരുന്നത്.
ബാലവിവാഹവും നിയമവിധേയമാക്കിയ ക്രൂരതകളും
താലിബാൻ ഭരണകൂടം നടപ്പിലാക്കിയ ‘ഡിക്രി നമ്പർ 18’ (Decree No. 18) അഥവാ പങ്കാളികൾ തമ്മിലുള്ള വേർപിരിയലുമായി ബന്ധപ്പെട്ട പുതിയ നിയമം അഫ്ഗാൻ പെൺകുട്ടികളുടെ ജീവിതം തകർക്കുന്ന ഒന്നാണ്. ഈ നിയമപ്രകാരം പ്രായപൂർത്തിയാകാത്ത ഒരു പെൺകുട്ടിയെ വിവാഹം കഴിക്കാൻ അവളുടെ സമ്മതം പോലും ആവശ്യമില്ല. പെൺകുട്ടിയുടെ ‘മൗനം’ സമ്മതമായി കണക്കാക്കാം എന്ന് നിയമം വ്യക്തമാക്കുന്നു. ആറോ ഏഴോ വയസ്സുള്ള പെൺകുട്ടികളെപ്പോലും മുതിർന്ന പുരുഷന്മാർക്ക് വിവാഹം കഴിച്ചുകൊടുക്കാൻ ഈ നിയമം അനുവാദം നൽകുന്നു. ഒമ്പത് വയസ്സാകുമ്പോൾ അവർക്ക് വേണമെങ്കിൽ വിവാഹമോചനം ആവശ്യപ്പെടാം എന്ന വിചിത്രമായ ന്യായീകരണമാണ് താലിബാൻ ഇതിന് നൽകുന്നത്. ഒരു അഫ്ഗാൻ സ്ത്രീക്ക് സാധാരണ രീതിയിൽ വിവാഹമോചനം നേടുക എന്നത് ഈ നിയമത്തോടെ അസാധ്യമായി മാറി. ഭർത്താവിനെ കാണാതായാൽ പോലും, അയാളുടെ തലമുറയിലെ എല്ലാവരും മരിച്ചുവെന്ന് ഉറപ്പാകാതെ ഭർത്താവ് മരണപ്പെട്ടതായി പ്രഖ്യാപിക്കാൻ സ്ത്രീക്ക് അവകാശമില്ല.
മൃഗങ്ങൾക്കുള്ള വില പോലും സ്ത്രീക്കില്ലാത്ത പീനൽ കോഡ്
ഈ വർഷം ആദ്യം താലിബാൻ നടപ്പിലാക്കിയ പുതിയ പീനൽ കോഡ് സ്ത്രീകളെ വെറും കച്ചവടച്ചരക്കുകളായാണ് ചിത്രീകരിക്കുന്നത്. ഇതിലെ ശിക്ഷാവിധികൾ താലിബാന്റെ ക്രൂരമായ മനോഭാവത്തിന് തെളിവാണ്. ഒരു ഭർത്താവ് തന്റെ ഭാര്യയെ അടിച്ച് അസ്ഥി ഒടിക്കുകയോ മാരകമായി പരിക്കേൽപ്പിക്കുകയോ ചെയ്താൽ, അത് കോടതിയിൽ തെളിയിക്കപ്പെട്ടാൽ ഭർത്താവിന് ലഭിക്കുന്ന ശിക്ഷ വെറും 15 ദിവസത്തെ തടവ് മാത്രമാണ്. അതേസമയം, ഏതെങ്കിലും ഒരു നായപ്പോര് സംഘടിപ്പിക്കുകയോ മറ്റ് മൃഗങ്ങളെ ഉപദ്രവിക്കുകയോ ചെയ്യുന്ന വ്യക്തിക്ക് ലഭിക്കുന്ന ശിക്ഷ അഞ്ച് മാസത്തെ തടവാണ്. സ്ത്രീകളെക്കാൾ കൂടുതൽ നിയമപരിരക്ഷ അവിടെ മൃഗങ്ങൾക്കാണ് ലഭിക്കുന്നത് എന്ന് ഈ വ്യവസ്ഥകൾ വ്യക്തമാക്കുന്നു.
വിദ്യാഭ്യാസവും തൊഴിലും പൂർണ്ണമായി നിഷേധിക്കപ്പെട്ടു
ലോകത്തിൽ പെൺകുട്ടികൾക്ക് വിദ്യാഭ്യാസം നിഷേധിച്ച ഏക രാജ്യമാണ് ഇന്ന് അഫ്ഗാനിസ്ഥാൻ. 12 വയസ്സിന് മുകളിലുള്ള എല്ലാ പെൺകുട്ടികൾക്കും സ്കൂൾ-കോളേജ് വിദ്യാഭ്യാസം പൂർണ്ണമായി നിരോധിച്ചു. താലിബാൻ അധികാരത്തിൽ വന്നതിനു ശേഷം ഭൂരിഭാഗം സ്ത്രീകളെയും തൊഴിൽ മേഖലയിൽ നിന്ന് വിലക്കി. ബാങ്കുകൾ, സുരക്ഷാ സേനകൾ, എൻ. ജി. ഓകൾ, ഐക്യരാഷ്ട്രസഭയുടെ ഏജൻസികൾ എന്നിവടങ്ങളിലൊന്നും സ്ത്രീകൾക്ക് ജോലി ചെയ്യാൻ അനുവാദമില്ല. സ്ത്രീകൾക്ക് വരുമാന മാർഗ്ഗവും ഒത്തുകൂടാനുള്ള ഇടവുമായിരുന്ന ബ്യൂട്ടി പാർലറുകൾ 2023-ൽ താലിബാൻ പൂർണ്ണമായി അടപ്പിച്ചു. സ്ത്രീകൾക്ക് പുരുഷ ഡോക്ടർമാരുടെ അടുത്ത് ചികിത്സ തേടാൻ അനുവാദമില്ല. എന്നാൽ, സ്ത്രീകൾ മെഡിസിനോ നഴ്സിംഗോ പഠിക്കുന്നതും താലിബാൻ നിരോധിച്ചിരിക്കുകയാണ്. ഇത് അഫ്ഗാൻ സ്ത്രീകളുടെ ആരോഗ്യരംഗത്തെ കനത്ത ദുരന്തത്തിലേക്കാണ് നയിക്കുന്നത്.
നിഴലുകളായി മാറേണ്ടി വരുന്ന ജീവിതം
താലിബാന്റെ ‘ധാർമ്മിക നിയമങ്ങൾ’ പ്രകാരം സ്ത്രീകൾ പൊതുസ്ഥലങ്ങളിൽ മുഖം കാണിക്കാനോ, പുരുഷന്മാരെ നോക്കാനോ, ഉച്ചത്തിൽ സംസാരിക്കാനോ പാടില്ല. സ്ത്രീകളുടെ ശബ്ദം പോലും പുറത്തുകേൾക്കാൻ പാടില്ലാത്ത ഒന്നായി അവർ പ്രഖ്യാപിച്ചു. വീടിന് പുറത്തിറങ്ങണമെങ്കിൽ ‘മഹ്റം’ (പിതാവ്, ഭർത്താവ് അല്ലെങ്കിൽ സഹോദരൻ) കൂടെയുണ്ടായിരിക്കണം. ഒറ്റയ്ക്ക് പുറത്തിറങ്ങുന്ന സ്ത്രീകളെ താലിബാൻ തടവിലിടുകയും ക്രൂരമായി പീഡിപ്പിക്കുകയും ചെയ്യുന്നു. പാർക്കുകൾ, ജിമ്മുകൾ, കഫേകൾ എന്നിവടങ്ങളിലൊന്നും സ്ത്രീകൾക്ക് പ്രവേശനമില്ല. വീടിന്റെ ജനലുകളിലൂടെ പോലും സ്ത്രീകൾ പുറത്തേക്ക് നോക്കാതിരിക്കാൻ ജനലുകൾ കല്ലും സിമന്റും ഉപയോഗിച്ച് അടയ്ക്കാനാണ് താലിബാൻ ഉത്തരവിട്ടിരിക്കുന്നത്.
സാഹചര്യങ്ങൾ ഇത്രയും വഷളായതോടെ, അഫ്ഗാനിസ്ഥാനിൽ സ്ത്രീകളുടെ ആത്മഹത്യകളും കൊലപാതകങ്ങളും പ്രതിദിനം വർദ്ധിച്ചുകൊണ്ടിരിക്കുകയാണ്. സ്വന്തം നാട്ടിൽ തടവിലാക്കപ്പെട്ട, ശബ്ദം നിഷേധിക്കപ്പെട്ട അഫ്ഗാൻ സ്ത്രീകൾക്ക് ഇന്ന് ജീവിക്കുക എന്നാൽ വെറും ‘ശ്വാസമെടുക്കുക’ എന്ന് മാത്രമായി ചുരുങ്ങിയിരിക്കുന്നു.
