ലോകകപ്പ് ഫുട്ബോൾ ചരിത്രത്തിൽ പുതിയ അധ്യായം കുറിച്ചുകൊണ്ട് 2026 ഫിഫ ലോകകപ്പ് ആദ്യമായി മൂന്ന് രാജ്യങ്ങളുടെ സംയുക്ത ആതിഥേയത്വത്തിൽ നടക്കും. അമേരിക്ക, കാനഡ, മെക്സിക്കോ എന്നീ രാജ്യങ്ങളിലായി പടർന്നുകിടക്കുന്ന വിപുലമായ വേദികളിലാണ് ഇത്തവണത്തെ ആവേശപ്പോരാട്ടങ്ങൾ അരങ്ങേറുന്നത്.
1930-ൽ ഉറുഗ്വേയിൽ ആരംഭിച്ചതിന് ശേഷം ഇതുവരെ 22 തവണ ലോകകപ്പ് നടന്നിട്ടുണ്ടെങ്കിലും, മൂന്ന് രാജ്യങ്ങൾ ഒന്നിച്ച് ആതിഥേയത്വം വഹിക്കുന്നതും 48 ടീമുകൾ മാറ്റുരയ്ക്കുന്നതും ഇതാദ്യമായാണ്. ആറാഴ്ച നീണ്ടുനിൽക്കുന്ന ഫുട്ബോൾ മാമാങ്കത്തിന് ജൂൺ 11 വ്യാഴാഴ്ച മെക്സിക്കോ സിറ്റി സ്റ്റേഡിയത്തിൽ വെച്ച് നടക്കുന്ന ഉദ്ഘാടന മത്സരത്തോടെ തുടക്കമാകും. ഉദ്ഘാടന മത്സരത്തിൽ ആതിഥേയരായ മെക്സിക്കോ ദക്ഷിണാഫ്രിക്കയെ നേരിടും.
ജൂലൈ 19 ഞായറാഴ്ച ന്യൂയോർക്കിലെ ന്യൂജേഴ്സി സ്റ്റേഡിയത്തിലാണ് ഫൈനൽ പോരാട്ടം. ടീമുകളുടെ എണ്ണത്തിലും ആതിഥേയ രാജ്യങ്ങളുടെ പങ്കാളിത്തത്തിലും വരുത്തിയ ഈ ചരിത്രപരമായ മാറ്റം കായികലോകം ഉറ്റുനോക്കുന്ന ഏറ്റവും വലിയ ജനകീയ ഉത്സവമായി ഇത്തവണത്തെ ലോകകപ്പിനെ മാറ്റുമെന്നുറപ്പാണ്.
