ഡെമോക്രാറ്റിക് റിപ്പബ്ലിക് ഓഫ് കോംഗോയിൽ (DRC) എബോള ബാധിതരുടെ എണ്ണം അതിവേഗം വർദ്ധിക്കുന്നതായി റിപ്പോർട്ട്. നിലവിൽ രാജ്യത്ത് 1,502 പേർക്ക് രോഗബാധ സ്ഥിരീകരിച്ചതായും 473 പേർ മരണപ്പെട്ടതായും പൊതുജനാരോഗ്യ അധികൃതർ അറിയിച്ചു. രോഗവ്യാപനം അതീവ ഗുരുതരമായി തുടരുകയാണെന്ന് ലോകാരോഗ്യ സംഘടന മുന്നറിയിപ്പ് നൽകി.
വെള്ളിയാഴ്ച പുറത്തുവിട്ട ഏറ്റവും പുതിയ റിപ്പോർട്ട് പ്രകാരം 628 രോഗികൾ ഇപ്പോൾ ആശുപത്രികളിലോ പ്രത്യേക ഐസൊലേഷനിലോ ചികിത്സയിലാണ്. 229 പേർ രോഗമുക്തി നേടി. ഇതുകൂടാതെ, 63 മരണങ്ങൾ ഉൾപ്പെടെ 213 സംശയാസ്പദമായ കേസുകളും റിപ്പോർട്ട് ചെയ്യപ്പെട്ടിട്ടുണ്ട്.
കിഴക്കൻ പ്രവിശ്യകളായ ഇട്ടൂരി, നോർത്ത് കിവു എന്നിവിടങ്ങളിൽ രോഗവ്യാപനം ശക്തമായി തുടരുകയാണെന്ന് ഡബ്ല്യു.എച്ച്.ഒ ആഫ്രിക്കൻ റീജിയണൽ ഡയറക്ടർ മുഹമ്മദ് യാക്കൂബ് ജനാബി പറഞ്ഞു. ചരിത്രത്തിൽ രേഖപ്പെടുത്തപ്പെട്ടിട്ടുള്ളതിൽ വച്ച് ഏറ്റവും വലിയ ‘ബുന്ദിബുഗ്യോ എബോള’ വ്യാപനമാണ് ഇപ്പോഴത്തേതെന്നും അദ്ദേഹം വ്യക്തമാക്കി.
