മാവടിക്കാരുടെ ചങ്കിടിപ്പായ ഒരു വടംവലി ടീം: അവരുടെ വിശേഷങ്ങളുമായി ജോസഫ് അച്ചനും

ഓണാഘോഷത്തിന്റെ ഭാഗമായി ആരംഭിച്ചതാണ് ഇടുക്കി – മാവടി സെന്റ് തോമസ് ഇടവകയിൽ വടംവലി മത്സരം. ഇപ്പോൾ വടംവലി അവരുടെ ജീവിതത്തിന്റെ ഭാഗമായി. അവർക്കു സ്വന്തം ടീമുമായി. വികാരിയച്ചൻ ഫാ. ജോസഫ് (സിജോ) ചുനയന്മാക്കലിന്റെ നേതൃത്വത്തിലാണ് ഇതെല്ലാം പുരോഗമിക്കുന്നത്. മാവടിക്കാർ നെഞ്ചേറ്റിയ അവരുടെ വടംവലി ടീമിനെ കുറിച്ചും അവരുടെ വിശേഷങ്ങളെക്കുറിച്ചും എഡിറ്റ് കേരളയോടു പങ്കുവയ്ക്കുകയാണ് ഫാ. ജോസഫ്. തുടർന്നു വായിക്കുക.

ഓണത്തിനോടനുബന്ധിച്ചും മറ്റും നമ്മുടെ നാട്ടിൽ സാധാരണയായി കാണുന്ന ഒരു മത്സരയിനമാണ് വടംവലി. ഇത് നാടൻകലകളിൽ വളരെ സാധാരണവും എന്നാൽ അത്യധികം അധ്വാനവും പരിശ്രമവും ആവശ്യമുള്ളതുമായ ഒരു കായികയിനമാണ്. ഇത്തരത്തിൽ മനസ്സിന്റെയും ശരീരത്തിന്റെയും ബലവും സമർപ്പണവും മാറ്റുരയ്ക്കുന്ന വടംവലിക്കായി ഒരു ടീമിനെത്തന്നെ തയ്യാറാക്കിയ ഒരു ഇടവക ഇടുക്കി രൂപതയിലുണ്ട്. മാവടി സെന്റ് തോമസ് ഇടവക! ഈ ഇടവകയിലെ വികാരിയായ ഫാ. ജോസഫ് ചുനയന്മാക്കൽ രൂപംകൊടുത്ത ഈ ടീം ഇന്ന് കഠിനാധ്വാനത്തിലൂടെയും പരിശീലനത്തിലൂടെയും വടംവലിച്ചു മുന്നേറുകയാണ്. വടംവലി ടീമോ, നിസ്സാരം എന്ന് കരുതുന്നവർക്കിടയിൽ ശാരീരികമായും മാനസികമായും ബലം വർധിപ്പിച്ച് ഒരുമയോടെ മുന്നേറുന്ന, മാവടിക്കാർ നെഞ്ചേറ്റിയ അവരുടെ വടംവലി ടീമിനെക്കുറിച്ചും അവരുടെ വിശേഷങ്ങളെക്കുറിച്ചും എഡിറ്റ് കേരളയോടു പങ്കുവയ്ക്കുകയാണ് ഫാ. ജോസഫ്.

360 ഓളം ഭവനങ്ങളുള്ള മാവടി ഇടവകയിൽ വികാരിയായി ജോസഫ് അച്ചൻ എത്തിയിട്ട് രണ്ടു വർഷത്തോളമായി. വിവിധ കായികയിനങ്ങളിലൂടെ യുവജനങ്ങളെയും കുട്ടികളെയും കൂട്ടായ്മയിലേക്കും സ്നേഹത്തിലേക്കും വളർത്തുകയാണ് അച്ചൻ. നാട്ടിലൊരു കൂട്ടായ്മ ഉണ്ടാക്കുക, പിള്ളേർക്ക് ഒരു മോട്ടിവേഷൻ നൽകുക എന്നതായിരുന്നു തുടക്കത്തിൽ ഇത്തരത്തിലുള്ള പ്രവർത്തനങ്ങളുടെ ലക്ഷ്യം. സദാസമയവും മൊബൈലിൽ നോക്കി സമയം നഷ്ടപ്പെടുത്തുന്നതിനുപകരം, നമ്മുടെ ഊർജത്തെ കായികമായി ഉപയോഗപ്പെടുന്ന തലത്തിലേക്ക് ഒരു മാറ്റം. അതിനായി ഫുട്‌ബോൾ, വോളിബോൾ, കരാട്ടെ എന്നിങ്ങനെ എല്ലാത്തിനുമുള്ള സൗകര്യം ഇടവകയിൽ ഒരുക്കിയിട്ടുണ്ട് ഈ വൈദികൻ. ഇങ്ങനെയുള്ള കായികയിനങ്ങളിൽ താൽപര്യമുള്ളവർ കുറഞ്ഞുവരികയാണ്. അതിനാലാണ് ഇതുപോലുള്ള അവസരങ്ങൾ ഇടവകതലത്തിൽ ഒരുക്കിയത്. ഇക്കൂട്ടത്തിൽ തന്നെയായിരുന്നു വടംവലി പരിശീലനവും ആരംഭിച്ചത്.

ചെറിയ തുടക്കം, കുറയാത്ത ആവേശം

സെന്റ് തോമസ് ഇടവകയിൽനിന്നുള്ളവർ തന്നെയാണ് ‘സെന്റ് തോമസ് മാവടി’ എന്ന വടംവലി ടീമിലുള്ളത്. വളരെ ചെറുതായിട്ടായിരുന്നു ഈ ടീമിന്റെ തുടക്കം. 2023 ലെ ഓണത്തിന് ഈ നാട്ടിലുള്ള എല്ലാ മതസ്ഥരും ഒരുമിച്ചൊരു ഓണാഘോഷം സംഘടിപ്പിച്ചിരുന്നു. ഒന്നിച്ചുള്ള ഒരു പൊതുപരിപാടിയും ആഘോഷവും എന്ന നിലയിൽ രണ്ടുദിവസത്തെ ഓണാഘോഷ പരിപാടിയാണ് പ്ലാൻ ചെയ്തത്. വിവിധ മത്സരങ്ങൾ, വടംവലി, ഓണം ഘോഷയാത്ര, പുലികളി എന്നിങ്ങനെ ഓണത്തിന്റെ എല്ലാ പ്രത്യേകതകളും ഉൾപ്പെടുത്തിക്കൊണ്ടായിരുന്നു ഓണാഘോഷ പരിപാടികൾ നടത്തിയത്. ഇവിടെയുള്ള ജനപ്രതിനിധികളെയും ആളുകളെയും ഉൾപ്പെടുത്തിക്കൊണ്ട് പൊതുസമ്മേളനവും ഈ രണ്ടു ദിവസത്തെ ഓണപരിപാടിയുടെ ഭാഗമായിരുന്നു. കലാപരിപാടികളും നാടൻപാട്ട്‌ ഗാനമേളയും ഇതിനോടനുബന്ധിച്ച് ഉണ്ടായിരുന്നു. ഇതിൽ ഏറ്റവും ആകർഷകവും ആവേശോജ്വലവുമായ ഒന്നായിരുന്നു വടംവലി മത്സരം.

എന്നാൽ, ഓണാഘോഷത്തിന്റെ ഭാഗമായി മാത്രമുള്ള വെറുമൊരു തയ്യാറെടുപ്പായിരുന്നില്ല ഈ വടംവലി മത്സരം. മത്സരത്തിന്റെ ഭാഗമായി ഒന്നൊന്നര മാസം മുൻപുതന്നെ പള്ളിയുടെ മുറ്റത്ത് പരിശീലനം ആരംഭിച്ചിരുന്നു. പുരുഷന്മാരും സ്ത്രീകളും കുട്ടികളുമൊക്കെ അവയുടെ ഭാഗമായി എന്നുള്ളതാണ് മറ്റൊരു വ്യത്യസ്തത. അങ്ങനെ ടീമുകളായാണ് അന്ന് മത്സരിച്ചത്. അന്ന് മത്സരത്തിൽ പങ്കെടുത്തവരിൽ ഒന്നുരണ്ടു പേരൊക്കെ നേരത്തെ മത്സരത്തിൽ പങ്കെടുത്തിട്ടുള്ളവരുമായിരുന്നു.

“ആ മത്സരം കഴിഞ്ഞപ്പോൾ പതിയെ വടംവലി പരിശീലനം തുടരാം എന്ന തീരുമാനത്തിലെത്തി. അതിനുള്ള എല്ലാ സപ്പോർട്ടും പരിശീലിക്കാനുള്ള സ്ഥലവുമൊക്കെ ഇടവകയിൽനിന്നും സജ്ജമാക്കി. സ്‌കൂളിന്റെ വരാന്തയിൽ ചെറുതായി പരിശീലനം നടത്താനുള്ള സ്ഥലമൊരുക്കി. അങ്ങനെ പതിയെപ്പതിയെ പരിശീലനം പൂർത്തിയാക്കി. തുടർന്ന് ഇടുക്കിയിലെ പല സ്ഥലങ്ങളിലും പോയി മത്സരത്തിൽ പങ്കെടുക്കാൻ ആരംഭിച്ചു. അഖില കേരളാ മത്സരങ്ങൾ, ജില്ലാ മത്സരങ്ങൾ, അവയിലൊക്കെ പങ്കെടുക്കാൻ തുടങ്ങി” – വടംവലി ടീമിന്റെ തുടക്കത്തെക്കുറിച്ച് അച്ചൻ പറയുന്നു.

പരിശീലനത്തിന് ജോസഫ് അച്ചനും ഇറങ്ങാറുണ്ട്. മാറിനിന്ന് പരിശീലനം നൽകുകയോ, നിർദേശങ്ങൾ നൽകുകയോ മാത്രമല്ല, അവയുടെ ഭാഗമായിനിന്ന് പരിശീലനത്തിന്റെ ബുദ്ധിമുട്ടുകളുടെയും തയ്യാറെടുപ്പുകളുടെയും ഒക്കെ ഭാഗമാകുകയും ചെയ്യുന്നുണ്ട് ഈ വൈദികൻ. ഒരു ഇടവക വികാരി ആയതിനാൽതന്നെ എല്ലാ ദിവസവും മുടങ്ങാതെ പരിശീലനം നടത്താൻ അച്ചനു സാധിക്കാറില്ല. എങ്കിലും പരമാവധി ഇവയുടെ ഭാഗമാകാൻ അച്ചൻ ശ്രമിക്കുന്നുണ്ട്. ഭാരം സെറ്റ് ചെയ്യുക എന്നത് വടംവലിയുടെ ഒരു പ്രധാനപ്പെട്ട കാര്യമാണ്. 450/ 455 / 460 കിലോ ഒക്കെയാണ് ഒരു ടീമിന് ആകെ ഭാരം വേണ്ടത്. വടംവലിക്ക് ഇറങ്ങണമെന്നുണ്ടങ്കിൽതന്നെ ഭാരം സെറ്റ് ചെയ്ത് ഏഴുപേർ ആയെങ്കിലേ ശരിയാവുകയുള്ളൂ. അങ്ങനെ ഭാരം സെറ്റാകുന്ന സമയങ്ങളിലും പരിശീലനത്തിനു സാധിക്കുന്ന സമയങ്ങളിലും മാത്രമേ ജോസഫ് അച്ചൻ മത്സരത്തിനായി ഇറങ്ങാറുള്ളൂ.

“മത്സരങ്ങളിൽ ഒരു 90% നടക്കുന്നത് ഞായറാഴ്ചകളിലാണ്. അതിനാൽ എനിക്ക് സ്ഥിരം മത്സരങ്ങളിൽ ഇറങ്ങാനൊന്നും സാധിക്കുകയില്ല. മാത്രമല്ല, വടംവലിയുടെ പരിശീലനവും കൃത്യമായി നടക്കണം. മൂന്നാലു മണിക്കൂർ ഭാരം കുറയ്ക്കാനായി എടുക്കണം” – ഫാ. ജോസഫ് പറയുന്നു.

ഇടവകക്കാരായ ടീം അംഗങ്ങൾ

ഇടവകക്കാരായവർ തന്നെയാണ് സെന്റ് തോമസ് മാവടി ടീമിലെ അംഗങ്ങൾ. സിനോജ്, ബിജു, റ്റിജോ, റോയി, സുരേഷ്, ആൽബിൻ സജി, മനീഷ്, അഭയ്, ലിജിൻ, ബിബിൻ, ജോയിസ്, നിധിൻ, ആൽബിൻ ബെന്നി എന്നിവരാണ് സ്ഥിരമായി പരിശീലനത്തിനു വരുന്നവരും ടീമിന്റെ ഭാഗമായി നിൽക്കുന്നവരും. വടംവലിക്ക് ആവശ്യമായ അത്യാവശ്യ പരിശീലനം ലഭിക്കുന്നതിനായി ആദ്യമൊക്കെ അസോസിയേഷന്റെ ടീമിലെ ഒന്നുരണ്ടു പേരെ വിളിച്ചിരുന്നു. മറ്റു ടീമിൽ നിന്നുള്ളവരെയൊക്കെ വിളിച്ചാണ് അടിസ്ഥാനപരമായ പരിശീലനം ആരംഭിച്ചത്. അതിനുശേഷം കണ്ടും കേട്ടും മത്സരങ്ങളിൽ പങ്കെടുത്തും സോഷ്യൽ മീഡിയയിൽ നിന്നുമൊക്കെ ഇതിന്റെ ടിപ്പുകൾ കണ്ടെത്തി മനസ്സിലാക്കി. തുടർച്ചയായി പരിശീലിക്കുക എന്നതാണ് ഏറെ പ്രധാനപ്പെട്ട കാര്യം. ഇടയ്‌ക്കൊക്കെ പുറത്തുനിന്നുള്ള ആളുകളുടെ കോച്ചിങ്ങും ലഭിക്കും.

ഒരു ടീം എന്ന നിലയിൽ മത്സരങ്ങളുടെ ഭാഗമാകാൻ തുടങ്ങിയിട്ട് ഒരു വർഷത്തോളമായി. പരിശീലനം ഇപ്പോഴും തുടർന്നുകൊണ്ടു പോകുന്നു. വലിയ വിജയങ്ങളിലേക്കൊന്നും എത്തിയിട്ടില്ല. ചെറിയ ചെറിയ വിജയങ്ങളിലേക്കു മാത്രമേ എത്തിയിട്ടുള്ളൂ. നല്ല രീതിയിൽ തുടർന്നുപോകുകയാണെങ്കിൽ വലിയ വിജയങ്ങളിലേക്കും എത്തുമെന്നാണ് അച്ചന്റെ പ്രതീക്ഷ. കാരണം, ഇന്നു മുൻനിരയിൽ നിൽക്കുന്ന ടീമുകളെല്ലാംതന്നെ വർഷങ്ങളുടെ പരിശീലനംകൊണ്ടാണ് ഈ നിലയിലേക്കെത്തിയത്. കാണുന്നപോലെ അല്ല, കഠിനമായ പരിശീലനം ഉണ്ടെങ്കിൽ മാത്രമേ വടംവലിയിൽ മുൻപോട്ട് കയറിവരാൻ സാധിക്കുകയുള്ളൂ.

ഇപ്പോൾ സെന്റ് തോമസ് മാവടി ടീം, മറ്റ് ടീമിന് പരിശീലനം കൊടുക്കാൻ പര്യാപ്തമായ ടീമായി മാറി കഴിഞ്ഞു. കഴിഞ്ഞ ഓണത്തിന് തൊട്ടടുത്ത ഇടവകയിൽ നിന്നുള്ളവരും പരിശീലനം നേടുവാനായി ഇവിടെ എത്തിയിരുന്നു. യുവജനങ്ങളും പ്രായമായവരുമൊക്കെ ഇവിടെനിന്നും പരിശീലനം നേടിപ്പോയിരുന്നു. ഇവിടെ ഒരു ടീം ഉള്ളതുകൊണ്ട് അത്യാവശ്യം പരിശീലനം കൊടുക്കാനും സാധിക്കും.

ചെറിയ, വലിയ കാര്യങ്ങളുള്ള വടംവലി

വടംവലി മത്സരത്തിന്റെ മറ്റൊരു പ്രത്യേകത അതിന്റെ ആവേശമാണ്. കോളേജ്, സ്കൂൾ, പള്ളി മുതലായ ഏത് ഇടങ്ങളിലും എല്ലാവർക്കും ചെയ്യാൻ പറ്റുന്ന ഒരു മത്സരയിനമാണ് വടംവലി. ഇതിനെക്കുറിച്ച് ഒന്നും അറിയത്തില്ലാത്ത ഒരാൾക്കും ഏഴുപേരെ വിളിച്ചിട്ട് വടത്തിന്റെ രണ്ട് സൈഡിലും നിർത്തി വലിക്കാൻ പറഞ്ഞാൽ വലിക്കാം. എന്നാൽ, ഫുട്‌ബോൾ, ക്രിക്കറ്റ്, വോളിബോൾ അങ്ങനെയുള്ള കളികളിൽ കളി അറിയാത്തവർക്ക് കളിക്കാൻ സാധിക്കില്ല. അതുകൊണ്ടുതന്നെയാണ് വടംവലി ഇത്രയും ജനകീയമായ, ആവേശം നിറഞ്ഞ ഒരു മത്സരയിനമായി മാറുന്നത്. എല്ലാ ഓണാഘോഷ പരിപാടികളിലും വടംവലിയാണ് അതിൽ ഏറ്റവും ഹൈലൈറ്റ് ചെയ്യപ്പെടുന്ന മത്സരയിനം. അതിനാൽതന്നെ ഇന്ന് വടംവലിക്ക് ആരാധകർ ഏറിവരികയാണ്.

വടംവലിയിലൂടെ നടക്കുന്ന ചാരിറ്റി പ്രവർത്തനങ്ങൾ

വടംവലിയുടെ ഭാഗമായി ഒരുപാട് ചാരിറ്റി പ്രവർത്തനങ്ങളും നടക്കുന്നുണ്ട്. അത് എങ്ങനെയാണെന്നല്ലേ? മത്സരങ്ങളുടെ ഭാഗമായി പണം സമാഹരിച്ച് അവ പാവപ്പെട്ടവരെ സഹായിക്കാൻ ഉപയോഗിക്കുന്നു. അക്കാര്യത്തിൽ സെന്റ് തോമസ് മാവടി ടീമും പിന്നിലല്ല. നവംബർ 24 ന് ജോസഫ് അച്ചന്റെ നേതൃത്വത്തിൽ ഈ ഇടവകയിൽ ഒരു അഖില കേരള വടംവലി മത്സരം പള്ളിയുടെ മുറ്റത്ത് നടത്തുന്നുണ്ട്. സ്പോൺസർഷിപ്പ് വഴി ലഭിക്കുന്ന പണം, മത്സരത്തിനെത്തുന്ന ടീമുകൾക്കു നൽകാനും മത്സരചിലവുകൾ കണ്ടെത്താനും കൂപ്പൺ വിൽപനയിലൂടെ ലഭിക്കുന്ന തുക ചാരിറ്റി പ്രവർത്തങ്ങൾക്കുമായിട്ടാണ് ഉപയോഗിക്കുന്നത്. പഠനസഹായം, ചികിത്സാസഹായം തുടങ്ങിയ കാര്യങ്ങൾക്കുവേണ്ടിയിട്ടാണ് പൂർണ്ണമായും ഈ തുക ഉപയോഗപ്പെടുത്തുക. നാട്ടിലും പുറത്തുമുള്ള നാനാജാതി മതസ്ഥർക്കായി ഈ തുക പ്രയോജനപ്പെടുത്തും. മത്സരം നടത്തിപ്പിനായുള്ള മുഴുവൻ തുകയും ഇതിനോടകം ലഭിച്ചുകഴിഞ്ഞതിനാൽ കൂപ്പൺ വിൽപനയിലൂടെയുള്ള തുക മുഴുവനായും ഉപവിപ്രവർത്തങ്ങൾക്കായി ഉപയോഗിക്കാൻ സാധിക്കും.

സ്പോർട്സ് ചെറുപ്പം മുതലേ ഹരം

ജോസഫ് അച്ചന് സ്പോർട്ട്സിനോട് ചെറുപ്പം മുതലേ വലിയ താൽപര്യമാണ്. സ്കൂൾ, സെമിനാരി കാലഘട്ടങ്ങളിലൊക്കെ നിരവധി സമ്മാനങ്ങളും അച്ചന് കിട്ടിയിട്ടുണ്ട്. ക്രിക്കറ്റ്, ഫുട്‍ബോൾ, ബാസ്‌ക്കറ്റ് ബോൾ, വോളിബോൾ എന്നുവേണ്ട എല്ലായിനങ്ങളും അച്ചന് വഴങ്ങും. ഇവിടെ വടംവലിക്കായി ഒരു സ്ഥലവും സാഹചര്യവും ഒത്തുവന്നപ്പോൾ അതിലും ഒരു കൈ നോക്കാതിരിക്കാൻ അച്ചനു കഴിഞ്ഞില്ല. ഡൽഹിയിൽ കുറച്ചുകാലം ഉണ്ടായിരുന്നപ്പോൾ അവിടെ ‘സാൻ ലൂർദ് എഫ് സി’ എന്നപേരിൽ ഇടവകക്കാരെയെല്ലാം ഒരുമിച്ചുചേർത്ത് ഒരു ഫുട്‍ബോൾ ക്ലബ്ബിന് അച്ചൻ തുടക്കം കുറിച്ചു. അവർ മത്സരങ്ങൾക്കൊക്കെ പോകുമായിരുന്നു. ചെറിയ ട്രോഫികളും കിട്ടിത്തുടങ്ങി. അത് ഇന്നും തുടർന്നുകൊണ്ടു പോകുന്നുണ്ട്.

കായികവിനോദങ്ങൾക്ക് പള്ളിയിലെന്തു കാര്യം എന്ന് പറഞ്ഞ് നെറ്റി ചുളിക്കാൻ വരട്ടെ. “കായികയിനങ്ങൾക്ക് ഒരുപാട് കാര്യങ്ങൾ ചെയ്യാൻ സാധിക്കും. ആളുകളെ ഒരുമിച്ചുനിർത്താൻ, ഒരു നല്ല കൂട്ടായ്‌മ രൂപപ്പെടുത്താൻ ഒക്കെ കഴിയും. കളിയിലൂടെ കാര്യത്തിലേക്കു കടക്കാനുള്ള നല്ല ഉപാധിയാണ് കായികമത്സരങ്ങൾ. ലോകത്ത് ഏറ്റവും കൂടുതൽ ആളുകളെ ഒരുമിച്ചുനിർത്തുന്ന ഇടമാണ് സ്പോർട്സ്. അവിടെ മതമില്ല, ജാതിയില്ല, വർണ്ണവ്യത്യാസമില്ല” – അച്ചൻ കൂട്ടിച്ചേർത്തു.

ലക്ഷ്യം കളിയിലൂടെ കാര്യം

“ഇന്നത്തെ കുട്ടികളും യുവജനങ്ങളും ഫോണിലും മറ്റ് സോഷ്യൽ മീഡിയ പ്ലാറ്റ്ഫോമിലും അനാവശ്യമായി സമയം ചിലവഴിച്ച് അതിനു അടിമപ്പെട്ടുപോകുന്നുണ്ട്. ആദ്യമൊക്കെ പള്ളിയിൽ അവർ ഒരുമിച്ചുകൂടുമായിരുന്നെങ്കിലും അവിടെയും വന്നിരുന്ന് ഫോണിൽ നോക്കിയിരിക്കും. അങ്ങനെയാണ് കളികൾക്കായി അവസരമൊരുക്കിയത്. ഒരു മണിക്കൂർ ഫുട്‌ബോൾ കളിക്കുമെങ്കിൽ ആ സമയം അവർ ഫോണിൽ നോക്കില്ല. അങ്ങനെ മറ്റു സ്പോർട്സ് ഇനങ്ങളിൽ പങ്കെടുക്കുന്നവരും ഫോണിൽനിന്നും അകലം പാലിക്കാൻ തുടങ്ങും. കൂടെ കളിക്കുന്നവരുമായി സൗഹൃദവും കൂട്ടായ്മയും വളരുന്നതിനും കായികവിനോദങ്ങൾ വേദിയാകുന്നു. നാട്ടിലെ എന്ത് പൊതുകാര്യത്തിനു വിളിച്ചാലും നമ്മോട് ചേർന്നുനിൽക്കുന്ന ഒരു കൂട്ടം പിള്ളേർ കൂടെയുണ്ട്” – ജോസഫ് അച്ചൻ വെളിപ്പെടുത്തി.

അമിതവണ്ണം നിയന്ത്രിക്കുക, ഭക്ഷണ ക്രമീകരണം, മൊബൈലിന്റെ അമിത ഉപയോഗം കുറയ്ക്കുക, സൗഹൃദകൂട്ടായ്‌മ എന്നിങ്ങനെയുള്ള പല നല്ല കാര്യങ്ങളും ഇത്തരം കായികവിനോദങ്ങളിൽ ശ്രദ്ധ കേന്ദ്രീകരിക്കുന്നതിലൂടെ യുവതലമുറയ്ക്കു കൈവരുന്നു. കായികവിനോദങ്ങളിലൂടെ ആരോഗ്യമുള്ള ഒരു തലമുറയെ വാർത്തെടുക്കുകയും അതിനുവേണ്ടി പരിശ്രമിക്കുകയുമാണ് ജോസഫ് അച്ചന്റെ ലക്ഷ്യം.

ഈ വടംവലിയുടെ തുടക്കം, ഒരു നാടിന്റെ കൂട്ടായ്മ വളർത്തുക എന്ന നിലയിലാണ്. ആ ഒരു കൂട്ടായ്മ വിജയകരമായി പോകുന്നതുകൊണ്ടാണ് അഖില കേരളം വടംവലി മത്സരം നടത്താൻ മാവടി ഇടവകയ്ക്കു സാധിക്കുന്നത്. ഈ വടംവലി മത്സരത്തിൽ നാൽപതോളം ടീമുകൾ പങ്കെടുക്കുമെന്നാണ് പ്രതീക്ഷ. എട്ടോളം ജില്ലകളിൽനിന്ന് ടീമുകൾ ഉണ്ടാകും. ചെറിയ തോതിൽ ചിന്തിച്ച കാര്യം ആളുകളുടെ സഹകരണത്തോടെ ഒരു വലിയ പദ്ധതിയായി രൂപപ്പെടുകയാണ് ചെയ്തത്. ഇതിന്റെ നടത്തിപ്പുമായി ബന്ധപ്പെട്ട് നൂറോളം പേരാണ് അച്ചന്റെ കൂടെയുള്ളത്.

ഇടുക്കി പന്നിയാർകുട്ടി ഇടവകാംഗമാണ് ഫാ. ജോസഫ് ചുനയന്മാക്കൽ. ആവേശം ഒട്ടും ചോരാത്ത അദ്ദേഹത്തിന്റെ വാക്കിലും പ്രവർത്തിയിലും ആടുകളെ അറിഞ്ഞു സ്നേഹിക്കുന്ന നല്ല ഇടയന്റെ സ്നേഹവും കരുതലുമുണ്ട്. കളിയിലൂടെയും കാര്യത്തിലൂടെയും ജോസഫ് അച്ചൻ ക്രിസ്തുവിന്റെ സുവിശേഷം പങ്കുവയ്ക്കുകയാണ്. ക്രിസ്തുവിന്റെ ഈ പുരോഹിതൻ ഇക്കാലഘട്ടത്തിന്റെ ആവേശമാണ്.