ചൈനീസ് പ്രസിഡന്റ് ഷി ജിൻപിങ്ങിന്റെ ഉത്തര കൊറിയൻ സന്ദർശനത്തിന് പിന്നാലെ ഇരുരാജ്യങ്ങളും തമ്മിൽ സുപ്രധാന ധാരണകളിൽ എത്തിയതായി റിപ്പോർട്ട്. ഉത്തര കൊറിയൻ ഭരണാധികാരി കിം ജോങ് ഉന്നുമായി നടത്തിയ കൂടിക്കാഴ്ചയിൽ പ്രാദേശികവും ആഗോളവുമായ സമാധാനവും വികസനവും ഉറപ്പാക്കാൻ ഇരുപക്ഷവും സമ്മതിച്ചതായി ഉത്തര കൊറിയൻ ഔദ്യോഗിക വാർത്താ മാധ്യമമായ കെ.സി.എൻ.എ റിപ്പോർട്ട് ചെയ്തു.
തനിക്ക് നൽകിയ സ്വീകരണത്തിന് നന്ദി അറിയിച്ചുകൊണ്ട് കിം ജോങ് ഉന്നിന് അയച്ച സന്ദേശത്തിലാണ് ഷി ജിൻപിങ് ഇക്കാര്യങ്ങൾ വ്യക്തമാക്കിയത്. ഇരുരാജ്യങ്ങളും തമ്മിലുള്ള ബന്ധം പുതിയൊരു ചരിത്ര ഘട്ടത്തിലേക്ക് കടന്നതായും ഷി ജിൻപിങ് കൂട്ടിച്ചേർത്തു.
ഏഴ് വർഷത്തിന് ശേഷം ആദ്യമായാണ് ഒരു ചൈനീസ് പ്രസിഡന്റ് ഉത്തര കൊറിയ സന്ദർശിക്കുന്നത്. തിങ്കൾ, ചൊവ്വാ ദിവസങ്ങളിലായിരുന്നു ഷി ജിൻപിങ്ങിന്റെ പ്യോങ്യാങ് സന്ദർശനം. ഇരുരാജ്യങ്ങളും തമ്മിലുള്ള ബന്ധത്തിന്റെ ഭാവി വികസനത്തിന് കൂടുതൽ വ്യക്തത നൽകാൻ ഈ സന്ദർശനത്തിന് സാധിച്ചതായി ചൈനയുടെ ഔദ്യോഗിക വാർത്താ ഏജൻസിയായ സിൻഹുവയും റിപ്പോർട്ട് ചെയ്തു.
